Ban ai ia U Mynsiem Bakhuid ha u briew hadien ba u kylla bamut bad ngeit ia U Jisu ka dei ka bynta jong U Blei, hynrei ban ioh ia ka jingpyndap U Mynsiem Bakhuid ka dei ka bynta jong u briew. Kumta u bangeit um dei ban sngewhun noh tangba u lah pdiang ia U Mynsiem Bakhuid, hynrei u donkam ban iai thrang bad iai sliang ia ka jingpyndap U Mynsiem Bakhuid.
Ki bangeit ha Ephesos haba ki lah kylla bamut bad ngeit ia U Jisu la shon shab ia ki da U Mynsiem Bakhuid.
EPHESOS 1:13
Ha u, ma phi ruh, haba phi la ïohsngew ïa ka ktien ka jingshisha, ka gospel ka jingpynim jong phi; ha uba, haba phi la ngeit ruh, la shon shab ïa phi da U Mynsiem Bakhuid ka jingkular. (cf. Eph 4:30).
Ha ka lynnong ba kham sha khmat u Paul u kyntu ia ki, ba kim dei ban sngewhun noh tangba ki lah iohpdiang ia U Mynsiem Bakhuid, hynrei ki dei ban thrang ia ka jingpyndap U Mynsiem Bakhuid.
EPHESOS 5:18
Bad to wat long phi kiba buaid da ka Waiñ, ha kaba don ka jingkhynwin, hynrei, to long kiba la dap da U Mynsiem.
Kane ka jingkyntu ban long kiba la dap da U Mynsiem ka dei ruh na ka bynta jong ngi iwei pa iwei ki bangeit ha kine ki sngi. Ngi donkam ban long kiba la iai pyndap da U Mynsiem, ym ba ngin shu sngewhun bad ban shu sah kut hajuh.
Ngin ia peit mynta ia ka jingmih na ka jingdap Mynsiem.
1) Ka jingdap Mynsiem ka pynkylla ia ka jingim jong u bangeit:
Kumba ngi tip, naduh ba u Adam u la hap noh ha ka pop, u briew u la duhnoh ia ka jinglong kaba nyngkong ba U Blei u la pynlong ia u, kumta ka jinglong jong u briew ka la kylla sniew noh pateng la pateng, la ka long ha ka rukom im, ka kren ka khana, bad kumta ter ter (Rom 5:12), bad phin shem wat haba u briew u la kylla bamut ruh kine ki jinglong ki iai khie im ha ka jingim u briew, kumba ngi iohi ha ka shithi u Paul sha ki EPHESOS 4:25-32, wat la ki lah don ia U Mynsiem Bakhuid ruh hynrei ki ktien sih, ki ktien bym long ki dang mih hi, kita ki soh jong ka doh ki dang iai paw hi, dei namar kata kadaw u Paul u ong ia ki ba ki dei ban long kiba la dap da U Mynsiem. Dei tang ka jingdap Mynsiem kaba lah ban pynkylla.
EPHESOS 5:18-21
Bad to wat long phi kiba buaid da ka Waiñ, ha kaba don ka jingkhynwin, hynrei, to long kiba la dap da U Mynsiem; da kaba ïakren paralok ha ki salm bad ha ki jingrwai bad ha ki jingrwai bakynja mynsiem, da kaba rwai bad kaba kynud da ka dohnud jong phi ha U Trai; da kaba ainguh ha la ka sngi namar kiei kiei baroh ha U Blei uba U Kpa, ha ka kyrteng U Jisu Khrist uba U Trai jong ngi; da kaba ïakohnguh paralok ha ka jingsheptieng ïa U Khrist.
Hangne ngi iohi kumno ba ka jingdap Mynsiem ka pynkylla ia u briew, na ka jinglong kaba shu ia khñium ia ud, sha ka jinglong ba dap jingiaroh bad jingsngewnguh, na ka jinglong kaba ia pyneh, sha ka jinglong ba ia kohnguh paralok, bad kumta ter ter.
2) Ka jingdap Mynsiem ka pynlah ia ki bangeit ban phla ia U Khrist:
Ki synran U Jisu haba la pyndap ia ki da U Mynsiem Bakhuid, ki la ieng da ka jingshlur ban ïalap bad ban phla ia U Khrist. U Petros wat haba la kem ia u bad la rah ha khmat ka dorbar hynrei namar ba u long uba la dap da U Mynsiem um shym la sheptieng ban phla ia U Trai wat ha kata ka dorbar.
KI KAM 4:8-12
Ynda kumta, u Petros, uba la dap da U Mynsiem Bakhuid, u la ong ha ki, “Ko phi ki nongsynshar jong u paidlang, bad ki tymmen basan, lada yn kylli ïit ïa ngi ha kane ka sngi shaphang kata ka kam babha ïa uta u briew u ba-dkoh, kumno ba la pynkhiah ïa u, to tip phi baroh, bad u paidlang Israel baroh, ba da ka kyrteng U Jisu Khrist uba na Nasaret, ïa uba la sahnarphna ma phi, ïa uba U Blei u la pynmih pat na ki baïap, da uta keiñ, une u ïeng hangne ha khmat jong phi uba la khiah khran. Une u long uta u maw ïa uba la kyntait beiñ noh da phi ki nongtei, ïa uba la pynlong ha khlieh ka dong. Bad ym don ka jingpynim hano hano ha uwei pat: naba ym don kawei pat ka kyrteng hapoh ka bneng, ïa kaba la ai hapdeng ki briew, da kaba ka dei ba yn pynim ïa ngi.”
Ngi iohi wat hapdeng ka jingpyrshah bad ka jingbyrngem kaba jur, hynrei ki la iai bteng beit ban ïalap bad ban phla ia U Trai.
KI KAM 4:29-31
Te mynta, A Trai, to khmih ha ki jingbyrngem jong ki, to ai ruh ha ki shakri jong me ban kren ïa ka ktien jong me da ka jingsngewshlur suda, da kaba me kner noh ïa la ka kti ban pynkhiah; bad ba yn ïoh leh ïa ki dak khyllah bad ki jingphylla da ka kyrteng U Khun Bakhuid jong me U Jisu.” Ynda ki la lah duwai te, la pynkhynñiuh ïa kata ka jaka ha kaba ki la ïaseng, bad la pyndap ïa ki baroh da U Mynsiem Bakhuid, bad ki la kren ïa ka ktien U Blei da ka jingsngewshlur.
3) Ka jingdap Mynsiem ka pynlah ban leh ki kambah bad ki dak khyllah:
Ngi pule ha ka kitab Ki Kam ki Apostol ngi iohi barobor ia kane, haba la pyndap ia ki da U Mynsiem Bakhuid ki la leh ia ki kambah bad ki kam phylla ba bun jaid. U Petros bad u Ioannis hadien ba la pyndap ia ki da U Mynsiem Bakhuid ki la pynkhiah ia u briew ba dkoh naduh ka kpoh ka kmie uba ju shong khrong ha khmat jong ka temple kaba ki khot "Ka Baitynnad". (Ki Kam 3:1-10)
U Paul u ba la dap da U Mynsiem, haba u kren, ka dak phylla ka jia.
KI KAM 13:8-12
Hynrei, uta u Elimas u nongleh byrtong (naba kumta la batai ïa ka kyrteng jong u), u la ïaleh pyrshah ïa ki, u da pyrshang ban pynphai noh ïa uta u lyngskor na kata ka jingngeit. Hynrei u Saul, ïa uba la khot “Paul” ruh, uba la dap da U Mynsiem Bakhuid, u la peit shaiñ ha u, bad u la ong, “A uba dap da ka buit arsap suda, bad da ka buit bymman suda, me u khun u Soitan, me u nongshun ka hok baroh, men ym wai shuh ban pynbakla ïa ki lynti babeit jong U Trai? Mynta te ha khmih, ka kti U Trai ka long halor jong me, bad men sa matlah, khlem da ïohi ïa ka sngi katto katne por.” Te shisyndon la hap ha u, u lyoh bad ka jingdum; te u la leit kylleng u da wad ïa ki ban btin ïa u na ka kti. Te uta u lyngskor, haba u la ïohi ïa kaba la leh, u la ngeit, u da sngewkyndit namar kata ka jinghikai jong U Trai.
4) Ka jingdap Mynsiem ka pynlah ia ki bangeit ban shah shitom na ka bynta U Khrist:
Ngi pule shaphang u Stephan kumno haba la kem ia u namar ba u phla shaphang U Jisu, bad la lynthem maw ia u, hynrei namar ba u dei u briew u ba la dap da U Mynsiem, um shym la sheptieng, um shym la len noh ia U Jisu wat ha kaba kum kata ka por kaba eh, hynrei u la kmen pynban, bad ha ka jaka ba un iohi ia kata ka jingshyrkhei jong ka jingiap, u la iohi pynban ia ka burom U Blei.
KI KAM 7:54-56
Te haba ki la ïohsngew ïa kine kiei kiei ruh, ki la otshla ha ki dohnud, bad ki la kyr-iat bniat ïa u. Hynrei, ba u long uba dap da U Mynsiem Bakhuid, haba u la khmied shaiñ sha bneng, u la ïohi ïa ka burom U Blei, bad ïa U Jisu ba U ïeng sha ka kti kamon U Blei, bad u la ong, “Ha khmih, nga ïohi ïa ki bneng ba la plie, bad ïa U Khun u briew ba U da ïeng sha ka kti kamon U Blei.”
Para bangeit ngi donkam ban long kiba la dap da U Mynsiem khnang ba ngi lah ban shah shitom na ka bynta U Khrist. Ngim lah ban tip lypa kaei ka ban jia nangne shakhmat, ngi donkam ban long kiba la iai pyndap da U Mynsiem Bakhuid khnang ba ngin lah ban iai shah ia kiei kiei baroh.
5) Ka pynbit biang ia ngi ban iashem bad U Trai
E.g: Shiphew ngut ki theisotti. MATHAIOS 25:1-13
Ka Bible ka iathuh ia ngi ba U Jisu un sa wan ban shaw noh ia la ki jong sha kata ka jaka kaba u la pynkhreh. 1 THES 4:16-17. U Mynsiem Bakhuid un pynlah ia ngi ban her shajrong. Hallelujah
Kane ka dei ka jinghikai shaphang ka jingpyndap jong U Mynsiem Bakhuid. Ngi la ia peit na ka Ktien U Blei shaphang ki dak jong ka jingdap Mynsiem, bad nga ngeit U Trai u la kyrkhu ia ngi. To ngin long kiba la iai pyndap da U Mynsiem Bakhuid khnang ba ngi lah ban im ka jingim Khristan ba la pynkylla dur noh ia ngi, ba ngi lah ban phla ia U Trai, ban leh ia ki kambah ban pyndonburom ia U Trai bad ba ngi lah ruh ban shah shitom na ka bynta jong U.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 01, 2021
Comments
Post a Comment