Hato la pynmih lem ia phi bad U Khrist?

Ka long kaba donkam ba ngin kylli ia lade ia kane ka jingkylli, Hato la pynmih lem ne em ia nga bad U Khrist? Namar lada ym shym pat la pynmih lem ïa ngi bad U Khrist, ngi dang don shabar na ka Hima U Blei. Ngi donkam ban ïit ialade. U apostol Paul u ong ia ki bangeit ha Korinth ba kin ïit ialade la ki lah don ne em ia U Khrist. 2 KORINTH 13:5

Kam biang tang ba ngin ong ba ngi lah don ia U Khrist lane la pynmih lem ia ngi bad U Khrist, hynrei ngi dei ban don kata ka dak (sign) ba ngi lah long kumta. 

Lehse phi lah ban kylli ia nga kumno ngin tip lane ngin sngewthuh ba la pynmih lem ne em ia ngi bad U Khrist? 

Ban sngewthuh ia kane, to ngin ia peit na ka shithi u Paul sha ki nong KOLOSSAI 3:1‭-‬4

Namar kata, lada la pynmih lem ïa phi bad U Khrist, to wad ïa kiei kiei ruh kiba haneng, ha kaba U Khrist u don, uba shong sha ka kti kamon U Blei. To phin mut brai ïa kita kiei kiei ruh kiba haneng, ym ïa kita kiei kiei ruh kiba ha ka khyndew. Namar phi la ïap noh, bad ïa ka jingim jong phi la buhrieh lem bad U Khrist ha U Blei. Ynda la paw U Khrist, uba ka jingim jong ngi, ynda kumta, phi ruh, phin paw lem bad u ha ka burom.

Ha kaba sdang jong kane ka jingkren, u apostol Paul u pyndonkam da ka kyntien, lada. Um shym ong satia ba mynta phi lah dep pynbaptis bad ia phi la pynmih lem bad U Khrist, kumta phi dei ban leh kumta kumta, em, um shym ong satia kumta, hynrei u pyndonkam da ka ktien lada, u ieh ha ki, ba kin pyrkhat ia lade, la la pynmih lem ne em ia ki bad U Khrist. 

Nangta ngi iohi ynda u la dep ong, lada, u sdang pat ban pyni ba kumno kita kiba la pynmih lem bad U Khrist ki leh?

1) Ki wad ïa kiei kiei ruh kiba haneng.

2) Ki mut brai ia kiei kiei kiba haneng.

Ki briew kiba la pynmih lem bad U Khrist ka pynlong hi ia ki, ba kin wad, kin mut brai ia kita kiei kiei ruh kiba haneng, ym ia kita kiei kiei kiba ha ka khyndew. Hynrei kita kiba ym shym pat la pynmih lem bad U Khrist wat la ki don ha ki Balang ruh hynrei kin wad beit ia kiei kiei kiba ha khyndew, kiei kiei ki jong ka pyrthei bad ka doh.

Bunsien ngi ialeh shitom ban ia syllok bad ban pynsngewthuh ia ki briew ba ki dei ban wad ia kiei kiei kiba haneng bad kumta ter ter, hynrei ka shu kut tang ka jingiasyllok, kita ki briew kim lah satia ban wad ia kita kiei kiei kiba haneng. Shi taiew ruh em, shi bnai ruh em, shi snem ruh em, khlem iohi dak satia ba kin wad ia kita kiei kiei kiba haneng, shu kumjuh shi kumjuh. Bad kane ka la pynpyrkhat, tip ioh ba ym shym pat la pynmih lem ne ia ki bad U Khrist? Namar lada ym shym pat la pynmih lem ia ki, kin nym lah satia ban wad (ka long kum u khunlung bym shym pat la kha sha ka pyrthei, un nym pat tip ban wad bam), hynrei kita kiba la pynmih lem bad U Khrist, kin kwah hi ban wad ia kiei kiei kiba haneng, kin kwah hi ban pule Bible, kin kwah hi ban duwai, ban shakri ia U Trai bad kumta ter ter.

Ka long thik kum ki khunlung ba la kha sha ka pyrthei, kan pynlong hi ia ki ba kin wad buiñ, kin wad dud shiphang shiphang, bad lada kim ioh, kin iam kin lynniar, kata ka dei ka nuksa. 

U apostol Petros, ia kita kiba u lah tikna ba ia ki la pynmih lem bad U Khrist, u ong, Namar kata, haba la iehnoh ïa ka jingpynsniew baroh, bad ka jingshukor baroh, bad ki jingleh arsap, bad ki jingbishni, bad ki jingïakren sniew baroh, kum ki khunlung ba dang kha, to phin kwah hir hir ïa ka basngur ka dud kaba dei mynsiem, khnang ba phin ïoh san da ka sha ka jingpynim. 1 PETROS 2:1‭-‬2 

Lada ngim don kata ka jingthngan bad jingsliang ka pyn-artatien, tip lah kha pat ne em ia ngi, tip lah pynmih lem ne em ia ngi bad U Khrist?

Paralok baieit, to ngin ïit ialade, Hato la pynmih lem ne em ia ngi bad U Khrist? Lada ngi dang artatien bad ngim pat sngew tikna, donkam ban pynbeit thymmai ia la ka jong ka jingim da kaba hap ban mad ia ka jingkhapat bad ban da pynmih lem shisha ia ngi bad U Khrist.  

U Paul u ong ha ki nong Ephesos, wat mynba ngi la long ki baïap da ki jingryngkang jong ngi, u la pynim ïa ngi lem bad U Khrist (da ka jingaiei la pynim ïa phi), bad u la pynmih ïa ngi lem bad u, bad u la pynshong ïa ngi lem bad u ha ki jaka bneng, ha U Khrist Jisu.

EPHESOS 2:5‭-‬6  

 

Ngi dei ban don ka jingsngew tikna ba ia ngi la pynim, la pynmih bad la pynshong lem bad U Khrist ha ki jaka bneng, dei hangta ruh ngin kwah ban wad bad ban mut brai ia kiei kiei ruh kiba haneng. 

To U Blei un kyrkhu ia phi. Amen

Copyright © Jester Mawlong| Sept 11, 2021