Ka Bible ka iathuh ia ngi ba ki briew ki ban iohsngew ia ka kyntien kaba ong, "BHA ME U SHAKRI BABHA" ha kata ka sngi bishar ba khadduh, kin long kiba kmen tam. Hynrei kita kiba iohsngew ia kaba mar pyrshah ia kata, kaba ong, "Khie leit noh na nga ME U SHAKRI BA BYMMAN" kin long kiba kordit tam. Kita ki ban iohsngew ia ka kyntien kaba ong, BHA ME U SHAKRI BABHA ka bynta jong ki kan long ka bneng, ka jaka jong ka jingsuk bad jingkmen bymjukut, hynrei kita ki ban iohsngew ia ka kyntien kaba ong, "Khie leit noh na nga ME U SHAKRI BA BYMMAN", ka jingim jong ki kan long kaba kordit tam, bad ka bynta jong ki kan long ka dujok ding bymjukut. Kumta ngi hap ban pyntikna ialade ba la kumno kumno ngi dei ban iohsngew ia ka kyntien kaba U Trai un ong BHA ME U SHAKRI BABHA.
Ngin ia peit na ka Ktien jong U Blei, kiba kumno kita ki ban iohsngew ia ka kyntien kaba ong BHA ME U SHAKRI BABHA.
Ki ban iohsngew ia kane dei kita kiba kohnguh ia kaei ba U Kynrad u phah kam ia ki. Dei kita kiba leh bha bad kiba iaineh ha kata ka jingphah U Trai tad haduh ba un wan. Ngi iohi ia kane na ka gospel u Mathaios 25:14-30. U Jisu u kren ia ka pharshi ki talent, kumno ba u kynrad shuwa ba un leit jingleit u la ai ha ki shakri jong u ia kita ki talent, ha uwei la ai San talent, ha uwei la ai Ar talent bad ha uwei pat la ai Kawei ka talent. Ngi iohi ba uta uba nyngkong u la khaïi bad u la iohnong San kiwei pat ki talent, uba ar ruh u la leit khaïi u la iohnong kiwei pat ar talent, hynrei uta uba ioh kawei um shym la leit khaïi satia, u la leit buhrieh pynban ha khyndew ong ka Ktien U Blei. Bad haba u kynrad u la wan bad pan jingkhein, baroh ki la wan ban ai jingkhein ha u. Kita kiba la kohnguh bad leh ia kaei ba la phah ia ki, u la ong ia ki ia kine ki kyntien, "Bha me u shakri ba bha bad ba ngeit". vv.21, 23. Hynrei ha uta u bym shym la kohnguh, u bym shym la leit khaïi, u la ong ia kine ki kyntien, "Me u shakri bymman bad bym myntoi" v.26. Ia une u shakri ba bymman la hukum ban bret noh sha kaba dum bad hangta kan long kaba lynniar bad daitbniat, kaba kren shaphang ka dujok ding. v.30
Ka jinghikai ka long ba ngi donkam ban kohnguh ia kaei kaba U Trai u phah ia ngi, la ka long kaba rit ne bakhraw. Ngi donkam ban lehbha bad iaineh ha kata ka kam ba U Trai u shaniah ha ngi haduh kaba kut.
Kaei kata kaba U Trai u phah ia ngi? Shibun lehse ki jingphah U Trai, hynrei kawei bad kaba khraw na ka jingphah jong u kadei ka jingialap gospel. U Trai u kwah ia ngi ba ngin pynroi ia ka hima U Blei da kaba ngi ialap ia ka gospel sha kiwei pat. Ha ka gospel u Markos 16:15 U Jisu u la phah ia ki synran ban leit kylleng ban ialap ia ka gospel, bad kane ka jingphah kam kut satia tang ha ki synran, hynrei ka dang bteng ruh ha ngi ki synran ha kine ki sngi bakhadduh. Bad lada ngi kloi ban kohnguh, ban leit ban ialap, ban iathuh sha ka pyrthei shaphang U Jisu, ia ngi ruh un sa ong, "Bha me u shakri ba bha bad ba ngeit". Ia kane la pynskhem ruh da u Apostol Paul ha u Timothy, u ong, "Lada me pynkynmaw ïa kita ki parabangeit shaphang kine kiei kiei ruh, men long u shakri babha u jong U Jisu Khrist, ba la bsa ha ki ktien jong ka jingngeit bad ki jong kata ka jinghikai babha, ïa kaba me la ju bud." 1 Timothi 4:6. Pynkynmaw, ialap, sneng, kyntu ia ki bangeit, ia kiwei pat, kumta ngin long ki shakri ba bha U Jisu Khrist.
Para bangeit baieit, to ngin long ki shakri ba bha jong U Trai da kaba ngin kohnguh bad leh ia kaei ba u ong ne phah ia ngi. To ngin pyndonkam hok ia ka talent ne ka jingaiei U Blei la ka long ha kano kano ka bynta. U Apostol Paul u ong ha ki Rom 12:6-8 ba ngi hap ban minot, ban iaineh, khnang ba ngin iohsngew ha kaba khadduh ba un ong ia ngi "BHA ME U SHAKRI BABHA BAD BANGEIT" bad ba un phah ia ngi sha kata ka jaka ba la pynkhreh kyrpang, ka jaka jong ka jingsuk bad jingkmen bymjukut. Amen
© Jester Mawlong | May 17, 2021
Comments
Post a Comment