Ithuh ia ka ïa

Bad ia kane, haba ngi ithuh ia ka ïa, ba mynta la dap biang ka por ia ngi ban khie joit na kaba iohthiah. Rom 13:11-14

Ka jingithuh ia ka ïa ka long kaba donkam haduh katta katta. La ka long uba rep, ba trei ba ktah ha ki rukom bapher bapher bad khamtam kum ki bangeit (Khristan) ngi donkam ban ithuh ia ka ïa. Ngim dei ban shu myllen kumba ka pyrthei ka myllen, ngi hap ban bishar thuh, Kaba kumno kane ka ïa ba ngi im mynta?

U Ioannis u batai ba kane ka ïa ne ka por ba ngi im mynta ka long ka por bakhadduh. 1 Ioannis 2:18, "Ko khun hep, ka long ka por bakhadduh..."

Kumno ngi tip ba ki long ki ïa ne ki por ba khadduh? Haba ngi peit na ka Bible ngi sngewthuh shai ba kine ki ïa ki long da shisha ki ïa kiba khadduh.

* 1 Ioannis 2:18, Ko khun hep, ka long ka por bakhadduh: bad kumba phi la iohsngew ba uta uba ialeh pyrshah ia U Khrist u wan, wat mynta ruh la mih noh shibun kiba ialeh pyrshah ia U Khrist: nangta kein ngi tip ba ka long ka por bakhadduh. 

Kawei kaba ngi lah ban sngewthuh ba kine ki long ki sngi bakhadduh ka dei ka jingmih noh jong kita ki jinghikai ba shukor, ba khyllah.

* 1 Tim 4:1, "Hynrei U Mynsiem u ong shai, ba ha ki ïa kiba khadduh, don kiban hap noh na ka jingngeit; da kaba pynshah shkor ha ki mynsiem bashukor, bad ha ki jinghikai ki ksuid." 

Ha ki sngi bakhadduh ki jinghikai ba khyllah kin mih, bad kat kiba pynshahskhor ia kita ki jinghikai ba khyllah, kin hap noh na ka jingngeit.

* 2 Tim 3:1, "Hynrei to tip ia kane ba ha ki sngi kiba khadduh kin wan ki por bashitom. Ngi la sakhi da la ki jong ki khmat, ngi la iohsngew da la ki jong ki shkor ia ki jingeh bad jinglynniar jong ki briew ha kine ki sngi, ki long shisha ki por ba shitom.

* Mathaios 24:9-11, U Jisu u lah iathuhlypa ba ha ki sngi ba khatduh ka jingshakri Blei kan long kaba kham eh, kham jynjar. Ka jingshah kren bein, leh beiñ, etc. Wat ban ai noh sha ka ban iap ruh. Tang ha kine ki sngi ruh ngi lah sdang ban iohi ia kita ki jingeh, ki jingpynwit ha ka jingshakri Blei. Ban khmih lynti ia kaba suk lah kham shitom.

Haba ngi la ithuh ia ka ïa, aiu ngi dei ban leh? 

1) Khie joit na kaba iohthiah - Haba ngi la ithuh ia ka ïa ngi dei ban khie joit, ym dei ban dang ksaid sah ha ka jingthiah jong ki jingtlot jingswai, ka jingthiah jong ka pop. Khie joit!!! Balei ba ym long ban pynslem, hap ban khie joit! Namar ba ka jingpynim ka la kham hajan iangi mynta ban ia kaba mynba ngi la ngeit. v.11

Lada ngim khie joit, ka jingiap bad ka jingjot ba kyndit kyndit kan ngat ha ngi.

Pule - Pro 6:4-11

To ngin nym long kum ki briew jong ka pyrthei kiba thiah khop khop hapoh kaba sniew bad ka jong kynoi u bymman.

1 ÏOANNIS 5:19

Ngi tip ba ngi long na U Blei, bad ba ka pyrthei baroh kawei ka thiah khop hapoh uta u basniew.

 

Ngi ngim long na ka jong ka pyrthei ba ngin thiah khop hapoh uta u basniew. Hynrei ban khie joit, ban ym ai thiah ia la ki khmat ba kynja mynsiem jong ngi.

2) Bret noh ia ki jingleh jong ka jingdum - Kano kano ka jingleh jong ka jingdum (ka pop) hap ban bret noh, wat bat shuh tang khyndiat ruh em, bret lut noh. Kynmaw! Haba U Blei u ong bret, hap ban bret, lada U ong pyniap, hap ban pyniap, ngim lah ban ong da kumwei pat. Lada ngim treh ban bret, lada ngim treh ban pyniap, ka jingbitar jong U Blei kan meh pyrshah ia kiba kum kita. U Blei u long ka jingieit, U long ruh ka ding ba bam duh.

Ngi kynmaw U Blei u ong ia u Syiem Saul ban pyniap lut khoit ia ki Amalek bad briew bad mrad, bad bakhraw bad batri, hynrei haba u Saul um shym la pyniap lut, ka jingbitar U Blei ka la meh pyrshah ia u Saul.

1 SAMUEL 15 LYNNONG 

3) Kieng noh ia ki atiar ka jingshai - Ka jingmut hangne ka long, kup baroh ia U Khrist ha ka jingim jong phi, ai ba ki briew ki  iohi ia U Khrist ha ka jingim jong phi. Iaid noh kum ki khun ka jingshai, pynshai lem ruh ia kiwei. U Jisu u ong, "Phi phi long ka jingshai ka pyrthei...to pynshai kumta ia ka jingshai jong phi...ba ki briew kin iohi bad ioh iaroh ia U Kpa ba ha bneng" Mat 5:14-16

Jingkyntu: To ngin long kiba stad ban bishar thuh ia ki ïa, ki por bad ki aiom, ym ba ngin long kiba bieit ban shu iohthiah sah ha kiei kiei ki jong ka pyrthei bad ka doh. To ngin bret noh ia ki jingleh jong ka jingdum, hynrei to ngin kieng noh ia ki atiar ka jingshai.

To U Blei un kyrkhu iaphi. Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 02, 2021