Khlaw noh ia ka Khmat jong me

Mathaïos 18:8-9, "Te lada ka kti jong me lane ka kjat jong me ka pynthut ia me, to ot noh ia ka, to bred noh ruh na me; ka kham bha ia me ban leit bsut dkoh ne kynriang sha ka jingim, ban ia kaba ioh artylli ki kti ne artylli ki kjat, bad ban bred ia me ha ka ding bymjukut. Bad lada ka khmat jong me ka pynthut ia me, to khlaw noh ia ka, to bred noh ruh na me; ka kham bha ia me ban leit bsut sha ka jingim tang kawei ka khmat, ban ia kaba ioh ar tylli ki khmat, bad ban bred ia me ha ka dujok ding."

Shuwa ia kane ngi iohi U Jisu u hikai shaphang ki jingjynthut. U ong ba lada uno uno ruh u pynthut ia iwei na kine kiba rit kiba ngeit ha nga, ka la kham bha ba teh da u maw tylliat bakhraw bad bret sha duriaw (v.6), U Jisu um sngewtynnad ba ki briew kin pynthut lane kin long ka daw ka jingjynthut ia ki bangeit ha U. 

Hadien kata u sdang ban kren ia kine ki kyntien, U ong ba lada ka kti lane ka kjat jong me ka pynthut ia me, ot noh ia ka bad to bret noh, ka kham bha ia me ban leit bsut dkoh ne kynriang sha ka jingim, ban ia kaba ioh artylli ki kti ne artylli ki kjat, bad ban bred ia me ha ka ding bymjukut. U ong shuh shuh, bad lada ka khmat jong me ka pynthut ia me, to khlaw noh ia ka, to bred noh ruh na me; ka kham bha ia me ban leit bsut sha ka jingim tang kawei ka khmat, ban ia kaba ioh ar tylli ki khmat, bad ban bred ia me ha ka dujok ding.

Kane kam mut satia ban ot ne khlaw noh shisha (literally), hynrei U Jisu u pyni ba ka mynsiem jong u briew bad ka jingim bymjukut lane ka bneng ki long kiba kham kordor ban ia kita kiba ki kti, ki kjat lane ki khmat jong ngi ki lah ban ioh ne ikwah. Ka bneng ka long kaba kham kordor ban ia ki jingkwahbrai ka doh baroh. Kumta u ong ba lada kine kiei kiei ki pynthut ia ngi ban leit sha bneng, bha ba ot noh, khlaw noh, bad bret noh.

Naba u briew un myntoi aïu, lada un ïoh ïa ka pyrthei baroh, bad un duh noh ïa la ka mynsiem? Lane u briew un ïapli da ei ïa la ka mynsiem? Mathaïos 16:26 

Lah ba leit sha bneng khlem kita ki jingkwahbrai ki kti, ki kjat jong ngi ban ia kaba leit ryngkat bad kita ki jingkwahbrai sha dujok ding, lah ba leit sha bneng khlem kita ki jingkwahbrai jong ki khmat ban ia kaba leit sha dujok ding ryngkat bad kita ki jingkwahbrai. 

Dang lah ba duh ban ktah, ban mad, ban tba ia kiei kiei ki jong ka pyrthei bad ka pop ban ia kaba leit sha dujok ding ryngkat ka pop ka ban pynkwah brai junom la junom bad ban sngew kordit haba ngim ioh shuh hangta. Lah ba duh ban peit ia kiei kiei kiba jakhlia jaboh ban ia kaba leit sha dujok ding ryngkat bad kita ki jingkwahbrai jong ki khmat ki ban iai kwah brai junom bad ban sngew kordit. Kata ka dei kaba U Jisu u ong.

U Soitan un ialeh ban pynshoi ba ki kti jong ngi kin kwah ban ktah ia kiei kiei kiba sniew ne bymkhuid, un pynshoi ba ki kjat jong ngi kin phet sha kiei kiei kiba sniew, un pynshoi lyngba ki khmat jong ngi ban pynikwah brai ia kiei kiei ki jong ka pyrthei. Hynrei U Jisu u ong, ot noh, khlaw noh bad bret noh, wat shah ba kita kin long ka jingkhanglad ia ngi ban leit sha bneng. 

Kolossai 3:5-6, "Namar kata, to phin pynïap troiñ ïa ki dkhot jong phi kiba ha ka khyndew; kaba klim, ka jingbymkhuid, ka jingïaid shikar, ka jingkwah basniew, bad ka jingkwah lalot, kaba long ka jingmane bleithaw; na ka bynta kine kiei kiei ruh, ka jingbitar U Blei ka wan ha kita ki khun ka jingbymkohnguh" (pule hi haduh dkhot 9)

Ia kine baroh ki jingbymkhuid bymman hap ban pyniap troiñ, hap ban pyndkut ka jingiadei jong ngi.

U Ioannis u ong, "Phi wat ieit ïa ka pyrthei, lymne ïa kita kiei kiei ruh kiba ha kata ka pyrthei. Lada uno uno ruh u ieit ïa ka pyrthei, kata ka jingieit U Kpa kam don shuh ha u. Naba baroh kaba ha kata ka pyrthei, ka jingkwah brai jong ka doh, bad ka jingkwah brai jong ki khmat, bad ka jingsarong thala shaphang ka jingim, kam long na U Kpa, hynrei, na kata ka pyrthei ka long. Bad kata ka pyrthei ka ïaid jah noh, bad kata ka jingkwah brai jong ka; hynrei, uta uba leh ïa ka mon U Blei u ïaisah bymjukut." (1 Ïoannis 2:15‭-‬17)

Kan myntoi aiu ban ioh ia ka jingieit jong ka pyrthei hynrei lada ngi duh noh ia ka jingieit jong U Kpa ba ha bneng. Kan myntoi aiu ba ngin ioh ia kita ki jingkwahbrai ka doh hynrei lada ngin duh noh ia ka bneng. 

Ka pyrthei bad ki jingkwahbrai jong ka kin sa jah noh, yn sa thang noh, kim don jingmyntoi eiei ruh em, hynrei haba ioh ia ka bneng kata ka long kaba myntoi ia ngi, dei namar kata kadaw ngi hap ban pyndkut lut ia ki jingiadei bad kitei kiba long ki jingkhanglad ne kiba pynthut ia ngi ban ioh ia ka bneng.

Ka Im ka la ioh ban pynhun ialade da kita ki jingkwahbrai ka doh kaba u Soitan u la pynshoi ia ka, hynrei ka la duh noh ia ka Eden. (Jenesis 3 lynnong)

Kumta para bangeit baieit to ngin ieit tang ia U Trai, namar ha U ka don ka jingim. To ngin ong em ia ki jingkwahbrai ka pop ki ban ialam ia ngi sha dujok.

U Blei un kyrkhu iaphi. Amen

© Jester Mawlong | May 31, 2021 | 7:00PM