Ka jingsngew ieit bad ka jingkmen U Ïoannis ia U Gaios

3 ÏOANNIS 1:1‭-‬4

Uta u tymmen basan, ha u Gaïos uba ieit eh, ïa uba nga ieit ha kaba shisha. Ko hep ba-ieit, nga duwai ba ha kiei kiei baroh men roi bad ba men khiah khran, kat kumba ka roi ka mynsiem jong me. Namar nga la kmen shibun eh, haba ki parabangeit ki la wan bad ki la ïaphla babha shaphang kata ka jingshisha jong me, kat kumba me ïaid ha ka jingshisha. Ngam don ka jingkmen ba kham khraw ïa kane keiñ, ba ngan ïohsngew ba ki khun hep jong nga ki da ïaid ha ka jingshisha.

Ha ka dkhot ba nyngkong ngi iohi kumno ba u apostol Ïoannis u la phah ia ka shithi  sha u Gaios ban pynpaw ia kata ka jingsngewieit eh ia u. Bad ha ka dkhot ba ar ngi iohi ba u da kyrkhu kyrdoh ruh ia u Gaios ba un roi, un khiah khran ha kiei kiei baroh.

Kaei ka daw ba la pynlong ia u Ïoannis ban sngewieit eh ia u Gaios?

Ka daw ka dei namar ba u Gaios u dei u briew uba iaid ha ka jingshisha. Ngi iohi shuh shuh ha ka dkhot kaba lai bad ba saw ia kata ka jingkmen kaba khraw jong u Ïoannis haba u tip ba ki para bangeit ki iaid ha ka jingshisha. Ym tang na ka bynta U Gaios, hynrei na ka bynta ki bangeit baroh. Kata ka dei kaba ngi iohi ha ka Ktien U Blei.

Ka jingiaid ha ka jingshisha ka da pynkmen eh ia u Ïoannis kum u basan (elder) jong ki Balang ha kito ki sngi, bad nga ngeit ym tang u Ïoannis, hynrei U Blei ruh u kmen.

Kumta ka jingkhot ka long ia ngi ruh kum ki bangeit ha kine ki sngi ba ngin iaid ha ka jingshisha, bad nga ngeit kata kan pynkmen ia U Blei kham tam bad ruh ia kita kiba peit kiba sumar ia ngi, kumba long u Ïoannis.  

Kaei ka jingshisha? 

Ka jingshisha ka dei ka Ktien U Blei. U Jisu hi u batai ia kane ha ka gospel U ÏOANNIS 17:17, To pynkyntang ïa ki da ka jingshisha: ka ktien jong me ka long ka jingshisha.

Haba ong, iaid ha ka jingshisha, ka mut iaid katkum ka jinghikai jong ka Ktien U Blei. Kata ka dei ka jingmut.

Kumno ngi lah ban iaid ha ka jingshisha? 

Ban iaid ha ka jingshisha ka long kaba eh da ka bor briew jong ngi, hynrei haba ngi shah ha ka jingialam U Mynsiem Bakhuid, U Mynsiem un pynlah ia ngi ban iaid. U Jisu u ong ba ynda la wan ma U, U Mynsiem ka jingshisha, un ialam ia phi sha ka jingshisha baroh. 

ÏOANNIS 16:13

Hynrei, ynda u la wan ma u, U Mynsiem ka jingshisha keiñ, un ïalam ïa phi sha ka jingshisha baroh: namar un ym kren na lade, hynrei, ïa kiei kiei ruh katba un ïohsngew, un kren, bad un pynpaw ha phi ïa kiei kiei ruh ki ban sa wan.

Haba U Mynsiem u ialam ia ngi, un nym ialam shabar na ka Ktien U Blei, hynrei un ialam katkum ka Ktien jong U Blei, un pynshai, un pynsngewthuh ia ngi ia ka jingshisha ka Ktien U Blei. Bad haba ngi kohnguh ia kata, ka pynkmen ia U Blei.

Balei ki briew kim lah ban iaid ha ka jingshisha? Dei namar ba kim shah ba U Mynsiem Bakhuid un ialam ia ki. Ki iaid ha la ka jong ka mon bad ka jingpyrkhat jong ki.

Ka jingmih na ka jingiaid ha ka jingshisha.

Kata ka jingshisha ka pyllaitluid ia ngi. U Jisu u ong ia ki Jiw kiba la ngeit ha u, ba lada kin iaisah (iaid) ha ka Ktien jong U kaba long ka jingshisha, kin long ki synran ba shisha jong U bad ba kata ka jingshisha kan pyllait ia ki na kano kano ka jingshah teh mraw, kham tam na ka pop bad ka hukum.

ÏOANNIS 8:31-32

Namar kata, U Jisu u la ong ha kita ki Jiw kiba la ïangeit ha u, “Lada phi ïaisah ha ka ktien jong nga, phi long ki synran jong nga da shisha; bad phin ïoh ithuh ïa kata ka jingshisha, bad kata ka jingshisha kan pyllait noh ïa phi.”

Kane ka long ka sharing ba lyngkot na ka Ktien U Blei. Ka jingkyntu ka long, to ngin iaid ha ka jingshisha ba long ka Ktien U Blei da kaba shah ba U Mynsiem un ialam bad pynshaitbor ia ngi bad ngin iohi ba kata ka jingshisha kan pyllaitluid ia ngi.

Follow me on YouTube

U Blei un kyrkhu ia phi. Amen

Copyright © Jester Mawlong | Sept 8, 2021