Ka Pentecost (Ka Bor bad ka Jingthmu jong ka)

KA PENTECOST

(Ka Bor bad ka Jingthmu jong ka)

Intro: “Pentecost” ka mut “Kaba sanphew" lane "Ka sngi ba Sanphew” Ka thew ia ka jinglehniam jong ki Jiw kaba ju pynlong sanphew sngi hadien ka sngi ba ar jong ka niam ka jinglait. La khot ruh 'Ka jingkhawai niam ki taiew' (feast of weeks) Eksodos 34:22; Deut 16:10, bad ka Jingkhawai niam jong ka jingot (feast of the Harvest) Eksodos 23:16. Ka Pentecost ka dei ruh ka sngi jong ka jingainguh na ka bynta ban pynkut ia ka jingot. Ban iaroh ia U Blei namar ka jingaiei bad jingkyrkhu kaba u la ai ha ki ka rep ka riang bad ka jingot kaba bha. Kata ka dei ka Pentecost katkum ki Jiw.

Ngin ia peit pat ia ka Pentecost ha ka Testament Bathymmai. Ha ka Testament Bathymmai kane Pentecost ka ia tyngkhuh ruh bad ka jingdap Sanphew sngi hadien ka jingmihpat U Trai Jisu. (Naduh ka sngi jingmihpat U Trai Jisu haduh ba la rong noh ia U sha bneng ka long 40 sngi (Kam 1:3). Bad naduh ba la rong noh ia U sha bneng haduh ka jingtheh noh ia U Mynsiem Bakhuid ka long 10 sngi (v.5). 40+10=50.) Bad dei ha kane ka sngi, katba ki synran ki dang iaseng lang ha ka kamra ba haneng, la wan hiar U Mynsiem Bakhuid hapdeng jong ki, bad U la shong halor uwei pa uwei na ki. Kumta ki Khristan haduh mynta ki rakhe ia kane ka sngi ba sanphew hadien ka jingmihpat U Trai ban kynmaw ia ka jingwan hiar U Mynsiem Bakhuid ha ki 120 ngut ki synran U Jisu, bad haduh mynta ia ka sngi ba wan hiar U Mynsiem Bakhuid la tip ia ka kum ka sngi Pentecost.

Kaei ka jingthmu jong ka Pentecost?

1. Ban pyndep ia ka jingphah U Trai Jisu. 

Ngi pule ha ka gospel u Markos 16:15, U Jisu u ong ia ki synran, “To leit sha ka pyrthei baroh, bad to ïalap ïa ka gospel ha ki bynriew baroh..." Kata ka dei ka jingphah U Trai, bad U Jisu u tip ba ki synran jong u kin nym lah ban pyndep ia kata ka jingphah bakhraw tang da ka bor jong ki, kumta u la ong ia ki ba kin iai ap ha Jerusalem tad ynda yn pynkup ia ki da ka bor na bneng (Loukas 24:49; Kam 1:4). U ong shuh shuh "Hynrei, phin ïoh diang ïa ka bor, ynda la wan U Mynsiem Bakhuid ha phi; bad phin long ki nongphla ïa nga ha Jerusalem, bad ha Judia baroh bad ha Samaria, bad haduh bakut ka pyrthei.” Ki Kam 1:8

Ki synran U Jisu ki la kohnguh bad ki la iai ap ha Jerusalem haduh ka sngi Pentecost bad la pynkup ia ki da ka bor na jrong, bad naduh kata hi ka sngi ki la ialap ia ka gospel jong U Trai Jisu, bad ka jingot kaba khraw ruh ka la long ia ki mynsiem bakordor sha U Trai.

* Kam 2:41:42, U Petros u la ialap, bad kumba 3000 ki mynsiem ki la kylla bamut bad pyniasoh sha ka Balang. 

* Kam 4:4, U Petros & U Ioannis ki la ialap, 5000 ki mynsiem ki la kylla bamut bad ngeit ia ka gospel.

* Kam 5:14, Ki briew shynrang bad kynthei ki kylla kabamut, bad la pyniasoh sha ka Balang.

* Kam 8:4-5, U Philip u la ialap, ki briew kiba bun ki la kylla kabamut bad ngeit ia U Jisu.

Nangta ter ter ngi iohi ki Apostol ki la leit kylleng ban ialap, bad da ki hajar hajar ki mynsiem bakordor la pynim da ka gospel kaba ki ialap, wat haduh kine ki sngi.

2. Ka ai jingshlur bad jingstad ban phla ia U Trai.

U Petros mynba um pat mad ia ka Pentecost, u la len ia la u Kynrad haduh laisien namar ka jingsheptieng (Markos 14:66-72). Hynrei haba u la mad ia ka Pentecost, um sheptieng shuh, wat haba la mana pyrshah ba ym bit shuh ban dang ialap ia ka gospel U Jisu Khrist, hynrei u la ong pynban ba ngi dei ban kohnguh ia U Blei khamtam ban ia u briew (Kam 5:29). La pyndap ia ki baroh da ka jingshlur (Kam 4:31). U Apostol Paul ruh haba u la mad ia ka bor jong U Mynsiem Bakhuid um shym la sngew lehrain ban ialap ia ka gospel (Rom 1:16). U la kyntu ruh ia u Timothy ba um dei ban sngew lehrain ban kren ia ka Ktien U Blei, namar ba U Blei um shym la ai ha ngi ia ka mynsiem ka jingsheptieng (2 Tim 1:7-8).

Mynshuwa ki long kiba bieit, ba khlem jinghikai (illiterate), kiba sheptieng, hynrei haba ki la mad ia ka bor jong ka Pentecost la pyndap ia ki da ka jingstad, ka jingshlur, ki la pynkylla khongpong ia ka pyrthei. (Kam 4:13).

3. Ka pynlah ia ki bangeit ban shah shitom na ka bynta U Khrist.

Ki synran U Jisu katba kim pat mad ia ka Pentecost, kim lah ban shah shitom na ka bynta U Trai wat khyndiat ruh. Ha ka por ba U Jisu u leit ban duwai ha Getsemane ki synran jong u ki la iohthiah, kim lah ban shah lem bad u, haduh ba U Jisu u la ong ia ki, “Wa! phim lah ban ïa-ap lem bad nga shi por? To sharai, to duwai ruh, ba phin ym leit shapoh ka jingpynshoi. Ka mynsiem shisha ka smat, hynrei, ka doh ka tlot.” Mathaïos 26:36-46. Hynrei ynda ki la mad ia ka Pentecost, baroh ki la kloi ban shah shitom na ka bynta U Trai. Ngi pule ia ka story ki synran kumno ka jingim ba ki im, bad kumno ka jingiap ba ki iap, kam long satia kaba suk. Hynrei watla katta ruh, kata ka jingmad jong ki ka la pynlah ia ki ban shah shitom bad ban iaineh haduh ka jingiap. Ki la kyntu ruh ia ki bangeit ba ki dei ban nang (learn) ban shah shitom na ka bynta U Khrist. (1 Petros 4:12).

4. Ka pynkylla ia ka jingim shimet jong u briew.

Ka Pentecost ka don ka bor kaba lah ban pynkylla ia ka jingim bad jinglong jong u briew. Ngi iohi ia kane ka bor jong ka Pentecost kumno ba ka la pynkylla ia ka jingim jong u Petros. Mynshuwa, mynba um pat mad ia ka Pentecost u long u briew uba domriang lehse nga lah ban ong. Ngi pule shaphang jong u ha ka gospel u Ioannis 18:1-10, ngi shem mynba ki shipai ki la wan ban kem ia u Jisu, u Petros wut wut u sei da ka waitlam bad u la mait noh ia ka skhor jong  u Malkhos, u shakri jong u rangbah lyngdoh. Hynrei hadien ba u la mad ia ka Pentecost la pynkylla ia ka jingim jong u, na kata ka jinglong bym lah ban shah, ka mynsiem jong ka jingpynhiar kput, sha ka jinglong ba kloi ban shah na ka bynta U Khrist, da kaba u la kyntu ruh ia ki para bangeit ba ki dei ban leh kumjuh. (1 Petros 4:12).

Kane ka dei ka Pentecost. Ka Bor bad ka Jingthmu jong ka.

Paralok bad ki bangeit baroh, ngi donkam sa shisien pat ia ka Pentecost ha ka jingim jong ngi ba ngi lah ban pyndep ia ka jingphah jong U Trai ban ialap ia ka gospel bad ban pynim ia ki mynsiem bakordor. Ngi la iohsngew ia ka jinghikai bad jingkyntu na ka por sha ka por, bad ka jingkhot ban ialap ia ka gospel, ban phla ia U Trai. Ngi lah sngewthuh eh, hynrei bunsien ngim lah ban leh ne pyndep. Ngi donkam ia ka bor jong ka Pentecost, Ka bor jong U Mynsiem Bakhuid ba ngi lah ban leh ia kata. 

Ai ba ka Pentecost kan pyndap ia ngi da ka jingstad bad jingshlur ban phla i'U Trai. 

Para bangeit bad ki paralok baroh, lehse phi don eh ka jingthrang ban phla i'U Trai, hynrei phim don jingshlur, phi don eh ka jingangnud ban ialap, hynrei phim don jingstad, nga kyntu ia phi, thrang bad sliang ia ka bor jong Ka Pentecost ha ka jingim jong phi, sliang ia ka jingpynkup bor U Mynsiem Bakhuid. U Jisu u ong ia uba sliang, yn pyndap. 

Isaiah 44:2, "Naba ngan theh um ha uta u basliang, bad ki wah duid ha ka khyndew barkhiang: ngan theh ïa la U Mynsiem halor u symbai jong me, bad ïa la ka jingkyrkhu halor ki khun ki ksiew jong me: "

Ngi donkam ia ka Pentecost khnang ba ngi lah ban shah shitom lem bad U Khrist, namar haba ngi peit ia kane ka por kaba ngi im mynta ngi ba ka lah nang dawa ba ngin kham shah shitom shuh shuh na ka bynta U Khrist. Ngim lah ban shu khmih lynti sah ba ka jingshakri Blei kan shu long beit kum ka jingthiah 'tiewkulab' (bed of roses kumba ong ka Ktien phareng), hynrei ka lah dei ka por ban train up ia lade na ka bynta ban shah shitom na ka bynta U Khrist bad ka gospel. Lada ngim lah ban shah shitom, ngim lah ban iaineh haduh ba kut, ngin nym ioh satia ia ka pansngiat.

Ai ba ka Pentecost sa shisien pat kan long ha ngi. U Blei un kyrkhu. Amen 🔥

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 20, 2021