Ki dak jong ka jinglong khunlung ha ka jinglong mynsiem

Intro: Ka jinglong khunlung bad ka jinglong rangbah ka don ka jingiapher kaba bak lybak. Ia kane ngi lah ban iohi na ka jinglong ha ka doh, kumno ba ki khunlung ki leh bad ki sngewthuh, bad kumno ba ki rangbah ki leh bad ki sngewthuh. Ki don ki dak ba ngi lah ban ithuh ia kine ar. To ngin ia peit mynta katto katne.

1. Ka jingbym lah ban bsa da lade:

Kawei na ka jinglong khunlung ha ka jinglong mynsiem ka dei ka jingbym lah ban bsa da lade. Kumba long ki khunlung ha ka doh kumta ruh ki long kita ki khunlung ha ka jinglong mynsiem, ki khunlung haba ki thngan ki shu iam, wat haba la buh ia ka jingbam hajan ruh kim nang satia ban bam,  hynrei kiba lah san haba ki thngan ki shim ia ka jingbam bad ki bam da lade. Ki Khristan khunlung haba ki thngan ne donkam eiei ki shu ap ia kiwei ban iarap ia ki, kim lah ban leh da lade, hynrei kiba lah san ki lah ban bsa da lade, da kaba ki shim bad pule ia ka Ktien jong U Blei.

HEBRU 5:12‭ Namar haba la dei ïa phi ban long ki nonghikai, haba khmih ïa ka por, phi donkam pynban ba uno uno un hikai pat ïa phi ïa ki jingsdang ki tynrai banyngkong ki orakl U Blei; bad phi la jia long kiba donkam ïa ka dud, te ym ïa ka jingbam kaba eh. 

Hangne u nongthoh sha ki Hebru u ong ba haba peit ia ka por, lah dei ba phin long ki nonghikai ia kiwei, hynrei phi dang donkam ba kiwei kin hikai ia phi. Kumta to ngin long rangbah ha kaba ngi lah ban bsa da lade ia lade da ka Ktien U Blei.

 2. Ka jingbym lah ban pyniapher ia ki jinghikai:

Ki khunlung ha ka doh kim pat lah ban pyniapher ia ka babha bad kaba sniew, kaba dei bad ka bymdei. Kumta ruh long kita kiba don ka jinglong khunlung ha ka jinglong mynsiem, kim lah ban pyniapher kano ka jinghikai ba dei bad kano ka jinghikai ka bym dei, ki sngap kato ruh sngewdei, sngap sa kato ruh sngewdei, kumta shu shah pynshat kynting ha kita ki jinghikai na kadiang sha kamon, na kamon sha diang, ha kaba kut khlem poi shano shano ruh. Hynrei kiba lah san kim long kumta, ki nang ban pyniapher kano ka jinghikai kaba dei bad kano ka jinghikai ka bym dei katkum ka Ktien U Blei.

HEBRU 5:13‭-‬14

Namar uno uno ba ju bam tang ka dud u long u bymshemphang ïa ka ktien ka hok; namar u long u khunlung. Hynrei, ka jingbam kaba eh ka long ïa ki rangbah, kiba namar ka jingmlien, ki don la ki jingsngewthuh ba la pynmlien ban bishar ïa ka babha ruh bad ïa ka basniew.

U apostol Paul u kyntu shuh shuh ba ngi dei ban long rangbah shisha ha kaba kynja mynsiem khnang ba ngin ym shah pynshat kynting ha ki jinghikai bapher bapher ha kine ki sngi.

EPHESOS 4:14

Ba kumta, ngin ym long shuh ki khynnah, ïa kiba la pynshad kynting bad ba la rong noh kylleng da ka lyer ka jinghikai baroh, da ka buit shalai ki briew, ha ka jingleh sianti, katba kum ka buit sniew ka jinghikai bakla.

Ki jinghikai bakla ki mih na ka por sha ka por, lada ngi long khunlung sah ha ka jinglong mynsiem ngin nym lah satia ban pyniapher, ngin shu sngew dei bad sngew kumjuh hi. Ngi donkam ban long rangbah da kaba ngin ngam jylliew ha ka Ktien U Blei, ban pule bad ït bniah na ka Ktien U Blei da lade, ym ban shu sngap ia kaei ba kiwei ki ong ne batai, kata ka long kaba donkam. Duwai ba U Mynsiem Bakhuid un ai jingshai haba phi pule ia ka Ktien U Blei.

3. Ka jingsngew liang:

Ka jingsngew liang ka dei kata kaba uwei u ong nga dei jong uta uta, uwei pat u ong nga dei jong uta uta kaba mih ryngkat ka jingpihuiñ bad ka jingsarong ba ka jong nga ka kham bha ban ia ka jong utai bad kumta ter ter. 

Ki bangeit ha Korinth ki don ia kata ka jingsngew liang, uwei u ong nga, nga dei u jong u Paul, uwei pat u ong nga, nga dei u jong u Apollos. Uwei u ong u nongialam jong nga u kham bha, uwei ruh u ong, u nongialam jong nga u kham bha. Uwei u ong kham lah ka jong ngi, uwei ruh u ong kham lah ka jong ngi. Ki da sarong, ki da iasaid bad ki da iania ruh na ka bynta kata. Bad kane ka la pynlong ia u apostol Paul ban sneng ia ki bangeit ha Korinth da kaba ong, phi long khunlung, phi long kynja doh namar ba phi don ia kata ka jingsngew liang, ka jingpihuiñ bad ka jingsarong.  

1 KORINTH 3:1‭-‬5‭, ‬7‭-‬9

Kumta ruh, ma nga, ko parabangeit, ngam shym lah ban kren ha phi kum ha kiba kynja mynsiem, hynrei, kum ha kiba kynja doh, kumba ha ki khunlung ha U Khrist keiñ. Nga la ju bsa ju pjiah ïa phi da ka dud, ym da ka jingbam; namar phim lah ban shah ïa kata; wat haduh mynta ruh, phim pat lah. Namar phi dang long kiba kynja doh: naba haba don hapdeng jong phi ka jingpihuiñ bad ka jingïania, phim long te kiba kynja doh, bad phi ïaid katba kum ka rukom briew? Namar haba uwei u ong, “Nga u jong u Paul”; uwei pat ruh, “Nga u jong u Apollos”; hato phim long kiba kynja doh? Uei te u Apollos? bad uei u Paul? Hynrei, tang ki nongïalap 'tien Blei da kiba phi la ngeit, bad uwei pa uwei kumba U Trai u la ai ha u. Kumta, uta uba thung um long ei ei, lymne uta u ba ai um ruh; hynrei, U Blei keiñ uba pynman. Te uta uba thung bad uta u ba ai um ki ïalong kawei, hynrei, uwei pa uwei un pdiang ïa la ka jong ka bainong katba kum ka jingtrei jong u hi. Namar ngi ïalong kiba ïatrei lem bad U Blei; phi ïalong ka lyngkha U Blei, bad ka jingtei U Blei.

Kane ka dei kaei ba ki nong Korinth ki long. Hynrei haba ngi peit na ka Bible ka Ktien U Blei ka hikai pynban ba ngin don ka jingieit bad ka jinglong kawei bad ban shakri shitrhem ia U Trai ha kata ka jaka ba U Blei u la buh ia ngi. U Jisu mynba u dang don ha kane ka pyrthei u la duwai na ka bynta ki synran bad na ka bynta baroh ki bangeit ha u ba kin ia long shi tylli kumba ma u bad u kpa ki ia long shi tylli. (ÏOANNIS 17:20-23). 

U Blei u la thung khnang ia ki apostol, ki nongiathuhlypa, ki nongialap, ki nongsharai bad ki nonghikai khnang ban pynpoi ia ki bangeit ha satlak pyrthei sha ka jinglong kawei jong ka jingngeit, ym ban wanrah ia ka jingsngewliang, ka jingpihuiñ bad ka jingsarong ki ban pynlong ia ka jingiapait ia pra.

EPHESOS 4:11‭-‬13

Bad u la thung ïa kiwei, ban long ki apostol; bad ïa kiwei, ki nongïathuhlypa; bad ïa kiwei, ki nongïathuhkhana; bad ïa kiwei, ki nongsharai bad ki nonghikai; ïa ka ban pynjanai ïa ki riewkhuid, ïa ka jingtrei ka jingshakri 'tien Blei, ïa ka ban tei ïa ka met U Khrist: tad ynda ngi ïoh poi baroh sha kata ka jinglong kawei ka jong ka jingngeit, bad ka jong ka jingtip ïa U Khun U Blei, haduh ka jinglong rangbah bha, haduh ka jingthew ka rynïeng ka jingdap U Khrist: 

Jingpynkut: Nga ngeit lyngba kane ka jinghikai kan iarap ia ngi kumno ba ngin long ki Khristan ba rangbah bha ha ka jinglong mynsiem, da kaba ngin lah ban bsa ia lade da ka Ktien U Blei, ba ngin nang ruh ban pyniapher ia ki jinghikai baroh ba ngi iohsngew, kano kaba dei katkum ka Ktien U Blei bad kano ka bym dei katkum ka Ktien U Blei, bad kumjuh ba ngin ym don kata ka jingsngew liang, ka jingpihuiñ bad ka jingsarong. 

To ngin kynmaw ba ngi long ki jong U Khrist ba la thied ia ngi da ka dor bah ka snam jong U bad ba la pyndih ia ngi na u juh U Mynsiem, ong ka Ktien U Blei. 

1 KORINTH 12:13‭-‬14

Namar da uwei U Mynsiem la pynbaptis ïa ngi baroh ïa ka ban long kawei ka met, la ki Jiw la ki Jentil, la ki mraw la kiba laitluid; bad la pyndih ïa ngi baroh na uwei U Mynsiem. Namar kata ka met kam long tang shi dkhot, hynrei, shibun.

U Blei un kyrkhu ia phi baroh.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Please follow this link and subscribe it for some inspirational messages.

Copyright © Jester Mawlong | August 31, 2021