“.....hynrei, u bahok un ïoh im da la ka jingngeit. Habakkuk 2:4
Ka jingngeit ka long tang ma ka ka lad ba uba hok un ioh lait im, ym don da kawei pat. Ia kane la iai ban da ki briew jong U Blei ha ka Bible na ka por sha ka por. Phi lah ban pule ha kine ki dkhot - Rom 1:17; Gal 3:13; Heb 10:38).
Ha ka por jong u Noah dei tang ka ïinglieng ka ba lah ban pyllait im ia u bad ka ïing jong u na ka jingshlei um. Ha ka por jong u Lot dei tang kaba phet iap sha Soar kaba long ka lad ban ioh lait im na ka ding. Hynrei na ka bynta jong ngi dei tang ka jingngeit kaba long ka lad ba ngin ioh im, ym don da kawei pat.
Ban ioh lait im ka mynsiem, donkam ka jingngeit, ban ioh im ha ka doh (met) ruh donkam ka jingngeit. Ha ki liang baroh, uba hok u hap ban iai im da ka jingngeit. Ban ngeit skhem tang ha U Blei, ba u long uba lah ban pyllait im ia ngi.
Ngin ia peit shuh shuh halor kane ka bynta.
1. Ka jingngeit ban ioh lait im ka mynsiem: Ki hukum, ki niam ki rukom kim lah satia ban pyllait im ia ka mynsiem jong ngi na ka jingpynjot ba shyrkhei ka dujok, Ka Bible ka iathuh shai ia ngi ba dei tang ka jingngeit - Ioannis 3:16-18; Mar 16:16). Shuh shuh ngi iohi ha ka kitab Ki Kam ki Apostol 4:12 ka ong ba ym don jingpynim hano hano ha uwei pat lait tang kaba ngeit ha U Jisu u Khun jong U Blei. Haba ngi ngeit ha ka kyrteng U Jisu, dei hangta ngin ioh ia ka jingim bymjukut, dei hangta ka mynsiem jong ngi kan ioh lait im na kata ka jingpynjot jong ka dujok ding ka ban sa lap ia ka pyrthei.
2. Ka jingngeit ban ioh lait im ha ka met: Ngi im ha ki sngi ha kaba kat shaba phai ngi iohi tang ia ka jingduh jingkyrmen bad tang ka jingiap kaba ap ia u briew. Lada ngin phai dien khyndiat ia kaei kaba ngi mad mynta ha kane ka jingwan u Corona virus. Ha kaba sdang ki briew ki pyrkhat ba da kaba khangdam (lockdown) kan pynkut ne pynduh ia une u khniang jingpang, hynrei kam long satia kumta, ki briew ki pyrkhat da kaba stock lypa ia ki marbam mardih kan iarap ban lait im na kane ka khlam, hynrei mynta ngi iohsngew ba ka stock ruh ka la duna, ki briew ki pyrkhat sa tang ka oxygen ka ban iarap ban pyllait im ia ki briew ha kaba kum kane ka jingwan jia jong kane ka khlam, hynrei mynta ngi iohsngew ba wat ki oxygen ruh ki lah sdang ban duna, tip sa katno kin dang neh. Nangta ki briew lane ki riewstad ki ong mynta sa tang ka vaccine ka ban iarap ne pyllait im ia u briew, hynrei tip, kane ruh katno ka lad ban ai ka assurance?
Paralok baieit, wat nym buh ia ka jingshngaiñ bad jingshaniah jong phi tang ha kita ki stocks, ki oxygen, ki vaccine, ha ka sorkar lane ha uno uno u riew spah, hynrei to ngin buh ia ka jingngeit, ka jingshaniah bad ka jingkyrmen jong ngi ha U Blei. Dei sa tang ka jingngeit kaba long ka lad ba khadduh bad ba bha tam ba ngin kyrmen ha kaba kum kane ka por, lym kumta, ym don lad shuh da kumwei pat.
U Nongrwai Salm u ong, "Ngan khmied ïa la ki khmat sha ki lum: nangno kan wan ka jingïarap jong nga? Ka jingïarap jong nga ka wan na U Trai , uba la thaw ïa ka bneng bad ïa ka khyndew." Salm 121:1-2
To ngin ong kumba u Nongrwai Salm u ong, Ngi ngin shaniah tang ha U Trai. Salm 20:7, "Don kiba shaniah ha ki kali, kiwei pat ruh ha ki kulai: hynrei, ngi ngin shaniah ha ka kyrteng U Trai U Blei jong ngi."
To ngin nang pynkhlain ia ka jingngeit bad jingiadei ba im jong ngi bad U Blei. To ngin nym leh sting, leh jngai na U Trai, namar dei sa tang ma U bad ka jingngeit ha U ka lad ban ioh lait im met bad mynsiem.
U Blei un kyrkhu ia phi lyngba kane ka jingthoh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 06, 2021 | 10:14AM
Comments
Post a Comment