¹Namar kata, nga, u nongsah byndi ha U Trai, nga kyrpad ïa phi ban ïaid kumba dei ïa kata ka jingkhot da kaba la khot ïa phi, ²da ka jingsngewrit bad da ka jingjemnud baroh, da ka jingïaishah-slem, da kaba ïaishah paralok hi ha ka jingïa-ieit; ³da kaba ïaleh minot ban bat ïa ka jinglong kawei jong U Mynsiem ha ka jingkhum ka jingsuk. EPHESOS 4:1-3 KHB
U Apostol Paul u kyrpad ia ki bangeit ba ki dei ban ïaleh minot ban bat ïa ka jinglong kawei hapdeng para bangeit. Ka long kaba donkam ba ngin sngewthuh ba ka jinglong kawei ka dei kaba U Trai Jisu ruh u angnud. Mynba u dang don bad ki synran u la duwai na ka bynta jong ki ba kin ia long shi tylli, kumba ma U bad U Kpa ki ia long shi tylli. (Ïoannis 17:21-23). Pynban haba ngi peit da ki khmat briew jong ngi, ngi i ba ka long kaba eh ban poi sha kata ka jinglong kawei, shibun ki jingiapher ki don. Dei namar kata kadaw u Paul u ong ïaleh minot, ïaleh shitom. Kumba long kano kano ka jingialeh, ban poi sha katei ka thong jong ka jingjop hap ban ïaleh, kumta ruh kum ki bangeit ban ngin poi sha katei ka thong jong ka jinglong kawei ngi hap ban ïaleh.
Kaei kata ka rukom ïaleh kaba lah ban pynpoi ia ngi sha ka jinglong kawei? To ngin ia peit na katei ka dkhot ba la lamphrang haneng. EPHESOS 4:1-3
1. Ka jingsngewrit: U mawjam uba nyngkong ka dei ka jingsngewrit. Lada kam don ka jingsngewrit yn nym lah satia ban ia poi sha ka jinglong kawei ha ka Balang kaba long ka met U Khrist. Lada uwei ruh u sngewkhraw, uwei ruh u sngewkhraw, kan don beit ka jingiaprat. Ïa kane ngi iohi wat ha ka jingim jong ki synran, ka don ka jingïasaid, mano ba kham khraw bad kumta ter ter.
MATHAÏOS 18:1-4 KHB
Mynkata ki synran ki la ïawan ha U Jisu, ki da ong, “Uei uba kham khraw te ha ka hima ki bneng?” Te haba U Jisu u la khot ïa u khynnah, U la buh ïa u hapdeng jong ki, bad u la ong, “Shisha nga ong ha phi, lada phim kylla, bad phim long ruh kum ki khynnah, phin ym leit bsut ha ka hima ki bneng. Namar kata, uno uno ruh u ban pynrit ïa lade kum une u khynnah, uta u long uba kham khraw ha ka hima ki bneng.
Kumta ngi hap ban ïaleh ban jop ia ka jingsngewkhraw da kaba ioh ia ka jingmut U Khrist kaba long ka jingmut ba sngewrit.
PHILIPI 2:5-11
To ïoh ïa kane ka jingmut ha phi, kaba la long ruh ha U Khrist Jisu: uba haba u long ha ka dur U Blei, um shym la ñiew eh ïa ka ban bat ban long marryngkat bad U Blei, hynrei, u la pynsuda ïa lade, u da shim ïa ka dur mraw, haba u la jia long ha ka jingsyriem ki briew; te haba la shem ïa u ha ka rukom kum u briew, u la leh rit ïa lade, haba u la jia long uba kohnguh wat haduh ka jingïap, ho-oid, ka jingïap ka diengphna keiñ. Naba kumta te, U Blei u la kyntiew eh ïa u, bad u la ai ha u ïa kata ka kyrteng kaba halor ka kyrteng baroh; ba ha kata ka kyrteng U Jisu, ka khohsiew baroh kan ïoh dem khrup, ki jong kiba ha ki bneng bad ki jong kiba ha ka khyndew bad ki jong kiba hapoh ka khyndew keiñ, bad ba u thylliej baroh un ïoh phla shynna ba U Jisu Khrist u long U Trai, ïa ka ban pyndonburom ïa U Blei uba U Kpa.
Ngi iohi hangne shaphang U Khrist, kumno ba ka jingpynrit, ka wanrah ia ka jingpynkyntiew pynban. Kane ka jingpynkyntiew kam dei kata ka jingpynkyntiew jong u briew, hynrei ka dei kata ka jingpynkyntiew jong U Blei.
U Paul u ong shuh shuh, wat leh ei ei ruh da ka jingïapyneh lane da ka jingsarong; hynrei, da ka jingsngewrit da ñiew phi ïa ki paralok kiba kham bha ban ïa lade. PHILIPPI 2:3 KHB
2. Ka jingjemnud: Ka jingjemnud ka long sa kawei pat kaba ngi hap ban ïaleh. Ka dohnud kaba eh barobor ka pynlong ia ka jingiakhlad, ngi donkam ban shah ia U Mynsiem Bakhuid ba un pynjem ia ka dohnud jong ngi. Kawei na u soh jong U Mynsiem ka long ka jingjemnud (Gal 5:22), bad la ai khnang ia U soh jong U Mynsiem ban pynlong ia ki bangeit ba ki lah ban poi sha ka jinglong kawei.
U Jisu u hikai u ong "Suk kiba jemnud". (MATHAÏOS 5:5). Hynrei u Soitan u hikai "Ban jemnud than ka ban iap". Iano phin kohnguh? To ngin kohnguh ia U Trai.
3. Ka jingiaishah-slem: Ban poi sha ka jinglong kawei ka donkam ruh ka jingiaishah-slem, ban iai shah paralok hi. Bunsien namar ka jingbym don ka jingiaishah, uwei ruh um lah shah, uwei ruh um lah shah, uwei um pyndem, uwei ruh um pyndem, kumta ka wan noh ka jingiapait iapra. Dei namar kata kadaw, ngan ong biang, U Blei uba tip lypa, uba iohi ia ki jingtlot jong ngi u ai ia U soh jong U Mynsiem, bad ha une u soh jong U Mynsiem ka don ka jingiaishah-slem (Gal 5:22). Da ka doh hi ngin nym lah ban ïaishah, kan don beit ka jingsngew ksan, balei u leh kumto, balei u kren kumto bad kumta ter ter, hynrei da ka bor jong U Mynsiem Bakhuid ngi lah ban leh ia kata
4. Ka jingiaieit: Nalor kitei ba la ong haneng, ngi donkam ruh ka jingiaieit, kata ka jingiaieit kaba kum shipara.
1 PETROS 3:8-9
Te ha kaba wai noh, to da long baroh kiba ïamut kajuh, kiba ïashah lem, kiba ïa-ieit kum shipara, kiba jemnud, kiba sngewrit: ym kiba leh markylliang ïa ka basniew namar ka basniew, lane ïa kaba krenbeiñ namar kaba krenbeiñ; hynrei, da kumwei keiñ kiba kyrkhu; haba tip ba sha kane khnang la khot ïa phi, ba phin da ïoh ïa ka jingkyrkhu.
Haba ia ieit kum shipara ka mut la ka long kumno kumno ruh ieit, ngi lah ban don ki jinggbakla, jingtlot jingduna, hynrei ieit, kata ka dei ka jingmut ieit kum shipara. Dei tang ka jingieit kaba lah ban bat, ban tehsong ia ngi. U Paul u ong "bad nalor kine kiei kiei baroh, to phin kup ïa ka jingïa-ieit, kaba long ka panpoh jong ka jingpynjanai." KOLOSSAI 3:14
Ka ban pynjanai ia kiei kiei baroh dei ka jingieit. Ka long kum u panpoh uba bat, uba pynskhem triang, bad uba pynlong ban ym khih shuh.
To ngin duwai ba U Blei un pyndap ia ngi ki bangeit da ka jingieit jong U Blei. Ka Bible ka ong ka jingieit ka tap noh ia bun byllien ki pop.
1 PETROS 4:8 KHB
Hynrei, nyngkong eh ïa kiei kiei baroh phin ïaibat ïa kata ka jingïa-ieit bashitrhem paralok hi; naba ka jingïa-ieit ka tap noh ïa bun byllien ki pop.
To U Blei un kyrkhu ia phi ki para bangeit baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong || August 10, 2021
Comments
Post a Comment