Ka Bible ka iathuh ia ngi ba ka Ktien jong U Blei ka long kaba im, kaba don bor, bad kaba kham nep ban ia kano kano ka waitlam arliang syrti, kaba lah ban pei wat shaduh ki bynta ba shapoh tam jong u briew, ka bishar bad ka pynkynduh ia u.
HEBRU 4:12 KHB
Namar ka ktien U Blei ka long kaba im, bad kaba don bor, bad kaba kham nep ban ïa kano kano ka waitlam ar liang syrti, bad kaba pei haduh kaba pynkhlad ïa ka jingim bad ïa ka mynsiem, ïa ki mat bad ïa ka khleiñ shyieng ruh, bad kaba bishar ïa ki jingmut bad ïa ki jingthmu ka dohnud.
Manba ngi kren ia ka Ktien jong U Blei ka don ka bor, la ka long ba ngi kren da ka shyntur ne lyngba ka jingthoh lane da kano kano ka rukom ruh. Ka don ka bor ban ktah, ban pynkynduh ia ki briew kiba iohsngew ia ka, hynrei ka shong pat ha ki briew kumno ki leh (respond).
To ngin ia peit na ka Bible kumno ki briew ki leh (respond) haba la dung ngak ia ki da ka Ktien U Blei.
1. Ki kylla bamut:
KI KAM 2:37-38 KHB
Te haba ki la ïohsngew ïa kane, la dung ngak ïa ki ha la ka dohnud, bad ki la ong ha u Petros, bad ha kita kiwei ki apostol, “A para, kumno ngin leh?” Te u Petros u la ïathuh ha ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid.
Ngi iohi haba u Petros u la ïalap ia ka Ktien jong U Blei ha ka sngi Pentecost bad ki briew kiba la iohsngew ia ka jingialap jong u, la dung ngak ia ki ha la ka dohnud, bad haba la dung ngak ia ki, ki la ia kylli ia u Petros kumno ban leh, bad u Petros u ong ia ki ba kin kylla ka bamut, bad kumta kine ki briew ki la kylla bamut bad ngeit ia U Jisu, ong ka Ktien jong U Blei.
KI KAM 2:41-42
Namar kata, ïa kita kiba la pdiang ïa ka ktien jong u, la pynbaptis; kumta la pynïasoh ha kata ka sngi sha ka balang kumba lai hajar ki mynsiem. Bad ki la ïaineh skhem ha ka jinghikai jong ki apostol, bad ha ka jingïasyllok, bad ha kaba kdiah kpu, bad ha ki jingduwai de.
Ka long kaba sngewtynnad ban iohi ba kine ki briew ba la dung ngak da ka Ktien U Blei ki la kylla ka bamut. Ngi donkam ia kaba kum kane ka dohnud kaba long la kloi ban kylla bamut haba ka Ktien jong U Blei ka ktah ia ngi.
Ka jingkylla bamut kam dei tang ka jong u nongpop lane tang kata ka jingkylla na ka jingmlien basniew, hynrei ka donkam ruh ban kylla bamut la ha kano kano ka bynta ruh haba ka Ktien U Blei ka dung ngak bad ka ktah ia ngi. Ngi lah ban dei ki bangeit, ki nongialam bad mano mano. Kata ka long kaba donkam, ngim lah ban shu khein dep (ignore) kumto ia ka jingpynkynduh jong ka Ktien U Blei.
2. Ki phet noh (ignore):
Kawei pat kaba ngi iohi ha ka Bible kumno haba ka Ktien U Blei ka dung ngak ia ki, ki leh? Ki phet noh. Ngi iohi ia kane shaphang u samla ba riewspah uba la wan sha U Jisu bad haba U Jisu u la ia syllok ia u bad ba kata ka ktien ba U Jisu u ia syllok ka la dung ngak ia u, uta u samla ba riewspah u la phet noh sngewsih, ong ka Bible.
MATHAÏOS 19:16, 21-22
Ha khmih ruh, uwei u la wan bad u la ong ha U, “Ko Nonghikai babha, ngan leh ïa ka babha aïu, ba ngan ïoh ïa ka jingim bymjukut?” U Jisu u la ong ha u, “Lada me mon ban long janai, to khie leit noh, die noh ïa kiei kiei ruh kat kiba me don, to ai ruh ha ki baduk, men ïoh ka jingkynshew te ha bneng; to wan bud ruh ïa nga.” Hynrei, haba uta u samla u la ïohsngew ïa kata ka ktien, u la leit noh sngewsih, naba u don shibun ki spah.
Une u samla ba riewspah ruh u kylli ia U Jisu kumba kitei ki briew ha ka sngi Pentecost ki kylli, hynrei ka jingiapher ka long, kitei ha ka Sngi Pentecost ki la leh ia kaei ba la batai ia ki ban leh, hynrei une u samla um treh ban leh ia kaei ba la ong ia u ban leh, u la phet noh pynban.
Bun bah ki briew kiba iohsngew ia ka Ktien U Blei bad ki sngewthuh eh ba ka la dung ngak ia ka dohnud jong ki hynrei kim treh ban kylla bad ki shu phet noh lane iehnoh (ignore) kumto. Kane ka long kaei kaei kaba U Blei um sngewtynnad, hynrei haba ka Ktien jong U Blei ka dung ngak, ngi donkam ban kylla bamut, kata ka long ka lynti kaba dei.
3. Ki set la ki shkor bad ki kyr-iat bniat:
Ngi pule ha ka kitab Ki Kam Ki Apostol lynnong ba 6 & 7 ngi shem kumno la kem ia u Stephan bad shuwa ban lynthem maw ia u, u Stephan u la ïalap ia ki, hynrei ngi shem kita ki briew ki la set pynban ia la ki shkor jong ki bad ki la kyr-iat pynban ia la ki bniat.
KI KAM 7:54; 57-58 KHB
Te haba ki la ïohsngew ïa kine kiei kiei ruh, ki la otshla ha ki dohnud, bad ki la kyr-iat bniat ïa u. ….ki la ïapyrta da ka ktien bajam, bad ki la set ïa la ki shkor, bad ki la ïaphet kyrthep da kawei ka jingmut ha u, bad ki la ïashop noh ïa u shabar kata ka shnong, bad ki la ïalynthem maw ïa u: ...”.
Haba ka Ktien U Blei ka dung ngak ia ki, ki la set ia la ki shkor bad ki la kyr-iat ia la ki bniat pyrshah ia u Stephan, kim treh satia wat tang ban sngap ia kaei ba u Stephan u ong.
Don ki briew haba don mano mano ba kren ia ka Ktien U Blei, bad haba kata ka Ktien ka la dung ngak ia ki, ki set ia la ki shkor, kim treh ban pdiang. Don ruh ki briew kiba shun pynban ia uto uba kren ia ka jingshisha ka Ktien U Blei, kumba long kine ki briew ia u Stephan. Kane ka long kaba sniew haduh katta katta.
To ngin nym set ia la ki shkor, to ngin nym kyr-iat ia la ki bniat pyrshah ia kita kiba kren ia ka jingshisha ka Ktien U Blei, to ngin nym buh shun ia ki, hynrei haba ka Ktien jong U Blei ka dung ngak, to ngin kylla bamut. Kata ka long kaba U Blei u sngewbha.
U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 18, 2021
Comments
Post a Comment