Intro: U Apostol Paul haba u thoh sha ki Nong Korinth ngi iohi shibun ki jingsneng ki jinghikai jong u kiba u la hikai, bad ha kaba pynkut, u pynkut da kine ki kyntien. To ngin pule
1 KORINTH 16:13
Dei namar kata, ngi donkam ban don ka jingkitkhlieh na ka bynta la ka jong ka jingngeit, kaba ngi la lah ngeit ha U Jisu Khrist, ban ieng skhem bad ban ym shah ban pynkhih noh ia ka jingngeit jong ngi.
"To da sharai phi, to da ïeng skhem phi ha ka jingngeit, to da leh shlur ïa lade phi kum ki rangbah, to da pynkhlaiñ ïa lade phi."
Ha kane ka dkhot ngi iohi ia ki saw tylli kiba u Apostol Paul u kyntu ia ki para bangeit ba don ha Korinth. Bad ha baroh kitei ki saw tylli, ngi iohi u ong "phi, phi, phi, phi". Kane ka pyni ba u kren ia ki bangeit uwei pa uwei (individual). Ban sharai, ban ieng skhem, ban leh shlur bad ban pynkhlain ialade, ka dei ka kamram bad jingkitkhlieh jong u bangeit ialade shimet shimet. Kham tam ha kaba kum kane ka por ba ngi mad mynta, kaba tang ban iakynduh ia ki Pastor ki nongialam Balang ruh ka long kaba shitom, kumta lada ngim don ka jingkitkhlieh da lade ialade kan long kaba eh shibun. Ngi donkam ban don ka jingkitkhlieh na ka bynta ka jingim ba kynja mynsiem. To ngin ia peit ia kine ki jingkyntu.
1. To da sharai phi: Kum ki bangeit ngi donkam ban im ka jingim kaba sharai ha baroh ki bynta jong ka jingim.
i) Sharai na ka bynta ka jingwan U Trai. U Jisu u ong ia ki synran ba kin sharai ha la ka sngi namar ba kim tip lano un wan u Kynrad jong ki. (Mat 24:42)
ii) Sharai ban ym hap ha ka jingpynshoi. (Mat 26:41). Namar ba u Soitan kum u sing ba kyrhuh u iaid kylleng ban ioh ban pynshoi, ban pynhap ia ki bangeit, lada ngim sharai un pynjot ia ngi (1 Pet 5:8). Ngi hap ban da khmih bha kumno ngi iaid ne ngi im ha ka jingim ba man ka sngi. (Eph 5:18)
2. To da ieng skhem phi ha ka jingngeit: Ha ka gospel u Loukas LOUKAS 18:8 U Jisu u ong, Hynrei, ynda wan U Khun u briew, un shem ne em ïa ka jingngeit ha ka pyrthei?” U Jisu haba un wan, un nym ong satia phi don kali katno tylli, phi lah pass kyrdan aiu, hynrei un wad phi don ne em ka jingngeit.
U Daniel u long uwei na ki riew ngeit uba la ieng skhem ha kata ka jingngeit kaba u ngeit ha U Blei ba im. Um shym la shah ban pynkhih, um shym la treh ban compromise ia la ka jong ka jingngeit. (Daniel 6:10). Nangta ngi iohi ia u Shadrak, Meshak bad Abednago, kine ruh ki la ieng skhem ha kata ka jingngeit, kampher aiu ki dei ban shah na ka bynta kata ka jingngeit. (Dan 3:1...)
Para bangeit, ka dei ia ngi ruh ban ieng skhem. U Apostol Paul u da kmen eh ban iohsngew ba ki bangeit ki ieng skhem ha U Trai. (Kol 2:5). Katno tam lei U Blei un kmen ban iohi ba ngi ieng skhem ha ka jingngeit.
3. To da leh shlur ialade phi kum ki rangbah: Ban long kiba shlur ka long kaba dei eh ia ngi ki bangeit. Kampher ngi dei ki khynthei, khynnah, samla, ne mano mano, ngi dei ban leh shlur kum ki rangbah ong ka Ktien U Blei. Ka Bible ka iathuh ia ngi ba ka jingshlur ka don ka nong bakhraw (Heb 10:35).
* Ngi hap ban long kiba na ka bynta ka jingngeit, shlur na ka bynta U Trai, ban ialap, ban phla ia u sha kiwei pat.
* Shlur na ka bynta kiei kiei kiba kynja mynsiem.
* Shlur ruh ban ong em ia ka pop, kumba long u Joseph.
Proberb 28:1, "U bymman u phet ïap ha bymdon ba beh ïa u: hynrei, ki bahok ki shlur kum u sing."
4. To da pynkhlain ialade phi: Ban long kiba khlain ha ka met ka long kaei kaei kaba sngewtynnad, katno tam lei ba ngin long kiba khlain ka mynsiem ha U Trai. U Apostol Paul u kyntu ia ki bangeit ba ki dei ban long kiba khlain ha U Trai (Eph 6:10).
Haba ong, To da pynkhlain, Ka mut ba ngi lah ban leh ia kata. Ka don ka lad ban pynkhlain, bad kata ka long:
* Da kaba pule ia ka Ktien U Blei (1 Ioannis 2:14)
* Da ka jingduwai (Judah 20; 1 Thes 5:17)
* Da kaba ap khmih ha U Trai (Isaiah 40:29-31).
U Blei un kyrkhu ia phi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 22, 2021
Comments
Post a Comment