Ka jingshisha kan pyllait ia phi

"...bad phin ïoh ithuh ïa kata ka jingshisha, bad kata ka jingshisha kan pyllait noh ïa phi.” ÏOANNIS 8:32 KHB

Kane ka dei ka jingkren jong U Trai Jisu, u ong haba ngi ithuh ia ka jingshisha, kata ka jingshisha kan pyllaitluid ia phi.

Ka pyrthei ka don ha ka jingshah teh mraw ba laiphew jaid, ka donkam ia ka jingpyllait na kata ka jingshah teh mraw. La ka long na ka pop, la ka long na ka jingmane bleithaw, la ka long na ka jingsheptieng ne na ka jingpang jingshitom, bad kumta ter ter. Bad ngi tip ba ym don ba lah ban pyllait ia ka, dei tang ka jingshisha, haba ngi ithuh ia ka jingshisha, hangta ka jingpyllait kan wan.

Kaei kane ka jingshisha? Ka jingshisha ka kren ia U Jisu hi. Ha ka dkhot ba 36 u ong, "Namar kata, lada U Khun un pyllait noh ïa phi, phin long kiba la lait noh da shisha."

Ioannis 14:6, U Jisu u ïathuh ha u, “Nga uba long kata ka lynti, bad ka jingshisha, bad ka jingim de: ym don uba wan ha U Kpa, hynrei, tang da nga."

Haba ngi ithuh (ngeit) ia U Jisu u ba long ka jingshisha, kata kan pyllait ia ngi na kano kano ka jingshah teh mraw kumba nga la ong haneng.

Ka jingkylli ka long kumno ka pyrthei kan ioh ithuh ia ka jingshisha?

Ka jubab ka long, donkam ia kita kiba la tip (la ngeit) ia ka jingshisha (ba long U Jisu Khrist) ban iathuh lem ia kata ka jingshisha sha ka pyrthei. 

U Apostol Paul u ong ha ka shithi sha ki Nong Rom "Kumno te kin ïakhot kyrpad ïa uta ha uba kim shym la ngeit? kumno de kin ïoh ngeit ha uta shaphang uba kim shym la ïohsngew? kumno de kin ïohsngew khlem uba ïalap? Rom 10:14

Ka long ruh ha ka juh ka rukom, kumno kin ioh tip ia ka jingshisha, lada ym don ba iathuh lane ba nud ban kren ia ka jingshisha.

Lada ngi peit ha ka Gospel u Ioannis ngi iohi U Jisu u ban bad iai ban "Nga iathuh haphi ia ka jingshisha" (I tell you the truth, I tell you the truth….) 

Ngi donkam kyrkieh ban ieng bad ban kren, ban iathuh ia ka jingshisha sha ka pyrthei.

Kynmaw ruh haba ngi kren ia ka jingshisha ne ngi iathuh ia ka jingshisha, kin don ruh ki ban kren beiñ, rkhie beiñ, wat ki ban pynshitom beiñ ruh.

Ngi iohi ha ka Bible ia kaei kaba la jia ia ki Nongiathuhlypa, ia ki synran U Jisu bad ia ki Apostol bad ki bangeit kumjuh, haba ki kren ia ka jingshisha, la kren beiñ, la rkhie beiñ, bad la pynshitom beiñ ruh ia ki. Hynrei ngim dei ban sngewphylla. U Jisu u lah dep iathuhlypa ba kin sa leh kumta.

MATHAÏOS 5:10‭-‬12

“Suk kiba ïoh pynshitom na ka bynta ka hok: naba jong ki, long ka hima ki bneng. “Suk ma phi haba kin ïakrenbeiñ, bad pynshitom ïa phi, bad ba kin ong ki ktien bymman baroh ruh ïa phi na ka bynta jong nga, haba ki shu lamler. To ïakmen, to ïashadkmen ruh: namar ka bakhraw ka bainong jong phi ha ki bneng: naba kumta ki la ïa-pynshitom ïa ki nongïathuhlypa kiba la mynshuwa jong phi.”

Para bangeit, to ngin long shlur ban kren bad iathuh ia ka jingshisha. Kiba shahshkor kin ioh jingpyllait, ki bym shahshkor kin iai long ki mraw, bad kin kren beiñ ruh ia ngi. 

Pynban lada ngim kren ne iathuh ia ka jingshisha, ngin hap ban ai jingkhein ha ka sngi bishar.

To U Blei un kyrkhu bad ai jingshlur ia phi. Amen

© Jester Mawlong | May 30, 2021 | 8:00 PM