Eklesiastis 1:9 "Kata kaba la lah long, long kata kaban sa long; bad kata kaba la lah leh, long kata kaban sa leh: te ym don ei ei kaba thymmai hapoh ka sngi."
Kane ka kyntien 'hapoh ka sngi' ka paw haduh kumba 29 sien tang ha ka Kitab u Eklesiastis.
Kane ka dei kaba u syiem Solomon u la kren, u iai ban ba ym don kaba thymmai hapoh ka sngi. Lehse ngi lah ban kylli, ka mut aiu, ym don eiei eiei kaba thymmai hapoh ka sngi? Ka jingmut jong kane ka long ba ka jingim jong u briew ha ka pyrthei, khlem U Blei, kam don kaei kaei kaba thymmai.
Haba ngi pyrshang ban peit bniah ngi shem ba kane ka long kaba shisha, shabar na U Blei hi ym don kaei kaei kaba thymmai. Ki briew haba ki shem ia kaei kaei ha kane ka pyrthei ki lah ban ong, oh ngi lah shem ia kaba thymmai. Don ki briew kiba shem ia ki krem bajylliew (nuksa - Krem Arwah, Krem Puri etc) ki lah ban ong, Oh! ngi lah shem ia ka krem ba thymmai! Hynrei nga lah ban ong ba kata kam dei satia kaba thymmai, ka dei kaba lah don lypa. Ki lah ban shem ia ki jaka jngoh kai ba itynnad, ki lah ban ong ba ngi lah shem ka jaka jngoh kai ba thymmai, hynrei kata ruh ka dei kaba lah dep don lypa. Phi lah ban shem ia kano kano ka jingshem jong phi ha ka pyrthei, kita baroh ba phi shem kim long satia kiba thymmai. Wat ka riam ka beit (fashion). Kata kaba la lah long, long kata kaban sa long; bad kata kaba la lah leh, long kata kaban sa leh: te YM DON KABA THYMMAI HAPOH KA SNGI.
Nga kwah ban iathuh iaphi ba dei tang ha U Blei ka don kaba thymmai, shabar na U ym don kaba thymmai. Lada ngi kwah ban mad (experience) ia kaei kaei kaba thymmai, wan sha U Blei, dei tang ha u ngin shem ia kaei kaei kaba thymmai.
Jingrwai Sngewsynei 3:22, "Ki jingisynei jong u, ki thymmai man ka step" Ha ka kitab u Isaiah U Blei u ong ba ngan leh ia kiei kiei kiba thymmai. (Isaiah 43:19).
Lada ngi la shem ia U Khrist, kata ka mut ba ngi la shem ia kaei kaei kaba thymmai.
2 Kor 5:17, "Kumta lada uei uei ruh u don ha U Khrist, u long u jingthaw bathymmai; kiei kiei ruh kiba rim ki la duh noh, ha khmih kiei kiei baroh ki ia jia long kiba thymmai."
Paralok baieit, ha ka pyrthei ngin nym lah ban shem kaba thymmai, wan sha U Blei, ngeit bad pdiang ia U Jisu phin shem ia kaei kaei kaba thymmai. U Blei u ong ba un pynlong thymmai ia kiei kiei baroh. (Jingpynpaw 21:5). Ka jingshem jong ngi ha ka pyrthei kan sa rim, bad yn sa klet noh bad yn ym kynmaw shuh, hynrei ka jingshem jong ngi ia kaba thymmai na U Blei ka dei kaba yn nym klet shuh junom, bad hangta ngin sa lyngngoh ha ka jingmaian (amazed), ryngkat ka jingkmen bymjukut. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 03, 2021 | 8:40PM
Comments
Post a Comment