U Apostol Paul u kyntu ia ki bangeit ha Philipi ba kin trei dep noh ia la ka jong ka jingpynim. Kaba nyngkong ngi hap ban sngewthuh ba ka jingpynim ka dei ka jong shimet (personal), kaba ngi ioh na U Jisu Khrist da kaba ngi ngeit bad pdiang ia u ha ka dohnud, kumta uwei pa uwei u hap ban don ka jingkitkhlieh kumno ban trei dep noh ia la ka jong ka jingpynim. Ngim lah ban shu shaniah ha kiwei ia la ka jong ka jingpynim. Hooid ki pastor, ki nongialam Balang ki lah ban iarap ia ngi ha ka ban iasyllok, ban ai mynsiem, hynrei kin nym lah ban pynbat lem ia ka jingpynim jong ngi, wat ha ka sngi bishar u pastor un nym lah satia ban pyniasaid lem na ka bynta jong ngi, ban ong, o une u long kumta kumta, hynrei shimet shimet ngi hap ban ieng ha khmat U Blei ban ai jingkhein.
2 Kor 5:10. "...namar ka dei ban pynieng ia ngi baroh ha khmat ka jingshong bishar U Khrist, ba uwei pa uwei un ioh pdiang ha lade ia kita kiei kiei ruh ba la Ieh ha ka met jong u, katba kum kita ba u la leh, la bha la sniew."
Ngim lah ban shaniah ia la ka jingpynim ha u lok ne ka lok, ha ki kmie ki kpa, ne ki khun. Esekiel 18:20 ka ong ba u kpa um lah ban kit (bahkhlieh) ia ka pop jong u khun, u khun um lah ban kit (bahkhlieh) ia ka pop jong u kpa. Shimet shimet hap ban bahkhlieh. Ki san ngut ki theisotti ba bieit ki shaniah ha ki san ngut ki theisotti ba stad, hynrei haba kaba kut ka wan, ym don por shuh ban dang iarap briew, shimet shimet hap ban her.
U Paul u kyntu ia u Timothy ba un bat khak ia ka jingim bymjukut. Kaba mut da lade u hap ban bat, ban ri bad ban trei dep ia la ka jong ka jingpynim. 1 Timothy 6:12
U nongthoh sha ki Hebru u ong, bat skhem ia kata ka jingphla ka jingkyrmen jong ngi ba kan ym khih shuh. Heb 10:23
Para bangeit baieit, lada baroh shi katta ngi la pynsynjor bad ka la sdang khih, mynta bat skhem noh triang ia ka, ba kan ym khih shuh. Panpoh ia la ka syngkai da ka jingshisha, ba kan skhem bad ba yn nym lah ban pynkhih ia ka. Eph 6:14
Lada dang don kano kano kaba dang sah teng, pyndep noh, leh noh, kano kano kaba dei ban pynbeit, pynbeit noh ioh lap ba dier ka por. U Jisu u ong ngan leit ban khreh jaka ia phi bad ngan sa wan pat ban shimti ia phi sha lade hi...." To ngin don kata ka jingtieng riewblei, bad kata ka jingkhynniuh (kaba kren ia kata ka jingsngew kyrkieh), ban trei dep noh ia la ka jong ka jingpynim, khnang ba haba U Jisu un wan ngi lah long ready bad ngin ioh ban ia her ryngkat bad u ban don lem bad u ha kata ka jaka kaba u la pynkhreh, ka jaka jong ka jingsuk bad ka jingkmen junom. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 01, 2021
Comments
Post a Comment