Ka jingthmu jong ka jingpynsleh

Ka jingpynsleh kadei ka dak jong ka jingmynjur, ka jingithuh, ka jingpynshisha ne pynskhem bad pynkup bor. Ka long kum ka Sanod

Kaei ka jingthmu jong ka jingpynsleh?

Ngi hap ban sngewthuh ba U Blei um ju pynsleh ia ki briew khlem ka jingthmu, haba U Blei u pynsleh ia uno uno u briew u pynsleh ryngkat ka jingthmu. Bunsien ngi ju duwai bad rwai, ‘Trai pynsleh ia nga’ hynrei ngim don bad ngim sngewthuh pat ia ka jingthmu, ngi donkam ban sngewthuh bad ban don ka jingthmu haba ngi duwai ne rwai na ka bynta ka jingpynsleh.

U Blei u pynsleh ia ki lyngdoh na ka bynta ka jingthmu ba kin pyndep ia ka jingkam lyngdoh jong ki. Leb 8:1,2,10 – La pynsleh ia u Aaron bad ki khun jong u.

U Blei u pynsleh ia ki syiem kum u Saul, David, Solomon bad kiwei ba kin lah ban pyndep ia kata ka kam jong ki kum ki syiem. (1 Sam 9:1-10 - Saul; 1 Sam 16:13 - David; 1 Syiem 1:39 - Solomon). 

U Blei u pynsleh ia ki nongiathuhlypa khnang ba kin lah ban pyndep ia kata ka jingthmu jong ka jingiathuhlypa. 1 Syiem 19:16 – La pynsleh ia u Elisha.

Ngi iohi ha man ba U Blei u pynsleh, u don ka jingthmu. Ka jingkylli ka long, Kaei ka jingthmu ba U Blei u pynsleh ia ngi lane kaei ka jingthmu jong ngi haba ngi duwai ‘Trai pynsleh ia nga? Ngim lah ban shu pan ia ka jingpynsleh, khlem da tip lane don ia ka jingthmu. Ki khun jong nga ki ju pan ia ka Khanshi lane Tari bad haba ki pan, nga ju kylli ia ki phin leh aiu ia kata ka Khanshi ne Tari? Bad ki khun ki ju jubab, ngan leh kumta kumta. Bad haba ki lah iathuh ia ka jingthmu jong ki ia kata ka jingdonkam ia kata ka Khanshi ne tari, bad lada ka sngew ba ka dei ban ai nga ai, bad lada kata ka jingthmu jong ki kam iahap, ngam ai. Nga ngeit kata ruh kadei kaba U Blei u leh.

Ngin ia peit mynta, Kaei ka jingthmu ba kongsan eh jong U Blei na ka bynta jong ngi?

Ka jingthmu ba nyngkong eh ba U Blei u pynsleh ia ngi ka long ban ialap ia ka gospel. U Blei U Kpa u la pynsleh ia U Jisu ba un ialap ia ka Gospel. Pule Isaiah 61:1 ter ter.

Ngi iohi ruh haba U Jisu u la khot ia ki synran jong u, u la aiti ha ki ka kam ba kin pyndep, bad kata ka long ban ialap ia ka gospel. Shuwa ba un leit noh sha bneng, u la ong ia ki ba kin iai shong ha Jerusalem tad yn yn pynkup (pynsleh) ia ki da ka bor na jrong, bad ynda la pyndap iaphi da ka bor na jrong, phin sa long ki nongphla ia nga ha Jerusalem, Judia, Samaria bad sha kiba kut ka pyrthei. (Loukas 24:49; Kam 1:4-5; 8). Haba ki synran jong u ki la kohnguh bad ki la iai ap ha Jerusalem, bad ynda la poi ka ka sngi Pentekost la pynsleh ia ki da U Mynsiem Bakhuid, bad naduh kata hi ki la ialap ia ka Gospel, ki la leit kylleng kylleng ban ialap. 

U Petros uba mynshuwa u sheptieng ban phla ia U Jisu wat tang ha khmat ka khynnah rit ruh, haduh ba u la len ia U Trai lai sien (Mar 14:66-71). Hynrei haba la pynsleh ia u, u la ialap da ka jingshlur, bad ha kata ka jingialap jong u kumba 3000 ki mynsiem ki la kylla kabamut. (Kam 2:14-42). 

Ngi iohi shuh shuh shaphang u Petros bad kita kiwei pat ki synran wat haba la maham ia ki da kita ki rangbah lyngdoh, ki nongthoh ba kim dei shuh ban dang ialap ia ka kyrteng U Jisu, hynrei kim shym la sngap satia ia ki, ki la ong pynban ba ngi dei ban kohnguh ia U Blei khamtam ban ia u briew (Kam 5:27-32).

U Apostol Paul haba u la ioh pdiang ia ka jingpynsleh, um shym la sangeh noh ban ialap ia ka gospel la hangno hangno ruh, haduh ba u la ong ba u kloi wat ban iap ruh na ka bynta ka Gospel. Bad ha ka shithi sha ki nong Rom 1:16, u ong, ngam sngewlehrain ia ka Gospel U Khrist namar ka long ka bor U Blei ban pynim ia uwei pa uwei uba ngeit.

Para bangeit baieit, ngi donkam ia ka jingpynsleh jong U Trai ha ka jingim jong ngi khnang ba ngi lah ban pyndep ia ka jingthmu jong U Blei. U Trai u la pynim ia ngi ym dei tang ba ngin lait im ialade na ka dujok, hynrei ban pynim lem ruh ia kiwei, da kaba ngi ialap ia ka gospel, kata ka dei ka jingthmu jong U Blei. Ha ka gospel u Markos 16:15, u ong to leit sha ka pyrthei baroh bad to ialap ia ka gospel ha ki bynriew baroh. 

To ngin thrang, ngin sliang ia ka jingpynsleh jong U Blei khnang ba ngi lah ban pyndep ia kata ka jingthmu jong U, ban ialap ia ka gospel sha ki bynriew baroh. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 05, 2021 | 6:12PM