Kumno ngin ioh ia u soh jong U Mynsiem?

GALATIA 5:22 Hynrei, u soh jong U Mynsiem u long ¹ka jingieit, ²ka jingkmen, ³ka jingsuk, ⁴ka jingshahslem, ⁵ka jinglehsbun, ⁶ka jingbha, ⁷ka jingïaineh, ⁸ka jingjemnud, ⁹ka bor halor lade. 

Intro: Haba ong, ban ioh ia u soh U Mynsiem, ka mut ban don ia kitei ki jinglong ba u apostol Paul u ong. Bad lada kitei kim don, ki soh ka doh ba la ong ha ka dkhot 19, 20, 21 kin paw. Ngim lah ban ieng hapdeng. 

Ngi ju iohsngew barobor ia ka jinghikai ba kumno kum ki bangeit ngi dei ban sei lane ban don ia u soh jong U Mynsiem ha ka jingim jong ngi. Hooid ka long kaba dei ba ngin don ia u soh jong U Mynsiem bad nga ngeit baroh ki bangeit ngi kwah bad ngi duwai ia kata. Hynrei ka jingkylli ka long Kumno ngin ioh ia u soh jong U Mynsiem?

Ban ioh ia u soh jong U Mynsiem kam dei satia da ka jingpyrshang lane da ka bor briew jong ngi. Ngi lah ban pyrshang ban sei na lade, hynrei phin shem tang shipor arpor kin jah noh bad ngin long biang kumjuh. 

** Ngi pyrshang ban ieit, hynrei tang katto katne lut noh kata ka jingieit, paw biang ka doh bad ka jingbym ieit. 

** Ngi pyrshang ban kmen, hynrei tang katto katne rngad noh kata ka jingkmen, wan biang ka jingkhuslai jingsngewsih. 

** Ngi pyrshang ban suk, hynrei tang katto katne wan biang ka jingbym suk bymhun, ka jinglynga pisa.

** Ngi pyrshang ban long kiba iaishahslem ha kiei kiei baroh, hynrei tang katto katne ngim lah shuh ban ïaishah. Tang shu don ba pynthut, ngi kloi ban ong, em ngam lah shuh te ban iaishah, kajuh shi kajuh ki leh ia nga bad kumta ter ter.

** Ngi pyrshang ban leh sbun ia ki briew, namar ba ngi ngeit ba kata ka dei u soh jong U Mynsiem, hynrei tang katto katne lut noh kata ka jingsbun.

** Ngi pyrshang ban leh bha, hynrei tang katto katne ngim lah shuh ban lehbha.

** Ngi pyrshang ban long kiba iaineh, ngi ialeh shitom, ngi pyneh, hynrei tang katto katne ka paw biang ka jingbym iaineh.

** Ngi pyrshang ban long kiba jemnud, hynrei tang shu ia kynduh khuk, ka paw biang ka jinglong ba eh khar khar.

** Ngi pyrshang ban synshar (control) ialade, hynrei ngim lah. Mynstep ngi ong, ngan nym leh shuh kumto, ngan leh ne ngan kren noh kumto kumto, hynrei tang shiphang arphang, ngi lah lose control, ngim lah ban synshar ialade. Mynmiet ngi kylla bamut, mynstep ngi duwai ban aiti thymmai, hynrei mynsngi ngi leh biang kumjuh. Kata ka dei kaei ba ngi mad bad ngi shem. Kumta kumno ngin leh?

Ban sngewthuh ia kane, ngi donkam ban peit nuksa na ki bangeit ha Galatia, balei kine ki bangeit kim don ia u soh U Mynsiem ha ki, haduh ba u apostol Paul u la hap ban kyntu ia ki? 

Phi lah ban pule naduh ka lynnong ba nyngkong ter ter phin shem ia ka daw ba ki Galatia kim don ia u soh U Mynsiem.

#-1. Namar ba ki la iehnoh ia ka gospel bashisha:  U Paul u iathuh ba ki bangeit ha Galatia ki la sdang ban kynriah noh na kata ka gospel bashisha bad ki la sdang ban ngeit ia kawei pat ka gospel ka bym long katkum ka gospel ba u Paul u ïalap. Kata ka dei ka daw ba nyngkong ba kin duh ia u soh U Mynsiem.

GALATIA 1:6‭-‬7

Nga sngewlyngngoh ba phi la kynriah noh shen katta katta na uta uba la khot ïa phi ha ka jingaiei U Khrist, sha kawei pat ka gospel, ka bymlong kawei pat ka gospel; hynrei, tang ba don kiba pynkhuslai ïa phi, bad kiba kwah ban pynkylla sniew ïa ka gospel U Khrist.

Ka jingkynriah noh na ka gospel bashisha kaba long ka gospel U Khrist, bad ban phai biang sha ka hukum bad ki niam ki rukom briew ka long daw ba nyngkong ba ngim lah ban sei ia u soh U Mynsiem. Kumta ba ngi lah ban sei ia u soh jong U Mynsiem ngi donkam ban pyntikna ba ka jingngeit jong ngi ka long katkum ka gospel bashisha U Khrist, ym ban pyniakhleh ka hukum, ki niam ki rukom briew bad ka jingaiei U Khrist.

#-2. Ka jingshah teh mraw: Ha ka lynnong ba san, dkhot ba nyngkong u Paul u ong, Ïa ka jinglaitluid U Khrist u la pyllait ïa ngi: namar kata, to ïeng skhem, bad wat ai ba yn riam ïa phi pat ha ka lyngkor ka jinglongmraw.

Hangne u kren ba kum ki bangeit kiba U Khrist u la pyllait mraw na ka hukum bad na ka pop, ngim dei shuh ban dang shah riam pat ialade ha kata ka lyngkor ka jinglongmraw, lada ngi dang shah riam pat ngin nym lah ban sei ia u soh jong U Mynsiem.

Ka kyntien 'wat ai ba yn riam pat' ka pyni ba don 'ki nongriam' kiba riam ban pynngat biang ia ki bangeit kiba shida, kiba beit, kiba la ngeit ha ka jingaiei U Khrist, ban pynngat biang ia ki sha ka hukum bad ki niam ki rukom pateng la pateng jong ki, kumta u Paul u ong ia ki, wat ai ba yn riam ia phi pat. Lada ngi dang shah riam bad ngi dang don ha kata ka lyngkor ka jinglongmraw, ngin nym lah ban sei ia u soh jong U Mynsiem. Kumta ngi hap ban ieng skhem bad ban ym shah da lei lei ban riam pat ia ngi ha kata ka lyngkor ka jinglongmraw, khnang ba ngi lah ban sei ia u soh jong U Mynsiem.

#-3. Ka jingbym shah ialam ha U Mynsiem: Kawei pat kaba don ha ki bangeit ha Galatia ka long ba kim shah ialam ha U Mynsiem, kaei kaei kaba ki leh, ki leh ban pyndep ia ka jingkwah ka doh jong ki, ban sumar hukum, ban pyntreikam ia kita ki rukom briew, ki rukom pateng la pateng. Dei namar kata kadaw kim ioh ia u soh jong U Mynsiem. 

Kumta ka jinghikai ka long ba ngi dei ban long kiba shah ialam ha U Mynsiem ba ngi lah ban sei ia u soh jong U Mynsiem. Kumba nga la ong shakhmat, da lade ngin nym lah, hynrei dei tang kita kiba shah ha ka jingialam U Mynsiem. U Paul u ong ha katei hi ka juh ka lynnong, Hynrei, nga ong: To ïaid da U Mynsiem, te kumta phin ym pyndep ïa ka jingkwah ka doh. GALATIA 5:16. Katba ngi dang iaid ha ka doh jong ngi, ha ki hukum bad ha ki niam ki rukom jong ngi, ngin nym lah satia ban ioh ia kitei ki jinglong. Ngi lah ban shu pyrshang ban long kiba ieit, hynrei tang shu iatyngkhuh, ka jingdom ka paw, ngi lah ban pyrshang ban kynjoh sha kitei ki jinglong, hynrei, kumba nga ong, tang shipor arpor ka lah ban kut noh.

Kumta ngi donkam eh ban shah ialam ha U Mynsiem da kaba pyndem lut ia ka jingkwah jong ka doh jong ngi ha ka mon jong U Mynsiem. Shuh shuh ka Ktien U Blei ka ong ba ka doh ka kwah marpyrshah ïa U Mynsiem, bad uta U Mynsiem marpyrshah ïa kata ka doh, namar kine ki ïamarpyrshah, katba phim ïoh leh ïa kita kiei kiei ïa kiba phi da mon. GALATIA 5:17

Ka jingbym iaid da U Mynsiem ka pynmih ia ki soh jong ka doh. U Paul u ong, Lada ngi im da U Mynsiem, to ai ba ngin ïaid ruh da U Mynsiem. Wat ai te ba ngin long kiba sarong thala, da kaba pynskuiñ paralok, da kaba bishni paralok. GALATIA 5:25-26

Ka jingsarong thala, ka jingpynskuiñ paralok, ka jingbishni paralok ka mih na ka jingbym shah ialam ha U Mynsiem, hynrei lada la shah ialam ha U Mynsiem, kin mih ki soh jong U Mynsiem. Kumta to ngin long kiba la shah ialam ha U Mynsiem bad ban ym pyndep lane ban ym iaid ha ki jingkwah ka doh.

#-4. Ka jingmih na u soh U Mynsiem: Ka pynlah ia ngi ban ia kit ia ka jingkit paralok hi. Ka pynlah ban ieit, ban leh bha bad kumta ter ter.

GALATIA 6:1‭-‬2

Ko parabangeit, wat lada lap ïa u briew ha kano kano ka jingpalat, ma phi kiba kynja mynsiem, to pynbha pat ïa uba kum uta ha ka mynsiem ka jingjemnud, da kaba khmih ïa lade, ïoh ba yn pynshoi ïa me ruh. To ïakit phi ïa ki jingkit paralok hi, te kumta phin ïa-pyndep ïa ka hukum U Khrist.

To U Blei un kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copyright © Jester Mawlong | August 24, 2021