Kumno ngin shem ka jingjahthait ha ka mynsiem?

Ka jingthait ha ka met ka wan dei haba ngi kit ia ka jingkit kaba khia ha ka met jong ngi, kumta ban ioh jahthait ka met ngi hap ban wad ia ka jaka shongthait kaba biang, bad lada kam biang ka jaka shongthait, ka met jong ngi kan nym jahthait satia.

Kumjuh ruh ka jingthait ha ka mynsiem ka wan dei haba ngi don ka jingkit kaba khia ha ka jingim jong ngi, bad kata ka jingkit ka lah ban dei ka pop, ki jingkhuslai sngewsih, jingpang jingshitom bad ki jingeh jingjynjar ba bun jaid. Kumta ba ngin ioh ia ka jingjahthait ngi hap ban wad ia ka jaka kaba dei biang kaba lah ban pynjahthait ia ka mynsiem jong ngi. 

Kumta to ngin ia peit kumno ngin shem ka jingjahthait ha ka mynsiem? Ban shem ia ka jingjahthait ha ka mynsiem, don ar tylli kiei kiei kiba ngi hap ban leh.

1. Wan sha U Jisu: Dei tang U Jisu uba lah ban pynjem, ban pynsting ia ka jingkit bakhia jong ka mynsiem u briew. Kynmaw ba kiei kiei ki jong ka pyrthei kin nym lah satia ban ai ka jingjahthait ba janai ia ngi, hynrei dei tang U Jisu. Ki jingjahthait ba ka pyrthei ka ai ki long tang shipor ar-por, ka long thik kumba phi bynshet ia ka jingkit jong ka met ha u maw shongthait, shipor phin sngewjahthait, hynrei sa shiphang phi hap ban kit biang ia kato ka juh ka jingkit. Hynrei ka jingjahthait ba U Jisu u ai ka long bymjukut.

U Jisu u ong ha ka gospel u MATHAÏOS 11:28‭ To wan ha nga, phi baroh ki bathait bad bakhia ka jingkit, te ngan pynjem ïa phi.  

Ha ka khyllipmat ba ngi wan sha U Jisu, ia ka jingkit jong ngi la pynjem, la pynsting. Kumta u nongrwai Salm U ong, To bred ïa la ka jingkit halor U Trai, te un shan ïa me: un ym shah ban pynkhih ïa u bahok lano lano ruh. SALM 55:22

U apostol Petros ruh u ong, da kaba bred halor jong u ïa ka jingkhuslai jong phi baroh, naba u sumar sukher ma u shaphang jong phi. 1 PETROS 5:7

Paralok baieit, kaei ka jingkit bakhia ba phi don, wan bad bret ia kata sha U Jisu te un pynjem ia phi. Wat nym kit sah ha lade, u don u nongiarap uba kloi ban bah lem, phi donkam tang ban shu wan sha U, bad bret ia kata ka jingkit bakhia jong phi baroh ha U.

2. Ioh jinghikai na U: Haba ngi la wan sha U Jisu bad ba ia ka jingkit jong ngi la pynsting, ngi donkam pat ban ioh jinghikai shuh shuh na u kumno ban leh bad ban im khnang ba ngin shem ia kata ka jingjahthait ba pura. 

Lehse phi lah ban sngewphylla ba nga ong kumta, hynrei lada phi peit bha phin shem ba ka long kumta. Nga ngeit phi ju iohi bun bah ki briew kiba lah pdiang ia U Trai, hynrei kim shem ia ka jingjahthait ha ka mynsiem. Ki dang don hi kata ka jingkhuslai, ka jinglynga pisa bad ki jingpyrkhat ba bun jaid. Ka daw ka long namar ba kim shym la ioh jinghikai na U Jisu kumno ban ioh ia kata ka jingjahthait ba shisha.

Ha ka juh ka gospel u MATHAÏOS 11:29 U Jisu u ong, To shim ïa ka lyngkor jong nga ha phi, to hikai ruh na nga; naba nga uba lui lui bad u barit ruh ha ka dohnud: te phin shem kaba jahthait ha ki mynsiem jong phi.

Hangne ngi iohi ia kaei ba U Jisu u ong, 'to shim ia ka lyngkor jong nga ha phi, to hikai ruh na nga'. Ka jingmut jong kane ka long, to leh kumba nga nga leh bad to ioh jinghikai na kata kaba nga nga leh bad haba phi leh kumta, phin shem ia kata ka jingjahthait ba shisha.

Kaei kata kaba U Jisu u leh ne u long kaba la pynlong ia u ba un shem ka jingjahthait wat hapdeng shibun ki jingialeh bad ki eriong ha ka jingim?  

1) Ka jinglui lui: Ha katei ka juh ka dkhot 29 U Jisu u ong, 'nga uba lui'. Ka jinglong ba lui lui ka paw ha U Jisu. Ha kiba bun ki bynta ha ka Bible la batai shaphang ka jinglui lui U Jisu. Bad dei kane ka jinglong lui lui jong U kaba la pynlong ia U ba un jahthait ka mynsiem wat haba ki briew ki kren beiñ, ki bynthiew beiñ, bad kumta ter ter.

2) Ka jingsngewrit: Shuh shuh U ong, 'nga uba rit ruh ha ka dohnud'. Rit ha ka dohnud ka kren ia kata ka jinglong ba sngewrit jong U. Ka Bible ka iathuh ia ngi shaphang ka jinglehrit jong U Khrist, ha kaba u la pynrit ialade haduh ka jingiap ong ka Ktien jong U Blei.  

PHILIPI 2:6-8, "...uba haba u long ha ka dur U Blei, um shym la ñiew eh ïa ka ban bat ban long marryngkat bad U Blei, hynrei, u la pynsuda ïa lade, u da shim ïa ka dur mraw, haba u la jia long ha ka jingsyriem ki briew; te haba la shem ïa u ha ka rukom kum u briew, u la leh rit ïa lade, haba u la jia long uba kohnguh wat haduh ka jingïap, ho-oid, ka jingïap ka diengphna keiñ."

U apostol Paul ha ka dkhot ba san u kyntu ia ki bangeit ba kin ioh ia kaba kum kane ka jingmut. U ong, "To ïoh ïa kane ka jingmut ha phi, kaba la long ruh ha U Khrist Jisu"

Haba ngi ioh ia kaba kum kane ka jingmut, kumta ka jingjahthait ha ka mynsiem kan shu wan la wan hi. U Jisu u ong, 'te phin shem kaba jahthait ha ki mynsiem jong phi'.

Ka jingsngew marryngkat barobor ka wanrah ia ka jingbymhun bad ngin ym sngewjahthait ka mynsiem. Namar haba ngi iohi ba ki briew ki leh kumto, lah wit ka mynsiem, balei ba u leh kumto, ne kumta. Dei namar kata, ngi donkam ban ioh jinghikai na ka rukom im U Khrist, kata ka jinglui lui bad ka jingsngewrit. Bad haba ngi leh kumta, ngin shem ia ka jingjahthait kaba janai ha ka mynsiem jong ngi.

U Jisu u pynkut da kaba ong, "Naba ka lyngkor jong nga ka long kaba jem, bad ka jingkit jong nga kaba sting." Kaba mut, to leh maphi ruh kumjuh kumba nga nga la leh, namar kaei kaba nga leh kam long satia kaba eh (khia) hynrei ka long kaba suk eh kaba phi ruh phi lah ban leh.

U Jisu u long ka nuksa ba bha tam kumno ban shem ia ka jingjahthait ha ka mynsiem. Dei namar kata kadaw u nongthoh sha ki Hebru u ong, da kaba khmih sha U Jisu U Nongpynlong bad U Nongpynjanai ïa ka jingngeit jong ngi, uba namar kata ka jingkmen ïa kaba la buh ha khmat jong u, u la shah ïa ka diengphna, u da ibeiñ ïa ka jinglehrain, bad u la shong ha ka kti kamon ka khet U Blei. HEBRU 12:2

Kane ka long ka jinghikai bad nga ngeit ka la long ka jingkyrkhu ia phi baroh kiba pule. Ka jingkhot bad ka jingkyntu jong nga ka long, to ngin wan sha U Jisu bad ioh hikai ruh na u khnang ba ngin ioh jahthiait ha ka mynsiem jong ngi.

Follow me on YouTube

U Blei un kyrkhu. Amen

Copyright © Jester Mawlong | Sept 9, 2021