To ai ha ngi mynta ka jingbam jong ngi kaba ha la ka sngi ka sngi

To ai ha ngi mynta ka jingbam jong ngi kaba ha la ka sngi ka sngi.

MATHAÏOS 6:11

Ha kine ki sngi U Trai u kren ha nga ba ngan kham pyndei ia ka Ktien jong U Blei bad kiei kiei kiba kynja mynsiem ne bad ka mynsiem ym tang ha kiei kiei kiba iadei bad ka met. Kumta, haba nga pule ia ka Ktien jong U Blei nga i ba ka kham kren ia kiei kiei kiba iadei bad ka mynsiem. 

U Jisu ruh u hikai ia ki synran ba kin kham pyrkhat ia kiei kiei kiba iadei bad ka mynsiem ym ia kiei kiei kiba iadei bad ka met. Namar ia kiei kiei kiba iadei bad ka met U Kpa jong ngi uba ha bneng u lah dep tip lypa, lah dep pynkhreh lypa, ngim da donkam shuh ban dang khuslai. Hynrei kaei ba ngi dang hap ban pyrkhat, ban wad ka dei ia kiei kiei kiba kynja mynsiem. Ki Jentil barobor ki wad shuwa ia kiei kiei kiba iadei bad ka met (ka bam ka dih, ka kup ka sem etc). U Jisu u ong wat long kum ki Jentil.

Pule ha ka gospel u Mathaïos 6:25-34 U Jisu u lah dep iathuh ia kane.

Ka jingbam jingdih, ka kup ka sem, ka jingkoit jingkhiah, bad kiwei kiwei kiba iadei bad ka met lah dep pynkhreh lypa da U Kpa ba ha bneng.

Kumta haba U Jisu u hikai ia kane ka Jingduwai U Trai (kaba ngi tip) ka long ba ngin duwai ba U Kpa un ai ha ngi ia kata ka jingbam kaba ha la ka sngi, ka sngi. U da ban 'ha la ka sngi, ka sngi' kaba mut ym dei ban sangeh lane ban duh. Ngi donkam ia kane ka jingbam ha la ka sngi ka sngi. 

Kaei kane ka jingbam kaba ha la ka sngi ka sngi? Kane ka jingbam ka dei ka Ktien jong U Blei, kaba kren ruh ia U Jisu hi kum u Ktien jong U Blei. 

U Blei u la iohsngew ia ka jingduwai jong ngi, kumta u la ai ha ngi ia kane ka jingbam. Kumta ha la ka sngi ngi hap ban bam (pule) ia ka Ktien jong U Blei ba la ai ha ngi, man ka sngi ngi hap ban don ka jingiadei ba jan bad ba im bad U Jisu. 

Ngim dei ban long kum ki khun Israel ban dang iai khnium ia U Blei. Haba U Blei u la ai ha ki ka jingbam kaba ha la ka sngi ka sngi (Manna) katta ruh ki dang khnium ia U Blei. (Eksodos 16:1-36)

To ngin bam ia kane ka jingbam ba U Blei u la ai ei ha ngi ha la ka sngi. U Blei un kyrkhu. Amen

© Jester Mawlong | May 31, 2021