Ha kaba iadei bad kane, don kiba sngewthuh ia ka jingmut jong kata, don ruh lehse ki bym sngewthuh ka mut aiu kata ka wave.
Wave ha ka ktien phareng (English) ka don bun ki jingmut, bad kawei na kata ka jingmut ka long 'kata ka jingkhih jong ka um ha duriaw kaba wan tyllep shaduh sharud duriaw sha palat jong u pud ba la buh. Lada shu ong lyngkot ka mut ka jingat phyllung.' Kata ka dei ka jingmut wave.
Ngi la iohsngew ha ki khubor shaphang une u Corona virus ne Covid-19 bad ki ong ba mynta ka lah dei ka Second Wave bad kumta ter ter, bad ki ong ruh ba ka India ka lah ban mad wat ia ka Third Wave. (Kaba mut ba une u Corona virus u lah ban beh kyrthep kum ka jingat phyllung sa shisien pat). Kata ka dei ka jingong jong ki stad dawai lane ki heh sorkar. Ki la maham bad kyntu ruh ba ngi dei ban long phikir khnang ba une u virus un nym saphriang sted bad kumta ter ter. (Ka long kaba dei ba ngi hap ban phikir, hynrei nalor baroh ngi hap ban pynkhlain ka jingngeit bad ka jingshaniah ha U Blei, namar lada U Blei um sumar, kita ki jingsumar jong ngi baroh kin nym lah ban iarap ia ngi. Kata ka long ka jingshisha). U Nongrwai Salm u ong, "Lada U Trai um sumar ia ka nongbah, ki minot lehnohei kita kiba sumar ia ka..." Salm 127:1. Hynrei ha kane ka por ngam kwah ban kren bun halor u Corona virus bad kata ka wave jong u, hynrei nga kwah ban pynphai ia ka jingmut jong ngi sha kiei kiei kiba kynja mynsiem.
Kaei kaba nga kwah ban kren bad kaba nga da sngewkhia shisha ka long ba, haba ngi peit ngi iohi ka pyrthei ka lah mad (experience) ia kita ki waves kiba la wan ha ka, ha ki rukom bapher bapher, hynrei katno ngut na ngi ki KHRISTAN kiba lah mad ia ka Wave jong U Mynsiem Bakhuid? Lada ngi lah mad shisien, hato ngin shu sngewhun noh tang hangta lane ngin shu sngewbiang noh tang ha kata ka First Wave (first experience)? Ne ngi dang donkam shuh shuh ia ka Second Wave, Third Wave jong U Mynsiem Bakhuid?
Paralok baieit, ka pyrthei bad u Soitan ki sted haduh katta katta, lada ngim kyndit bynriew kane ka wave jong u Covid-19 kan sa tyllep noh ia ka jingim Khristan jong ngi. Mynta baroh baroh ngi la ia rieh ha ki krem (lockdown), lada ngim don ia U Mynsiem Bakhuid, ngin sa iap op hangta. Ngi donkam ban kyndit bynriew bad ban wan sha U Trai sa shisien pat bad ban ong, "Trai nga donkam ia ka Second Wave jong U Mynsiem jong Me. Nga donkam ia ka Third Wave jong U Mynsiem Bakhuid jong Me". Lada ngi la ioh pdiang ia ka Second Wave, ngin thrang sa ia ka Third Wave bad kumta ter ter. Dei hangta ba ngi lah ban ieng ha kine ki sngi bakhadduh. Khlem U Mynsiem Bakhuid jong U Trai, ngin shu shah pynshat kynting ha ki waves jong ka pyrthei, ha ki waves jong u Soitan, ha ki waves jong u Corona virus.
U Apostol Paul u ong, "Bad to wat long phi kiba buaid da ka Waiñ, ha kaba don ka jingkhynwin, hynrei, to long kiba la dap da U Mynsiem" Eph 5:18.
Ka pyrthei ka don ha ka jingkhynwin bakhraw, ngi donkam shisha ban long kiba la dap da U Mynsiem, ym ban shu ia buaid ha kita ki jingkhynwin jong ka pyrthei.
Shen ngin sa rakhe ia ka Pentecost Sunday mynta u snem, hynrei wat mynta ruh to ngin pynkhreh ia la ka dohnud ban pdiang ia ka wave jong U Mynsiem Bakhuid ba un trei bad khih ha ngi sa shisien pat. Kumba u la khih bad trei ha ka sngi Pentecost, ai ba un khih bad trei ha ngi sa shisien pat. Ai ba ka Wave jong U Mynsiem Bakhuid kan sait, kan niad noh ia ka jingsheptieng, ia ka jingsngewsih, jingkhuslai, ia ka jingpang, jingshitom, ki jingeh jingjynjar bad ki bor jong u bymman.
To ngin wan pat sha U Trai, da jingkylla ka bamut bad ban ong, Trai ngi donkam ia U Mynsiem Bakhuid jong Me, ngi lah ngiah ia ki waves jong u Covid-19, ngi donkam mynta ia ka Wave U Mynsiem jong Me.
Lada ngi thrang bad ngi sliang shisha yn pyndap ia ngi ong ka ktien U Blei.
Ioannis 7:37-39, Te ha ka sngi ka bakhatduh, ka sngi ka bakhraw jong Ka Jingkhawai Niam, U Jisu u la ïeng bad u la pyrta, u da ong, “Lada uno uno ruh u sngew-sliang, ai ba un wan ha nga ba un dih ruh; jar u bangeit ha nga, kumba la ong Ka Jingthoh, ‘Ki wah um ba-im kin ïatuid noh na ka dohnud jong u." Amen
© Jester Mawlong | May 08, 2021 | 3:30 PM
Praise the Lord. Khublei shibun eh deacon iaka ktien U Blei. Ka ka long ka jingkyrkhu ka ba khraw. U Blei un dang iai ai shuh shuh ka jingstad ba phi lah ban pynmih shuh shuh ki article ban long ka jingkyrkhu ianga bad Ruh iaki ba bun
ReplyDeletePraise the Lord miss Phiba. Amen, khublei shibun ia ki jingduwai bad ai mynsiem jong phi. Nang iai kynmaw ha ki jingduwai jong phi ba U Blei un nang ai jingshai bad jingshemphang shuh ia ka ktien U Blei ba ngan nang lah ban iasam sha kiba bun. Na ka bynta ka burom U Blei. Amen
DeleteKa Lyer U Mynsiem Bakhuid ai kan beh jur ban beh pyndam syndon ia ka wave C-19 . Khublei shibun eh Dikon Jester Mawlong namar kane ka message. To nang ioh shuh shuh ki jingsngewthuh Jingshemphang ba ïar ba jylliew na U Mynsiem U Blei. Khublei
ReplyDeleteAmen. Ngi ngeit ba U Blei un trei sa shisien pat ha kine ki sngi bakhadduh. Khublei shibun ruh ia ka jingduwai jong phi. U Blei un kyrkhu
Delete