MATHAÏOS 16:13-17
Haba U Jisu u la wan sha ki phang ka Kaisaria Philippi, u la kylli ïa ki synran jong u, u da ong, “Ki briew ki ong uei ïa nga, U Khun u briew?” Ki la ong te, “Don kiba ong u Ïoannis u Nongpynbaptis, kiwei te, u Elias, bad kiwei pat, u Jeremaïah lane uwei na ki nongïathuhlypa.” U la ong ha ki, “Phi te phi ong ba nga long uei?” U Simon Petros u la ïathuh bad u la ong, “Me long U Khrist, U Khun U Blei ba-im.” U Jisu te u la ïathuh bad u la ong ha u, “Suk ma me, ko Simon u khun u Jonah, naba ka doh bad ka snam kam shym la pyni ïa kata ha me, hynrei, U Kpa jong nga uba ha bneng.
Ha kawei ka sngi, U Jisu u la kylli ia ki synran jong u kumno ki briew ki ong shaphang jong u. Kumta ki synran jong u ki la pyni la ka jong ka jong ka jubab, ki da ong, Don kiba ong u Ïoannis Nongpynbaptis, don kiba ong, u Elias (Elijah), don kiba ong, u Jeremiah lane uwei na ki nongiathuhlypa. Nangta ngi iohi U Jisu u la kylli pat ia ki, Phi te phi ong ba nga long uei?
U Jisu u kwah ba ki synran jong u kin da tip shai shaphang jong u, U long uei? Um kwah ba kin shu ia bud ia u, kumba kitei kiwei ki ia bud bad ki ong shaphang jong u khlem da tip tikna uei u long? Dei namar kata ka daw kita hajar hajar ki briew kiba la ia bud ia u, ha kaba kut ki phaidien bad ki iehnoh ia u. Hynrei kaba sngewtynnad ka long haba la kylli kumta ia ki, uwei na ki synran jong u, u Petros u la jubab ban ong, "Me long U Khrist, U Khun U Blei ba-im".
Kane ruh ka long ka jingkylli na ka bynta jong ngi. Kumno ngi sngewthuh bad ngi tip shaphang U Jisu. Hato ngi tip ia u ba u long tang kum u Ïoannis Nongpynbaptis, uba shu pynbaptis ia ki briew ia ka kylla kaba mut? Hato ngi tip ia u ba u long tang kum u Elijah, uba shu leh ki kambah? Hato ngi tip ia u ba u long tang kum u Jeremiah, uba shu iathuhlypa? Ne ngi la ithuh ia u kum uta U Khrist, U Khun U Blei ba-im?
Lada ngi dang ithuh ia U Jisu tang kumba kitei ki briew haneng ki ithuh, ka dang don ka jingma kaba khraw, kaba ha kano kano ka por ngi dang lah ban phaidien bad iehnoh ia u, bad ngin duh ruh ia shibun ki jingkyrkhu ba U Khrist u don na ka bynta jong ngi. Ngi donkam ban ithuh ia U Jisu kumba u Petros u ithuh, ngi donkam ban ioh ia ka jingpynpaw kumba u Petros u la ioh, ban ithuh ia U Jisu kum uta 'U Khrist, U Khun U Blei ba-im'.
Ngin ia peit ha kane ka por, balei ba ngi donkam ban ithuh ia u kum U Khrist, U Khun U Blei ba-im. Kaei ka jingmut bad kaei ka jingkyrkhu?
Ka mut aiu Khrist? Khrist ka wan na ka ktien Greek 'Christos' kaba mut ba la sleh. Bad haba la pynkylla sha ka Hebru ka long 'Messiah'. Haba ong me long U Khrist, kamut me long uba la pynsleh jong U Blei. Lada ngi pule ha ka Bible ngin shem ba ia U Jisu la pynsleh da U Blei U Kpa. Balei la pynsleh ia u, bad kaei ka jingthmu?
Ban sngewthuh ia kane ngin pule na ka kitab u Isaïah.
ISAIAH 61:1-3
U Mynsiem U Trai U Blei u ha nga; naba U Trai u la pynsleh ïa nga ban ïalap ïa kiei kiei ki babha ha ki bajemnud; u la phah ïa nga ban spaiñ ïa kiba la pait dohnud, ban ïalap ïa ka jingpyllait noh ha kiba la ring mraw, bad ïa kaba plie ïa ka byndi ha kiba la khum; ban ïalap ïa ka snem kaba diang hun ka jong U Trai, bad ïa ka sngi ka jingpynhiar kput U Blei jong ngi; ban pyntngen ïa ki basngewsih baroh; ban buh ha ki basngewsih ha Seïon, ban ai ha ki kaba sien syntiew ha ka jaka ki dpei, ka umphniang ka jingkmen ha ka jaka ka jingsngewsih, ka jaiñkup ka jingïaroh ha ka jaka ka mynsiem kaba khia; ba yn khot ïa ki, “ki dieng ka hok,” “u jingthung U Trai,” ba yn pyndonburom ïa U.
Hangne ngi iohi ia ka jingthmu ba la pynsleh ia U Jisu.
1) Ban ialap ia kiei kiei kiba bha: Haba u la wan sha kane ka pyrthei, u la ïalap ia kiei kiei kiba bha jong ka hima U Blei.
KI KAM 10:38
Shaphang U Jisu uba na Nasaret, kumno ba U Blei u la pynsleh ïa u da U Mynsiem Bakhuid, bad da ka bor, uba la ïaid kylleng u da leh babha, bad u da pynkhiah ïa kita baroh kiba la ban shitom da u Soitan; naba U Blei u long ryngkat bad u.
Ym tangba u shu ïalap, hynrei u da leh ba bha ruh.
2) Ban spaiñ ia kiba la pait dohnud: La pynsleh da U Kpa khnang ba un ïoh ban spaiñ ia baroh kita kiba la pait ka dohnud.
Paralok baieit, lehse ha ka jingiaid lynti jong phi ha kane ka pyrthei phi la ia kynduh ia ki jingjia kiba la pynlong ia phi ba phin pait dohnud, kaba tang ma phi hi ba sngewthuh ia kata, nga kwah ban iathuh ia phi ba lada phi ithuh ia U Khrist, une keiñ u don ka bor ban spaiñ ia ka dohnud b'la mong jong phi. Bad kaei kaba donkam ka long ba phin shu wan sha U kumba phi long, un spain ia ka dohnud b'la mong jong phi.
3) Ban ialap ia ka jingpyllait ha kiba la ring mraw: U Khrist u la wan ban ïalap ia ka pyllait ha kita kiba la shah ring mraw ha u Soitan bad ka pop.
Ka kyntien ring mraw ka mut phim pat don ha byndi, hynrei phi dang don ha ka lynti ba la ring mraw jubor ia phi da u Soitan, la ring mraw da ka kyiad, u drugs bad kiwei kiwei ki jingmlien ba sniew bad ka pop. Phi kwah ban phet, phi kwah ban lait, hynrei phim lah da lade. Hynrei lada phi ithuh ia U Khrist un pyllait ia phi na kata ka jingshah ring mraw baroh.
4) Ban plie ia ka byndi ha kiba la khum: U Khrist u don ka bor halor ki bor baroh jong u Soitan. U Jisu u ong ia kine ki kyntien “La ai ha nga ka bor baroh ha bneng bad ha ka khyndew:" MATHAÏOS 28:18
Kane ka pynshisha ba U Khrist u don ka bor ban plie ia kano kano ka byndi bad ban pyllaitluid ia kito baroh kiba la shah khum. Kumta kaei ka jingshahteh mraw jong phi, wan sha U Jisu u ba long U Khrist, un pyllaitluid ia phi na kata ka jinglong mraw.
5) Ban ialap ia ka snem kaba diang hun ka jong U Trai bad ia ka sngi ka jingpynhiar kput U Blei: U la wan ban ïalap ia kiei kiei kiba bha, u la wan ban ïalap ia ka jingpyllait ia kiba la khum, bad u la wan ruh ban ïalap ia ka snem ba diang hun jong U Trai bad ia ka sngi ka jingpynhiar kput U Blei. Hangne don ar tylli kiei kiei.
Kaba nyngkong, u wan ban ïalap ia ka snem kaba diang hun ka jong U Trai. Kane ka kren ia ka jingpynim. Haba ngi ngeit ha U, ngin ioh ia ka jingpynim.
Kaba ar, u wan ban ïalap ia kata ka sngi ka jingpynhiar kput U Blei. Kaba mut lada ngim ithuh ia U Khrist, U Khun U Blei ba-im, ka jingpynhiar kput jong U Blei kan sa long ia ngi.
6) Ban pyntngen ia kiba sngewsih baroh: Ym tang ia iwei ar, hynrei baroh. Kaei ka jingsngewsih ba ngi don, katno ka khia kata ka jingsngewsih? U Khrist, u lah ban pyntngen ia ngi haba ngi ithuh ia U. U lah ban ai bujli da kiei kiei kiba bha bad ba itynnad.
# Ha ka jaka ki dpei - Un ai ha ngi kaba sien syntiew. Ha ka por jong ka testament barim ki briew haba ki lah sngewsih palat ki ju sum ialade da ka dpei, hynrei ka Ktien U Blei ka ong ba haba ngi ithuh ia U Khrist, ia kata ka dpei yn weng noh bad un ai bujli da ki syntiew, kaba kren ia kata ka jingkmen bad ka jingitynnad.
# Ha ka jaka ka jingsngewsih - Un ai da ka umphniang ka jingkmen. Ki briew ynda haba ki lah sngewsih palat kim ju sleh umphniang shuh, ki shu shong tyrkhong beit kumto, hynrei haba ngi ithuh ia U Khrist, un weng noh ia kata ka jingsngewsih bad kan long kumba kyllan umphniang ba sa shisien pat kan shlei ka jingkmen jong U Trai ha ka jingim jong ngi.
# Ha ka jaka ka mynsiem kaba khia - Un ai da ka jaiñkup ka jingïaroh. Ka ju long ka rukom, ki briew haba ki lah sngewsih palat, ka la khia ka jingmut jingpyrkhat bad kim kwah shuh ban rwai ban iaroh, sa tang ka jingud, jingkhñium bad kumta ter ter, hynrei haba ngi wan sha U Trai bad ngi ithuh ia U Khrist, yn ai pat ha ngi ia kata ka jaiñkup ka jingiaroh, yn pynlah pat ia ngi ban rwai ban iaroh ia U Trai namar kaei kaba u la leh ha ngi.
# Ba yn khot ïa ki, “ki dieng ka hok,” “u jingthung U Trai,” ba yn pyndonburom ïa U. Haba ngi ithuh ia U Khrist, ngin long kum ki dieng ka hok, ngin roi, ngin san bad ngin sei soh na ka bynta ka burom jong U.
IAROH IA U TRAI! AMEN
Copyright © Jester Mawlong | Sept 13, 2021
Comments
Post a Comment