Ka jingpynim ka dei mynta. Ka dei ruh ka kabu ba U Blei u ai ha ngi lyngba U Jisu Khrist. Kynmaw ia kane ba ka kabu barabor ka long mynta bad lada ngim suidniew ngin duh bad ngin babe junom.
Ka Bible ka iathuh ia ngi ba ‘ha ka ïa ba biang U Blei u la phah ia la U Khun sha ngi ban iap iapli na ka bynta jong ngi’. Kumta mynta katba phi dang ioh ka lad ban ngeit ia U Jisu, ngeit noh mynta hi, wat ap ia ka lashai. Lada ngi leh bymsuidniew, khlem pep ka jingbabe kan lap ia ngi bad hangta ngin sa babe junom.
Ngi iohi ia ka nuksa ba la iathuh ha ka Ktien jong U Blei ia kiba bun ki briew kiba la leh bymsuidniew ia kata ka kabu ba U Blei u ai ha ki, ngi shem ba ki la babe haduh ka jingiap bad junom ruh kin iai babe.
Ki briew ha ki sngi jong U Noah: Mat 24:37-39 – U Blei u la ai ha ki ka kabu ba kin rung ha kata ka ïinglieng u Noah shuwa ba ka jingshlei kan long, hynrei kim treh ban rung. Haba kata ka kabu bad ka jingkhot ban wan sha ka ïinglieng ka la kut, U Trai u la khang ia kata ka jingkhang jong ka ïinglieng, baroh ki la babe, nga ngeit wat kita kiba kren sarong eh ruh ki babe khlem artatien.
Ki briew ha ki sngi jong U Lot: Jenesis 19:4-9 – Shuwa ban pynjot ia ka Sodom, u Lot u lah maham ia kita ki briew jong ka Sodom ba kim dei ban leh ia kane ka pop, hynrei kine ki briew kim shym la sngap satia, kim shym la suidniew. U la iasyllok ruh ia la ki jong ki pyrsa kurim, kine ruh kim shym la sngap kim shym la suidniew satia, ki da sngew biria pynban ia kata ka jingiasyllok jong u Lot. Jenesis 19:14.
Haba kata ka jingisynei jong U Blei ka la kut, la thang noh ia ka shnong Sodom da ka ding. Baroh kiba don ha ka bad briew bad mrad la thang duh khoit, khlem da pynsah wat tang uwei ruh. (Jenesis 19:24-27) Katba ka ding ka dang klang, haduh katno ka jingbabe jong kita ki briew phi tharai? Da kaba tikna kin lynniar lympat, kin babe balei ngam ngeit ia kaei kaba U Lot u ong.
U Riewspah: Loukas 16:19-31 – Katba ka kabu ban wad ia ka Hima U Trai, ban pynkhreh na ka bynta ka bymjukut, um shym la pynkhreh, u la leh bymsuidniew, u la leh pahuh eh ong ka Bible. Loukas 16:23-25. Hadien ngi shem haduh katno u la babe junom la junom ha dujok ding.
Ki San ngut ki Theisotti ba bieit: Mathaios 25:1 ter ter – Kine ruh kumjuh syriem kumba u Riewspah u la leh, katba dang biang ka por kim shym la pynkhreh ialade, ynda u Nongleit kurim u wan kyndit kyndit, hangta ki la khohreh ban leit wad umphniang, ban khrong klumar na ki briew, bad haba ki la slem ban ioh umphniang, uta u Nongleit kurim u la leit bad iehnoh noh ia ki, hangta ki la sdang ban tied jingkhang, hynrei ym don lad shuh, sah sa tang ka jingbabe junom.
Dang don shibun kiwei ruh lada ngin peit na ka Bible, ngi shem namar ba ki leh bymsuidniew, kim shym la sngap ia kaei ba la maham ia ki, kumta ka jingbabe ka la long ha ki.
Paralok baieit, U Blei um kwah satia iaphi ba phin babe dier por junom. Dei namar kata ka daw u la phah ia la u jong U Khun sha ngi bad ruh u dang ai ia ngi ka lad ban iohsngew ia ka jingialap, ka jingiasyllok na ki briew jong U ba ngin kylla bamut bad wan sha U Jisu. Bad mynta kumba ong ka Ktien U Blei, katba phi dang iohsngew, phi dang pule ia kane ka jingthoh, “WAT PYNEH IA LA KA DOHNUD JONG PHI” ngeit bad pdiang noh ia U Jisu ha ka dohnud jong phi. Wat ong, nga uba eh dohnud, ngam tieng ia ka dujok, ngan ym babe da lei lei ruh, hynrei paralok kata ka long ka jingshukor jong u Soitan. Ha kata ka sngi ki ‘riew eh dohnud baroh kin lynniar. Uei uba lah ban ieng haba ka jingbitar jong U Blei ka meh pyrshah ia uta uba leh bymsuidniew ia ka jingkhot ieit jong U Trai? Ym don uba lah ban ieng, ym don u ban ym babe.
Kumta paralok baieit, katba U Jisu u dang khot ieit ia phi, bad u dang ai ia ka kabu ba bha tam, to ngin kylla bamut, ngeit bad pdiang noh ia U mynta hi ha ka dohnud jong phi. Haba phi wan sha U, phi kylla bamut, u kloi ban pdiang, ban map bad ban pynim ia phi.
Isaiah 1:18, "Ale te, to ngin iasaid nia lem, ong U Trai: la ki pop jong phi ki long basaw haiñ haiñ, kin lieh kat ka ior; la ki la sawbthuh, kin long kum u ñiuh langbrot"
“KA JINGPYNIM KA LONG MYNTA” Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
©Jester Mawlong | May 04, 2021 | 8:04PM
Comments
Post a Comment