Ka bainong ka pop ka long ka jingiap

"Namar ka bainong ka pop, ka long ka jingïap; hynrei, ka jingaiei ka jong U Blei, ka long ka jingim bymjukut da U Khrist Jisu uba U Trai jong ngi." Rom 6:23

Ka Bible ka ong ba ka bainong ka pop ka long ka jingiap. Hangne ka don ka kyntien kaba ong, "Ka Bainong". Ka bainong ka dei kata kaba ki briew ki ioh haba ki trei ne leh eiei. Ki nongbylla ha la ki jong ki jong ki kam ba ki trei ki ioh la ka bainong. Bad haba u briew u pdiang ia ka bainong barobor u pdiang da ka jingkmen. Hynrei ka don ruh ka bainong kaba u briew u hap ban pdiang da ka jingsngewsih bad jingbabe, bad kata ka dei ka bainong jong ka pop, kaba long ka jingiap. 

Ka Bible ka iathuh ia ngi ba uwei pa uwei uba leh pop, u leh ia ka ban ioh ia ka bainong jong ka jingiap ha lade. Esekiel 18:20; “Ka mynsiem kaba leh pop kata ka ban iap”. Kynmaw ba ngim lah ban kheiñ shngain ia la ka jong ka jingim, tangba i mei i pa ne hynmen para ki dei kiba ngeit, ne ki long ki pastor ne nongialam Balang. Ka Bible ha katei hi ka dkhot ka ong ba, "U khun um lah ban kit ia ka pop jong u kpa, lane u kpa um lah ban kit ia ka pop jong u khun." Shimet shimet u hap ban kit bad ban pdiang ia la ka bainong na U Blei, kaba long ka jingiap.

Ka jingiap hangne ka kren ia kata ka jingiap jong ka mynsiem kaba long ka jingpyniakhlad bymjukut bad U Blei, ha kaba yn bret noh ia uta u briew sha dujok, ha kaba hangta yn pynkordit bymjukut, bymjukut, bymjukut bad ym kut shuh.

Haba u briew u poi ha dujok, un nym kynnoh shuh iano iano hynrei un shu babe ialade, balei ba ngam kylla bamut, balei ba ngam ngeit ia U Jisu, balei ba ngam ngeit ia kaei ba la ialap, bad kumta ter ter, sa tang ka jingbabe. 

Ngi iohi ia ka nuksa na ka Bible kaba iathuh ia ngi shaphang u riewspah uba la iap bad poi sha dujok, ha dujok u la khmied la ki khmat bad hangta la pynkordit ia u bad u la babe junom. (Loukas 16:19-31)

Lehse phi lah ban ong, Oh nga te ngam ju leh pop ngam donkam ban kylla bamut. Hynrei ka Bible ka ong, “Ba lada ngi ong ba ngim leh pop ngi shukor ialade” 1 Ioannis 1:8

Balei? Namar ba ia u briew hi baroh la pun bad la kha ha ka pop, ong ka ktien jong U Blei. (Salm 51:5) Naduh ba u Adam u la leh pop, ka pop ka la bsut ha ki bynriew baroh phar. Dei namar kata ka daw ka ktien U Blei ka ong, “Ym don uba hok, em ym don wat uwei ruh…” (Rom 3:10-12) Watla ngi leh hok katba leh hok, ka pop ka don beit hapoh u briew.

Isaiah 64:6, ka Ktien U Blei ka ong, “Ki hok jong ngi ki long tang kum ka jaiñ babit tngit lane ka syrdep jot” ka bym don dor eiei ruh em ha khmat jong U Blei. Bad lada ngi iap ha ka pop, ka bainong ba ngin ioh ka long ka jingiap sha dujok.

Ka jingkylli ka long kumno ngin lait na kane ka pop bad kane ka jingiap jong ka dujok?

Ka jubab ka long, tang ban kylla bamut, ngeit bad pdiang ia U Jisu ha ka dohnud jong ngi. Ym don da kawei pat ka lad. U Apostol Petros haba ki briew ki kylli ia u kumno ban leh ban lait na kata ka pop bad ka jingiap, u ong ia ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid." Ki Kam 2:38 

Rom 10:9-10, "Ba lada men phla shynna da la ka shyntur ïa U Jisu, ba u long U Trai; bad men ngeit ha la ka dohnud, ba U Blei u la pynmih pat ïa u na ki baïap, yn pynim ïa me. Namar da ka dohnud keiñ, u briew u ngeit ïa ka ban ïoh ïa ka hok; bad da ka shyntur keiñ, ba phla shynna ïa ka ban ïoh ka jingpynim."

Wat ym sngew sarong tangba phi lah don ha ka niam ka rukom jong phi, lada phim pat kylla bamut, phim pat pdiang ia U Trai Jisu, phi baroh phin jot noh kumjuh. (Loukas 13:2-5). Ka niam lane uno uno u briew kim lah satia ban pynim ia u briew, dei tang U Jisu U Khun jong U Blei.

Kam 4:12, "Bad ym don ka jingpynim hano hano ha uwei pat: naba ym don kawei pat ka kyrteng hapoh ka bneng, ïa kaba la ai hapdeng ki briew, da kaba ka dei ba yn pynim ïa ngi.”

Ka jingkhot ka long to ngin kylla bamut, ngeit bad pdiang noh ia U Jisu mynta, khot kyrpad ia U katba dang don ka por, namar kan poi ka por haba ka jingaiei jong U Blei kan kut noh, bad hangta lada ngi kwah ban kylla bamut ruh ngin nym ioh shuh, ym don lad shuh. Hynrei mynta, lada phin khot kyrpad ia U Trai, yn pynim ia phi.

Kam 2:21, "Bad kan jia ba uno uno baroh u ban khot kyrpad ïa ka kyrteng U Trai, yn pynim ïa u."

Paralok baieit ka pop aiu phi la leh? Wan sha U Jisu, u don ka bor ban map bad pynkhuid phar ia ki pop jong phi. 

U Blei u ong ha ka kitab u Isaiah 1:18-19, “Ale te, to ngin ïasaid nia lem,” ong U Trai : “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot. Lada phi long kiba kloi bad ba kohnguh, phin bam ïa ka jingbha jong ka ri."

Ioannis 3:16, “Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut."

U Blei u ieit ia phi. Amen

* SHARE LEM SHA KIWEI PAT RUH.

© Jester Mawlong | May 24, 2021