Haba u Diengduh jong u briew u kylla long u Diengduh jong U Blei

Intro: U Diengduh udei uta uba ki briew ki ju pyndonkam ialade ha ka ban iarap lane ban kyrshan ia ki. Khamtam ki nongap langbrot bad ki riew tymmen. Uta u dei u Diengduh.

Ngin ia peit shaphang une u Diengduh na kaei kaba la jia ha ka jingim jong u Moses da kaba ngin ia peit na ka kitab Eksodos.

U Moses u dei u nongap jingri uba ju ap (sharai) ia ki jingri jong u kthaw kurim jong u. (Esodos 4:1). Ha kawei ka sngi katba u dang ap ia kita ki jingri ha kawei ka lawbniap, bad katba u dang ialam ia kata ka kynhun jingri, u angel U Trai u la mihpaw ha u Moses napdeng kata ka law lynnong (v.2) bad na kata ka law lynnong U Trai u la khot ia u Moses (v.4). Lada ngi pule ter ter ngi iohi ia ka jingiakren hapdeng jong U Blei bad u Moses, ha kaba u Moses u la ai daw da kumne da kumtai, wat la U Blei u la batai bad pynshai ia u. (v.11 ter ter; 4:1). Hadien kata U Blei u la kylli ia u Moses, "Kaei kata kaba ha ka kti jong me? (v.2) bad u Moses u la jubab, "U Diengduh". 

Ban pynlyngkot ia ka jingiathuh, U Blei u la ong ha u ba un shim ia uta u Diengduh bad da uta u Diengduh un leh ia ki kambah bad ki kam phylla.

Eksodos 4:17 "Men shim ruh ïa une u diengduh ha ka kti jong me, da uba men sa leh ïa ki dak phylla."

Ha ka Eksodos 4:20 la iathuh ba uta u Diengduh jong u Moses naduh kata ka por u la kylla long noh u Diengduh jong U Blei.

"Bad u Moses u la shim ïa la ka tnga bad ïa la ki khun shynrang, bad u la buh ïa ki halor ki kadda, bad u la leit phai pat sha ka ri Ijipt: bad u Moses u la shim ïa u diengduh jong U Blei ha la ka kti."

Haba u Moses u la kohnguh bad u la leit, ngi iohi da uta u Diengduh u la leh shibun ki kambah. 

#-1. Uta u Diengduh, u la kylla bsein bad uta u bsein (Diengduh jong u Moses) u la nguid noh ia ki bsein jong ki nongleh byrtong jong U Pharaoh (Eksodos 5:8-12).

#-2. Da uta u juh u Diengduh sharai masi u la tied ia ka wah Nile bad kata ka wah ka la kylla snam, bad ym tang ka wah hynrei haduh ki khiew um jong ki Ijipt baroh ka la kylla snam. (Eksodos 7:14-21)

#-3. Da uta u Diengduh, la phah ia ki jakoid ha baroh ki pung, ki wah bad wat haduh ki ïing jong ki Nong Ijipt baroh la dap sa tang da ki jakoid, naduh jingthiah haduh ki khiew ja khiew doh la dap da ki jakoid suda. (Eksodos 8:1-15)

#-4. Da uta u Diengduh, la pynkylla jynreiñ ia ka dewmet baroh, bad kita ki jynreiñ ki la boi bad briew bad mrad. (Eksodos 8:16-17)

#-5. Da uta u Diengduh, la pynhap ia u phria, u pyrthat bad ka ding pyrshah ia ki Ijipt bad briew bad mrad bad jingthung bad jingtep jong ki. (Eksodos 9:22-26)

#-6. Da uta u Diengduh, la shoh ia ka Ri Ijipt da ki puit haduh ba kita ki puit ki la kiew klumar, bad ki la pynjynjar ia ki Nong Ijipt, bad ki la bam lut ia ki jhur ki jhep baroh, bad ki la tap lup ia ka Ijipt baroh kawei haduh ba la pyndum ia ka Ri Ijipt baroh kawei. (Eksodos 10:1-15)

#-7. Da uta u Diengduh, u la pynkad arliang ia ka duriaw basaw. (Eksodos 14:15-22)

#-8. Da uta Diengduh, u la tied ia u mawsiang ha kaba la mih ka umdih ba ki khun Israel kin ioh ban dih ha kata ka ri khlaw. (Eksodos 17:1-7)

#-9. Da uta u Diengduh hi u Diengduh jong U Blei, u la jop thma pyrshah ia ki Amalek. (Eksodos 17:8-16)

Kine ki dei kiba ngi iohi ba U Blei u lah ban leh lyngba uta u Diengduh jong u Moses. Wat la u long tang u Diengduh jong u briew, hynrei haba la aiti ha U Blei, uta u Diengduh u la kylla long u Diengduh jong U Blei bad uba donbor.

Nga kwah ban pyniadei ia kane ka jinghikai bad ka jingim jong ngi. Lehse ngi sngew ba ka jingim jong ngi ka long tang kum u Diengduh ngim da sngew larkam eh, ngi sngew ba ngim da lah eh ban leh shibun kiei kiei lane ngi sngew ba ngim long eiei. Hynrei nga ong ia phi lada phin aiti sha U Trai, U Trai u lah ban pyndonkam ia phi. Lada U lah ban pyndonkam ia u Diengduh jong u Moses uba long tang u dieng, katno tam lei un pyndonkam ia ngi kiba long ki jingthaw ba kordor jong u.

U Blei u lah eh ban pyndonkam ia phi lada phi mon ban aiti ialade ha ki kti jong U. Wat nym buhpud (underestimate) ialade, sdang ban aiti bad phin iohi ia ka jingpyndonkam jong U Trai.

** U la pyndonkam ia u Jeremiah watla u long tang u khynnah rit. (Jer 1:4-7)

** U la pyndonkam ia u David watla u long tang u khynnah ap langbrot. (1 Sam 17:15)

** U la pyndonkam ia Moses watla u long u ba thlun. (Eksodos 4:10)

** U la pyndonkam ia u Gideon watla u long uba duk tam. (Nongbishar 6:15)

** U la pyndonkam ia ki synran watla ki long kiba bieit (illiterate). (Kam 4:13)

** Un pyndonkam ruh ia phi. Hallelujah!

Jingduwai: Trai nga aiti ialade ha ki kti jong Me, shim ia nga kumba nga long, pyndonkam ia nga na ka bynta ka burom jong Me. Me la pyndonkam ia u Diengduh jong u Moses, Me la pyndonkam ia kiba thlun, ba duk bad ba bieit, Men pyndonkam ruh ia nga. Ha ka kyrteng U Jisu nga duwai, Amen.

To U Blei un kyrkhu ia phi.

© Jester Mawlong | May 31, 2021