Ka Kynthei kaba sheptieng ia U Trai - Kata ka ban ioh iaroh

Ha ka Bible ngi shem kaba kham bun la kren shaphang u shynrang, (u,u,u, me,me,me) hynrei ha kane ka Proberb 31:10-31, ngi shem la kham kren kyrpang ia ka kynthei. Ngin ia peit ha ka dkhot ba laiphew.

Proberb 31:30, "Ka jingitynnad ka long ka jingshukor, bad ka jingbhabriew ka long kaba thala: hynrei ka kynthei kaba sheptieng ia U Trai, kata kaban ioh iaroh."

Hangne la kren shaphang ka jingitynnad, ka jingbhabriew bad ka jingsheptieng ia U Trai. To ngin ia peit halor kane ka bynta.

1. KA JINGITYNNAD KA LONG KA JINGSHUKOR: Balei ka Bible ka ong ba ka jingitynnad ka long ka jingshukor. Ka jingmut ka long ba ngim dei ban peit tang ia kata ka jingitynnad kaba shabar, hynrei ban peit ruh ia kaei ba don hapoh dohnud. Namar bun phin shem ki briew kiba peit tang ia kata ka jingitynnad kaba shabar ynda hadien ki babe, balei? Namar ba kam long kumba ki iohi shabar. Kata ka long ka jingshukor. Ka jingitynnad ia kiei kiei kiba shabar kadei ka jingshukor. U Soitan barobor un pynlong ba ki briew kin peit bad itynnad ia kaba shabar. U pyni bad pynikwah ia ka Im ia uta u soh, bad haba ka Im ka la peit, ka la itynnad, pynban haba ka la bam ka long da khongpong. Jen 3:1 ter ter. Hangne ngi sngewthuh ba ka jingitynnad khlem ka jingsheptieng Blei ka long ka jingshukor. 

U Apostol Petros u thoh, kiba ka jingpynitynnad kan ym long tang kaba shabar... Pule 1 Pet 3:3-4

2. KA JINGBHABRIEW KA LONG KABA THALA: Hangne ruh ka syriem kum katei haneng hi. Ka jingbhabriew khlem ka dohnud ba sheptieng Blei, kata ruh ka long kaba thala, kaba mut ym don jingmut lane jingmyntoi eiei. Kaba donkam eh nalor kine ar, dei ka jingsheptieng ia U Blei.

Pro 11:22, "Kum ka jingdeng ksiar ha ka khmut ka sniang, kumta long ka kynthei babhabriew kaba khlem jingpyrkhat."

Ka jingbhabriew khlem ka jingsheptieng Blei, ka long kumba pyndeng ksiar nylla ha ka khmut sniang, ym don jingmut eiei ruh em.

3. KA KYNTHEI KABA SHEPTIENG IA U TRAI, KATA KA BAN IOH IAROH: Ngi la ia peit ia ki ar tylli ki bynta haneng ngi iohi kaei ba ka Proberb ka ong, ba ka jingitynnad ka long ka jingshukor bad ka jingbhabriew ka long kaba thala, hynrei ka kynthei kaba sheptieng ia U Trai kata keiñ ka ban ioh iaroh. 

Ban long kiba don ka dur kaba itynnad, bad ba bha briew ka long kaei kaei kaba sngewtynnad, hynrei lada ngim don pat kata ka jingsheptieng Blei ha ka jingim jong ngi, kata kan long ka jingshukor bad jingthala. Ngi donkam ban long ki briew kiba sheptieng ia U Blei, la ha kaba rieh ne ba paw, kata ka long kaba donkam eh.

Bad haba ngi don kata ka dohnud ba sheptieng Blei, kata keiñ ka ban ioh iaroh (khamtam eh hakhmat jong U Blei). Naduh ka dkhot ba 10 ngi iohi kumno la iaroh ia kata ka briew, bad ha ka dkhot ba 30 ka iathuh ba ka daw ba la iaroh ia kata ka briew ka dei namar ka jingsheptieng Blei.

Lehse phi lah ban kylli, 'Ka mut aiu sheptieng ia U Blei? Sheptieng Blei hangne kam mut ban tieng ia U Blei kumba tieng ia u khla, u bsein ne kino kino ki mrad kynsha, lane tieng kumba tieng ia u nongshohnoh. Hynrei ka jingmut sheptieng ia U Blei ka mut ban tieng burom, ñiew burom, ban ieit ia U Blei, kata ka dei ka jingmut.

Ka jingkhot ban sheptieng ia U Trai ka long ia baroh. Ym tang ia ki kynthei, hynrei naduh ki khynnah, samla, rangbah shynrang ter ter. Haba ngi sheptieng ia U Blei, ka don ka jingkyrkhu bakhraw. 

1) Ngin ioh ka jingstad: Pro 9:10, "Ka jingsheptieng ia U Trai ka long ka jingsdang ka jingstad: bad ka jingtip ia uta U Bakhuid long ka jingshemphang." Kum ki kynthei, donkam ia ka jingstad, ym tang ka jingstad pyrthei hynrei ka jingstad ba kynjablei. 

Pro 14:1 ka ong, "Ka briew kaba stad baroh ka tei ia la ka ïing: hynrei kaba bieit ka lied noh ia ka da la ki jong ki kti." 

Ban tei ia la ka longïing longsem ngi donkam ia ka jingstad, ban ioh ia ka jingstad donkam ka jingsheptieng Blei.

2) Ngin lah ban ri khuid ialade: Pro 8:13 "Ka jingsheptieng ia U Trai long ban shun ia kaba sniew..." Haba ngi don ka jingsheptieng Blei ka pynlong ia ngi ban shun ne isih ia ka basniew, bymkhuid ne ka pop. U briew ne ka briew bym don ka jingshepting Blei kim salia ban leh pop. Kata ka long ka jingshisha.

3) Ngin long kiba la kyrkhu: Salm 112:1 ter ter ka iathuh ia ngi shaphang u briew ba sheptieng ia U Trai bad kumno ba U Blei u kular ban kyrkhu.

Salm 115:13, "Un kyrkhu ia kiba sheptieng ia U Trai, kiba rit ruh bad kiba khraw de." 

Ka jingkyntu: To ngin ioh ia ka dohnud kaba sheptieng ia U Blei, namar dei kane ka ban pynlong ia ngi ban ioh iaroh, ym dei tang kata ka jingpynitynnad ne pynbhabriew kaba tang shabar, namar kata kan long kaba thala bad ka jingshukor, ngi donkam eh ka dohnud ba sheptieng Blei.

To U Trai un kyrkhu iaphi baroh. Amen

"HAPPY MOTHER'S DAY - 2021"

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 09, 2021