(Kiei kiei kiba iohi bad kiei kiei ki bymlah iohi)
"...haba ngim khmih shuh ha kita kiei kiei ruh ïa kiba ïohi, hynrei, ïa kita kiei kiei ruh ki bymïohi; namar kita kiei kiei ruh ïa kiba ïohi ki long tang shibit, hynrei, kita kiei kiei ruh ki bymïohi ki long bymjukut keiñ." 2 Korinth 4:18
Hangne u Apostol Paul u pyni ia ka jingiapher hapdeng kita kiei kiei kiba lah iohi bad kita kiei kiei ki bymlah iohi. U ong ba kita kiei kiei kiba lah iohi ki long tang shibit (shipor), hynrei kita kiei kiei ki bymlah iohi ki long bymjukut. Kumta u kyntu ia ki bangeit ba kin kham pynleit jingmut ha kita kiei kiei ki bymlah iohi, ym ha kita kiei kiei kiba iohi.
Bunsien kiei kiei kiba tang shipor ki tan lut ia ka por, ka bor bad ka jingmut jingpyrkhat jong u briew. Ka kam ka jam ka long tang shipor, hynrei ka dawa ia ka jingpynleit jingmut kaba kham bun. Ka met jong ngi ka long tang shipor, hynrei ka dawa ia ka jingiai sumar (maintenance) kaba kham biang. Ka pisa tyngka ka long kaba tang shipor, hynrei ka da pynkhih (fluctuate) ia ka jingmut jingpyrkhat jong ngi. Haba ngi sngew dap, ngi la heh mynsiem, bad haba duna, ngi lah rit mynsiem. Kata ka long kaei kaba ngi mad (experience) ha ka jingim. Kata kaba tang shipor bunsien ka long kum ka jingkit bakhia ha ka jingim jong ngi lada ngi shah ia ka ba kan synshar (control).
Hynrei haba ngi nang ban pynleit jingmut ha kiei kiei kiba neh bymjukut dei hangta ngin shem ia ka jinghun, bad ngin sngew ba ia ka jingkit bakhia baroh na ngi la weng noh.
Hooid ka long kaba eh ban ym pyrkhat na ka bynta kane ka jingim. Hynrei ngi dei ban long balance, teng teng ngi hap ban ring ia ka jingmut jingpyrkhat jong ngi sha kiei kiei kiba neh bymjukut.
2 Korinth 10:5, "da kaba pynkyllon noh keiñ ïa ki jingmut thala, bad ïa ka jingleh khraw baroh kaba kyntiew ïa lade ïa ka ban ïaleh ïa kata ka jingtip shaphang U Blei, bad da kaba pyndem ïa ka jingpyrkhat baroh ha ka jingkohnguh ïa U Khrist"
Dei namar kata kadaw u Apostol Paul u ong, "To phin mut brai ïa kita kiei kiei ruh kiba haneng, ym ïa kita kiei kiei ruh kiba ha ka khyndew." Kolossai 3:2. Namar kiei kiei baroh kiba ngi lah ban iohi, ha kawei ka sngi yn sa thang duh noh, kin sa um baroh, hynrei kita kiei kiei ki bymlah iohi kin iaineh bymjukut.
Ngi donkam ban iai mut brai ia kita kiei kiei kiba neh bymjukut. "Mut Brai" ka mut ban iai pyrkhat, iai puson, khlem sangeh. Nuksa haba ki briew ki brai ia kiei kiei ki jong ka doh, miet step, thiah shong, kin pyrkhat beit tang shaphang kata. Kata ka dei ka jingmut, "Mut Brai".
U Apostol Paul u ong shuh shuh ha ki Philipi 3:15, "Namar kata, kat kiba long kiba janai, to ngin ïamut brai ïa kane; te lada ha kaei kaei phi ïamut da kumwei, ïa kane ruh U Blei un pynpaw ha phi."
Ka jingkhot ka long, to ngin mut brai, ngin wad bad ngin pyrkhat barobor ia kita kiei kiei kiba neh bymjukut, ki bymlah iohi. Namar katba ngi nang mut brai ia kita kiba long tang shipor, katta ngin nang khuslai. Hynrei ha ka khyllipmat ba ngi pynphai ia ka jingmut jong ngi sha kiei kiei kiba neh bymjukut, hangta ngin shem ia ka jingsuk bad ka jingsngewhun. Kan sa poi ka por ba ngin sngewthuh ba kita kiei kiei baroh kiba ngi ialeh shitom, duh thiah duh dem, kiba ngi khuslai bad kiba ngi da pynlut kham bun ka por, ngin shem ba ki dei tang ki jingpynsyrwa kai (wasted) ia ka por jong ngi.
U C. S Lewis u ong, "All that is not eternal is eternally useless." (Baroh ka bym long bymjukut, ka long ka bym myntoi bymjukut).
U Blei u ai ha ngi ia ka jingngeit ba ngin don kata ka jingsngewskhem ba kata kaba ngi ngeit, watla ngim pat iohi mynta, ha kawei ka sngi ngin sa iohi kumba ka long.
Heb 11:1, "Te ka jingngeit ka long kata ka jingsngewskhem ïa kita kiei kiei ïa kiba ngi kyrmen, kata ka jingtynjuh ïa kita kiei kiei ki bymïohi."
Haba ngi wad, ngi pynleit jingmut ha kita kiei kiei ki bymlah iohi, U Blei un ai lang tam ha ngi wat ia kita kiei kiei kiba iohi, kiba ngi ia donkam ha ka met.
Mathaïos 6:33, "Hynrei, phin ïawad shuwa ïa ka hima U Blei, bad ïa ka hok jong u: te ïa kine kiei kiei baroh, yn sa ai lang tam ha phi." Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 13, 2021 | 5:00 PM
Comments
Post a Comment