Ka iktiar U Jisu

Iktiar ka mut kata ka bor ba lah ban ai hukum, ban shim rai, bad ban pynkohnguh.

MATHAÏOS 7:28

Ka la jia ruh, haba U Jisu u la wai noh ïa kine ki ktien, ba kita ki paidbah ki la ïasngewkyndit thred na ka jinghikai jong u: naba u la hikai ia ki kum uba don bor, bym kum ki nongthoh te.

Hadien ba U Jisu u la hikai ia kiba bun ki jinghikai ba kordor jong u naduh ka lynnong ka ba 4, 5 ter ter bad ynda poi ha ka lynnong ba 7, ki briew ki sdang ban sngewkyndit haba ki iohi ia kata ka jingstad jingshemphang bad ka bor jong u haba u hikai. Ki sngewthuh ba ka jinghikai jong u ka pher na ka jinghikai jong kita ki riewstad lane ki nongthoh. Bad naduh nangne shakhmat ngi sdang ban iohi shuh shuh ia kata ka iktiar jong U Jisu, bad kumno haba ki briew kiba ithuh (acknowledge) ia kata ka iktiar U Jisu, ki mad ia ki jingkyrkhu ha ka jingim jong ki.

1. Uba pang ñiangthohlieh u ithuh ia ka iktiar U Jisu:

Hadien ba U Jisu u la pynkut ia ka jinghikai jong u halor u lum, u la wan hiar noh, ong ka ktien U Blei. Bad katba u dang wan hiar u la ia shem bad u briew u ba pang ñiangthohlieh, bad une uba pang ñiangthohlieh haba u la iohi ia U Jisu, u la dem ban mane ia u, bad u da ong, Ko Kynrad, lada me mon, me lah ban pynkhuid ia nga.  MATHAIOS 8:1-2. 

Kane ka jingkren jong une u ba pang ñiangthohlieh ka pyni ba u ithuh ia U Jisu ba u don ka iktiar, ba lada u mon, u lah beit ban pynkhuid ia u, kumta haha U Jisu u sngewthuh ba une u ba pang ñiangthohlieh u ithuh ia ka iktiar jong U, u la ong, Nga mon; to men long khuid. Bad kumne kumne la pynkhuid ia uta u ba pang ñiangthohlieh. (v.3).

2. U Rangbah shispah u ithuh ia ka iktiar U Jisu:

Ha ka dkhot ba 5, ka juh ka lynnong ngi iohi sa ia u Rangbah shispah. Haba U Jisu u la poi sha Kapernam, u la ia kynduh sa ia une u Rangbah shispah u ba don ka jingeh ha ka jingim jong u ha kaba u shakri jong u, u pang iapshiliang bad u kordit eh. (v.6). 

Une u Rangbah shispah um shym la khot ia U Jisu sha ïing ba un wan ban duwai ia u shakri jong u, hynrei u ong ba un shu kren tang da ka ktien. Kane ka jingbym khot jong u sha ïing kam dei satia na kano kano ka daw, hynrei ka dei namar ba u ithuh ia ka iktiar U Jisu. U don kata ka jingngeit ba U Jisu u don ka bor ba lada u tang shu hukum wat na jngai ruh ka jingpang kan phet bad kan khiah. Kumta haba U Jisu u la iohi ia kata ka jingngeit ba une u Rangbah shispah u don ha kata ka iktiar jong u, u la ong ha u, To khie leit noh; kat kumba me la ngeit, kan long ruh ia me. Te ha kata hi ka por la pynkhiah ia u shakri jong u. MATHAIOS 8:5-13   

3. Ki saw ngut kiba rah ia u ba pang iapshiliang ki ithuh ia ka iktiar U Jisu:

Ha ka gospel u MARKOS 2:1-12 ngi shem ia ki saw ngut ki briew kiba bah ia u briew uba pang iapshiliang ban pynpoi ia u sha U Jisu. Hynrei namar ka jingbun briew palat bad ka jingkhapngiah, kim lah ban rung lyngba, kumta ki la kiew na tnum ïing bad lied ia ka jaka ha kaba don U Jisu, bad ki la pynhiar ia uta u briew na jrong. Bad haba U Jisu u la iohi ia kata ka jingngeit jong ki, u la pynkhiah ia uta u ba pang iapshiliang.

Lehse ngim pat ju pyrkhat, balei kine ki saw ngut ki leh shitom haduh katne. Bunsien ngi pyrkhat ba ka dei namar ka jingsngew synei jong ki ia une u ba pang, hooid kata ruh ka lah ban dei, hynrei kaei kaba kham dei eh ka long namar ba kine ki briew saw ngut ki ithuh ia ka iktiar U Jisu. Ki ngeit ba lada ngi lah ban pynpoi sha U Jisu u ba don ka iktiar, kumta une u briew un ioh khiah beit, kumta kane ka la pynlong ia ki ba kin ialeh shitom bad kheinduh wat ban kiew na jrong tnum bad ban lied ia ka. Kampher ki briew kin ong kumno, wat lada kin mai ne kynhied ruh. Kumta haba ki la leit da kata ka jingmut, ki la iohi ia ka kambah jong U Trai.

4. Ki ksuid ki ithuh ia ka iktiar U Jisu:

Kaba sngewtynnad bad sngewphylla shuh shuh ka long ba wat ki ksuid ruh ki ithuh ia ka iktiar U Jisu. 

Ha ka gospel u MATHAIOS 8:28-34 la iathuh ia ngi ba ynda U Jisu u la wan sha shiliang sha ka ri ki Gadara, u la ia kynduh ia arngut ki briew kiba shong ksuid. Bad haba kine kiba shong ksuid ki la iohi ia U Jisu, ki la kyrpad lypa ia U Jisu ba un nym pynshitom ia ki, hynrei ba un shah ba kin leit bsut ha ka shi kynhun ki sniang. Kumta ngi iohi U Jisu u la shah ia ki, bad uta u ba shong ksuid ruh u la ioh khiah naduh kata ka por. 

Balei ki ksuid ki la kyrpad lypa ia u wat haba um pat shym la ong eiei ia ki? 

Namar ki ithuh ia u kum uta u ba don ka iktiar, ba lada u ong ia ki ba kin mih noh na uno uno u briew ne kano kano ka jaka ba ki la shong, ki hap ban mih. Kata ka dei ka jingmut. 

Hangne ka don ruh ka jinghikai: Lada wat ia ki ksuid ruh haba ki ithuh ia ka iktiar jong u, u dang shah shkor haba ki kyrpad ia u, kaba katno tam lei ia ngi? 

Kumta ka jingkyntu ka long to ngin ithuh ia ka iktiar U Jisu bad ngeit ba u don ka bor baroh ha bneng bad ha khyndew. (MATHAIOS 28:18). Haba u kren ka long, haba u hukum, ka neh skhem. (SALM 33:9). Bad haba ngi don kane ka jingithuh bad ka jingngeit ba U Jisu u don ia ka iktiar ba la ai ha u da U kpa, ngi ruh ngin mad ia ki jingkyrkhu, ka jingpynkhiah, ka jingpyllait bad kiwei ha ka jingim jong ngi.

Ngeit U Trai u la kyrkhu ia ngi lyngba kane ka jinghikai. To ngin ithuh ia U Jisu kum uta u ba don ka iktiar halor baroh. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copying @ Jester Mawlong | 25-9-2021