EPHESOS 4:29 KHB
Wat ai ba kano kano ka ktien sih kan mih na ka shyntur jong phi, hynrei, tang kata kaba bit ïa ka ban tei ïa kaba donkam, ba kan ai ka jingaiei ïa kita kiba ïohsngew.
U Paul u ong ia ki bangeit ha Ephesos ba kim dei ban kren kano kano ka ktien sih na ka shyntur jong ki, hynrei ban kren tang ia kata ka ban tei bad ka ban ai jingaiei ia kiba iohsngew.
Kaei kane ka ktien sih ba u Paul u ong ia ki bangeit ba kim dei ban kren? Kane kam dei satia kato ka ktien sih ba ju kren da ki briew bym tip Blei lane ki nongbuaid bad kiwei ba ngi ju iohsngew (kato lei ka lah long sha jngai lypa), hynrei ka mut ia kano kano ka ktien bym long jingkyrkhu, kaba pynnoh mynsiem, bad khamtam kaba pynmong ia kiwei, kata ka dei ka jingmut.
Ha ka Bible Khasi translation barim ka ong ka ktien sih, katba ha ka Bible Khasi translation bathymmai ka ong ki ktien pynmong. Nga kham sngew iahap ia kane ka translation bathymmai ha kane ka bynta.
EPHESOS 4:29 KHASICLBSI
Wat kren ïa ki ktien pynmong, hynrei, tang ki ktien kiba long ka jingïarap, kita keiñ kiba tei bad kiba ïadei tang ïa kata kaba donkam, khnang ba kaei kaba phi kren kan long kaba bha ïa kita kiba shahshkor ïa phi.
Ka long kaba donkam haduh katta katta ba ngin sumar bha ia ka rukom kren jong ngi, ioh ba kumno re kumno ka rukom kren jong ngi kan kylla long pynban ka ktien sih ba la ñiew ha ka Ktien U Blei. Ka ktien kaba pynmong ia kiwei. Lehse ngi lah ban ong, oh kaba dei te, nga hap ban kren kumta kumta, hynrei watla ka dei ruh, ngan ong biang, ngi hap ban sumar ba kan ym kylla ktien sih. Lada ka dei ban kren, lada ka dei ban pynbeit iano iano ruh hap ban kren ha ka jingieit, ka ban ym pynmong lane ktah ia ka jingsngew (sentiment) jong u briew.
EPHESOS 4:15 KHASICLBSI
Pynban, da kaba kren ïa ka jingshisha ha ka mynsiem ka jingieit, ngi dei ban san ha ki rukom baroh ha U Khrist uba long u khlieh.
Ka jingkren ia ka jingshisha ha ka jingieit ka pyni ia ka jinglong san ha U Khrist. Kumta ai ba ka jingkren jong ngi kan long kaba jali ja-um, ba la pynthiang da ka mluh kumba ong ka Ktien jong U Blei.
KOLOSSAI 4:6 KHB
Ai ba ka jingkren jong phi ha la ka sngi kan long da kaba jali ja-um, ba la pynthiang da ka mluh, ba phin ïoh tip kumno phi dei ban ïa-pynphai ktien ha uwei pa uwei baroh.
Ki ktien jali ja-um kim dei satia kito ki ktien pynbang pynthiang, pyniaroh arsap, hynrei ka dei kata ka ktien kaba ngi kren bad haba ki briew ki iohsngew kan pynum ia ka mynsiem jong ki, kan ai ka jingkyrmen, kan pynshaitbor (energise) ia ki. Bunsien nga ju iohsngew ia ki jingkren kiba shu dum dam, dum dam, muk mak, muk mak, bad phin shem kito ki jingkren ki pynlong ia kiba iohsngew ban shu jem wait ly-wait, shu tyrkhong bad dur bad dar, bad ynda kin ia khlad na phi kin ia khlad da ka jingsngewsih bad jingbabe shi lynter lynti. Hynrei ka jingkren pat kaba dei da ka jingieit, ki briew kiba iohsngew ynda haba kin ia khlad ruh kin da sngew ioh bor kin da sngew shait sngew khlain, kata ka dei kaba ngi ju shem.
PROBERB 12:18 KHB
Don kiba kren thurmur kum ki jingdung ka wait: hynrei, u thylliej jong u bastad u long ka jingkhiah.
PROBERB 16:24 KHB
Ki ktien kiba bang ki long kum ka rewngap, kiba thiang ïa ka mynsiem, bad ka jingkhiah ïa ki shyieng.
To ngin ioh ia ka dohnud kaba stad, ka ban hikai ia ka rmiang shyntur jong ngi ban kren ia kiei kiei ki ban tei bad ki ban ai ka jingaiei ia kiba iohsngew.
PROBERB 16:23 KHB
Ka dohnud u bastad ka hikai ïa ka shyntur jong u, bad ka pynlang ïa ka jinghikai ha ki rmiang shyntur jong u.
Shuh shuh ka Proverb ka ong, u thylliej u bajem u pynkheiñ ïa ka shyieng. PROBERB 25:15 KHB.
Ka jingkren da ka jingieit bad jingstad phin shem watla u briew u eh katno katno ruh un jem toiñ, katba ka jingkren kaba eh, kaba khar khar kan nang pyneh ia u briew. Hooid ngi lah ban sngew jop pyrthei, ba ngi lah ioh ban kren kumta kumta ia kaei ba ngi sngewdei ban kren, hynrei ha ka pyrthei ba kynja mynsiem ngi lah rem, la ñiew ia ki ktien jong ngi kum ki ktien sih.
Kumta to ngin duwai kumba u David u duwai, To ai ba ki ktien ka shyntur jong nga bad ka jingpyrkhat ka dohnud jong nga kin long ba la pdiang sngewbha ha khmat jong me, A Trai, u mawsiang jong nga, bad u nongsiewspah jong nga. SALM 19:14 KHB
Ai ruh ba ki ktien jong ngi kiba ngi kren kin long kum ki sohphoh ksiar ha ki shang rupa. PROBERB 25:11 KHB
To U Blei un da kyrkhu eh ia phi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong August 7, 2021
Comments
Post a Comment