Ka Jingiap! Ka Jingiap! Ka Jingiap! Shaei ngin leit hadien ka jingiap?

Ka Jingiap! Ka Jingiap! Ka Jingiap!

Ha kine ki sngi ngi la shu iohsngew tang shaphang ka khubor jingpang bad jingiap.  Man ka sngi la shu ia ñiew iap katta katta ngut. Lah syriem kum ki briew ba ju thoh tim man ka sngi lah shu ia ap katno u number ban mih lashai. Haduh ba ka la pynpar ñiangkhriat ia kiba bun. Hynrei ngi la ju pyrkhat mo "SHAEI NGIN LEIT HADIEN KA JINGIAP?"

Lehse phi lah ban ong ohhhh une u bah uba bieit, balei u kylli sa rat ia kata. Lehse don ruh ki ban jubab ba hadien ka jingiap u briew un leit sha jingtep. Don ruh lehse ki ban kren shutia ban ong ba u briew ynda u iap, un kylla skain kylla thapbalieh. 

Nga kwah ban iathuh ia phi ba kata kam dei satia ka jubab kaba dei biang. Hynrei ka jubab kaba dei ka long ba u briew hadien ka jingiap un leit sha ka jaka shongneh kaba bymjukut, la ka long sha Bneng ne sha Dujok.

Ka Bible ka iathuh ia ngi na ka shithi sha ki Nong Hebru 9:27, "Te kumba la buh ha ki briew ban ïap tang shi sien, bad hadien kane ka wan ka jingbishar."

Uwei pa uwei u briew u hap ban iap, la kadei uba riewspah ne baduk kumjuh. Don kiba iap dang khynnah, don kiba iap samla, don ruh kiba iap tymmen, bad kumta ter ter, bad hadien ka jingiap kan wan ka jingbishar, ong ka Ktien jong U Blei.

Bad hangta shimet shimet ngi hap ban ieng bad yn bishar ia ngi katba kum ki jingleh jong ngi, la bha la sniew. 2 Kor 5:10 "namar ka dei ban pynïeng ïa ngi baroh ha khmat ka jingshong bishar U Khrist, ba uwei pa uwei un ïoh pdiang ha lade ïa kita kiei kiei ruh ba la leh ha ka met jong u, katba kum kita ba u la leh, la bha la sniew."

Ynda haba la dep ban bishar, kat kita kiba la leh bha, ka bynta lane ka jaka shong neh jong ki kan long ka Bneng, bad kat kiba leh sniew ka bynta lane ka jaka shong neh jong ki kan long ka Dujok ding bymjukut.

* Ka Bneng ka dei ka jaka kaba dap da ka jingsuk, jingkmen, kaba hangta ym don jingpang, jingiap, jingsngewsih ne khuslai shuh. Ka dei ka jaka kaba U Blei u la pynkhreh kyrpang ia la ki briew jong U.

* Ka Dujok kadei ka jaka ba dap da ka jingkordit, ka jingbabe, ka jingkhuslai bad ka sngewsih junom la junom. 

Pule na ka Bible gospel u Loukas 16:19-31 shaphang "U Riewspah bad u Lasaros" Hangne la batai shaphang ka jinglong ne ka dur jong ka Dujok, kumno ba la pynkordit ia uta u riewspah ha kata ka thylliej ding.

Ka jingleit sha bneng ne sha dujok kam dei satia ka jingjied jong U Blei, iano ban phah sha Bneng bad iano ban phah sha Dujok. U Blei um kwah satia ia u briew ba un leit sha dujok. Hynrei ka dei ka jingjied jong u briew hi. 

Ka jingkylli mynta ka long, ïano ngi jied? Ngin jied ia ka bneng ne ka dujok?

Lada ngi jied ban leit sha bneng, ngi hap ban leh ia ka babha, da kaba ngeit bad pdiang ia U Jisu ha ka dohnud jong ngi.  Ym don da kawei pat ka lad ne ka lynti. 

U Jisu u ong “Nga uba long kata ka lynti, bad ka jingshisha, bad ka jingim de: ym don uba wan ha U Kpa, hynrei, tang da nga." Ioannis 14:6

Shuh na Ki Kam ki Apostol 4:12 ka ong, "Naba ym don ka kyrteng ba la ai hapoh ka bneng da kaba ka dei ba yn pynim ia ngi" Ban pynim ia ngi dei tang kaba ngeit ha U Trai Jisu Khrist.

Rom 10:9-10, "Ba lada men phla shynna da la ka shyntur ïa U Jisu, ba u long U Trai; bad men ngeit ha la ka dohnud, ba U Blei u la pynmih pat ïa u na ki baïap, yn pynim ïa me. Namar da ka dohnud keiñ, u briew u ngeit ïa ka ban ïoh ïa ka hok; bad da ka shyntur keiñ, ba phla shynna ïa ka ban ïoh ka jingpynim."

Mynta ka shong haphi iano phin jied, ia ka bneng ne ka dujok? 

Nga kyntu ia phi, jied ia ka bneng da kaba ngeit mynta ia U Jisu Khrist. Pdiang noh ia U mynta ha ka dohnud jong phi. U Blei um mon satia ia phi ban leit sha Dujok hynrei u kwah ba baroh ngin ioh ia ka jingim ba bymjukut kaba long ka Bneng.

Ioannis 3:16-18, “Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut. Naba U Blei um shym la phah ïa la U Khun sha ka pyrthei ba un pynrem ïa ka pyrthei, hynrei, ba yn pynim ïa ka pyrthei da u. Uta uba ngeit ha u yn ym pynrem; hynrei, uta u bymngeit u la rem lypa, naba um shym la ngeit ha ka kyrteng U Khun U Blei ba la kha marwei."

Ym dei satia ba U Blei un pynrem iaphi, hynrei lada ngim ngeit ia U Jisu, kata ka jingbymngeit hi kan pynrem ia u briew. Dei namar kata ka daw u briew ynda u poi ha Dujok, un nym kynnoh iano iano, hynrei un shu babe ialade hi... Ah balei ba ngam ngeit ia ka jingialap uto u bah, ah balei ngam pdiang ia U Jisu, bad kumta ter ter... Balei, Balei, Balei.... Kumba long u Riewspah ynda u poi ha dujok.

Paralok baieit, shuwa ba ka jingbabe kan lap ia phi, balei phim jied noh ia U Jisu mynta ha ka jingim jong phi. Pdiang bad ngeit noh ia U, iehnoh ia ki pop baroh. Wan sha U kumba phi long, U Jisu u dang khot ieit ia phi bad un pynim ia phi. Amen

* SHARE LEM SHA KIWEI PAT RUH.

© Jester Mawlong | May 26, 2021