U Blei U long ka jaka rieh jong ngi

"U Blei u long ka jaka rieh bad ka bor jong ngi, ka jingïarap bahajan eh ha ka jynjar. Namar kata, ngan ym sheptieng, la ka kylla ka khyndew, bad la pynkhih ki lum hapdeng ka duriaw; la ki um jong ka ki kyrhuh bad ki khih, la ki lum ki win namar ka jingat jong ka." Selah. Salm 46:1-3

Intro: Ha kaba kum kane ka por ba ngi im, ngi donkam eh ban tip ba U Trai u long ka jaka rieh jong ngi, bad ym tang ka jaka rieh, hynrei U long ruh ka bor bad ka jingiarap ba hajan eh jong ngi ha ka por ka jingjynjar.

Ha ki por baroh ngi iohi ba U Blei u long ka jaka rieh ia la ki jong ki briew. Uwei u Nongrwai Salm hadien uwei pat ki iai pynbna bad ki phla ba U Blei jong ki u long ka jaka rieh, ka kut baskhem bad ka jingiarap ba hajan eh ha ka por Ka jingjynjar. Don napdeng jong ki kiba ia kynduh ia ka jingma na ki mrad khlaw ba kynsha, don kiba ia kynduh ia ki nongshun kiba thmu ban pyniap bad bamduh ia ki, bad kiwei kiwei ki jaid jingma, hynrei kumno U Trai u iada, u sumar bad u pyllait ia ki. Dei namar kata kadaw ki sngewthuh ba U Blei u long da shisha ka jaka rieh bad ka kut baskhem jong ki.

U David u la lait im na ki mrad khlaw ba kynsha, kum na u sing bad ka dngiem (1 Sam 17:34). U la iaid lyngba ia ka syrngiew ka jingiap ha kaba u Saul u la beh pyrshah ia u ban ioh pyniap, haduh ba u la hap ban phetrieh sha ki krem ki kroh, hynrei U Trai u la pyllait ia u wat na kaba kum kata ka jingiap. (1 Samuel lynnong ba 19; 21 & 22 ter ter). Dei namar kata, ha ka Salm 23:4 u rwai ia ka jingrwai da kaba ong, "Shisha, la nga ïaid ruh ïa ka them ka syrngiew ka jingïap, ngan ym sheptieng ïa ka basniew; namar me don ryngkat ma me bad nga: u diengduh bad u shanduh jong me, ki pyntngen ïa nga." Haba U Trai hi u donryngkat, ym don u briew uba lah ban ieng pyrshah. 

Ym tang u David, hynrei lada ngin peit ia kiwei ruh ki briew jong U Blei kum u Daniel u la lait im na ki sing ba shyrkhei ba la bret ia u ha krem ki sing. (Dan 6 lynnong). Nangta u Shadrak, Meshak bad Abednago kumno ba U Trai u la sumar ia ki na ka thylliej ding ba shyrkhei jong u syiem Nebukhadnessar (Daniel 3 lynnong). Peit ki synran bad ki Apostol U Jisu Khrist, kumno ba U Trai u la pyllait im ia ki, u la iada bad sumar ia ki na ka jingiap. (Pule na ki Kam ki Apostol).

Hooid ka jingiap kadei kaba U Blei u la buh ia u briew ba un iap, hynrei kynmaw ba u briew lane u ksuid um lah ban shim jubor ia ka jingim ki briew jong U Blei.

Dei namar kata ka daw, u Nongrwai Salm u ong, "....ngan ym sheptieng, la ka kylla ka khyndew, bad la pynkhih ki lum hapdeng ka duriaw; la ki um jong ka ki kyrhuh bad ki khih, la ki lum ki win namar ka jingat jong ka." Selah (Salm 46:2-3). 

Balei um sheptieng? Namar ba u tip ba U Trai u long ka jaka rieh jong u bad ba u briew lane u ksuid um lah ban leh eiei pyrshah ia u. Salm 118:6, "U Trai u ha ka liang jong nga; ngan ym sheptieng: u briew u lah ban leh aïu ïa nga?"

U Apostol Paul u ong, "Kumno te ngin ïa-ong ïa kine kiei kiei ruh? Lada U Blei u long na ka bynta jong ngi, uei uta u ban ïaleh bad ngi?" Rom 8:31. 

Yn nym don ba lah ban ialeh ia ngi, ban pyniap lane pynjot ia ngi katba ngi dang shong ha ka jaka rieh jong U Blei uba ha khlieh tam. Ka jingeh ka long ba bunsien ngi phet jngai na kata ka jaka rieh (ba long U Trai), dei hangta ngi klumar ka jingim, wan ka jingsheptieng, wan ka jingartatien, bad kumta ter ter. Hynrei lada ngi don hi ha ka liang jong U Trai, yn ym don ba lah.

Salm 91:1-16, "Uta uba shong ha ka jaka barieh jong U Bahakhlieh tam eh, un ïoh ïaineh hapoh ka jingkah jong U Badonbor baroh. Ngan ong shaphang U Trai , “U long ka jaka rieh jong nga bad ka kut jong nga; U Blei jong nga, ha uba nga shaniah.” Naba un pyllait ïa me na ka shangkhawiah jong u nongriam, bad na ka jingïapkhlam ba pynsniew. Un tap ïa me da la ki sner, bad hapoh ki thapniang jong u men ïoh rieh ïa lade: ka jingshisha jong u ka long ka stieh bad ka 'tiehbah. Men ym sheptieng na ka jingtriem mynmiet, lymne na u khnam ba her mynsngi; na ka jingïapkhlam ba ïaid ha ka ba-dum, lymne na ka jingpynjot kaba pynjot mynsngi. Ha syndah jong me shi hajar kin kyllon, bad shiphew hajar ha ka kti kamon jong me; hynrei, kan ym wan hajan jong me. Tang da la ki khmat men khmih, bad men ïohi ïa ka bainong jong ki bymman. Naba me, A Trai , me long ka jaka rieh jong nga! Me la pynlong ïa U Bahakhlieh tam eh ka jaka shong jong me; kan ym jia ei ei ka basniew ïa me, lymne kano kano ka jingïapthem kan ym wan hajan ka ïingjaiñ jong me. Naba un hukum ïa la ki angel shaphang jong me, ban sumar ïa me ha ki lynti jong me baroh. Kin rah ïa me ha la ki kti, ba ïoh men jynthut la ka kjat ha u maw. Men ïuh halor u sing bad u 'seiñpuh: ïa u sing samla bad ïa u bseiñ men ïuh roit hapoh sla'jat. Namar ba u la buh ïa la ka jingieit ha nga, namar kata, ngan pynim ïa u: ngan kyntiew sha jrong ïa u, namar ba u la ithuh ïa ka kyrteng jong nga. Un khot kyrpad ïa nga, nga ruh ngan phai ktien ïa u; ha ka jynjar ngan long lem bad u: ngan pyllait ïa u, bad ngan pyndonburom ïa u. Ngan pynhun ïa u da kaba slem ka rta, bad ngan pyni ha u ïa la ka jingpynim."

Paralok baieit, U Blei u dang long u juh, um pat shym la kylla, kumba u la long ka jaka rieh bad ka kut baskhem ha ki por mynbarim, u dang long ruh ka jaka rieh jong ngi mynta lada ngi jied ban shong ha kata ka jaka rieh jong U. Katba ngi dang buh ia ka jingieit bad jingshaniah jong ngi ha U, kine ki kular ki dang long valid na ka bynta jong ngi mynta ruh. 

To ngin ym da sheptieng eh ia kiei kiei kiba ngi ia kynduh ha ka jingim, kaei ba ngi iohi ne mad ha kine ki sngi, hynrei to ngin long khlain bad long shlur namar ba U Trai u long ka jaka rieh jong ngi. 

Ka jingkyntu shuh shuh ka long ba ha ka por ba ngi sngew sheptieng, to ngin phai sha ka Ktien U Blei, pule bad puson ha ka, peit ia ki kular na ka Ktien U Blei, namar ki jingkular jong U Blei baroh ki dang long hooid bad amen, lyngba ka jingngeit ha U Jisu Khrist. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 19, 2021