KA JINGPYNBAPTIS
1. Ka jingpynbaptis ka dei kaba la thung (ordained) ne hukum da U Jisu Khrist.
MATHAÏOS 28:19-20
"...namar kata keiñ, to khie da leit noh ma phi, to pynlong synran ïa ki bynriew baroh, da pynbaptis ïa ki ha ka kyrteng ka jong U Kpa, bad ka jong U Khun, bad ka jong U Mynsiem Bakhuid."
U Jisu haba u phah ia ki synran, ban ïalap, u ong ruh ia ki ba kin da pynbaptis. Na kane ka dkhot ngi sngewthuh ba ka jingpynbaptis ka dei kaba la thung (ordained) ne hukum da U Jisu Khrist.
2. Kumno yn pynbaptis?
1) Da kaba pynngam ha ka um.
Ka ktien pynbaptis ka wan na ka ktien tynrai jong ka Greek "Baptizo" kaba mut ban wieh (dip), lane ban pynngam (immerse).
Rom 6:4
Namar kata keiñ, la btep lem ïa ngi bad u, da ka jingpynbaptis ha kata ka jingïap jong u: ba kat kumba la pynmih pat ïa U Khrist na ki baïap, da ka burom ka jong U Kpa, kumta ba ngi ruh, ngin ïa-ïaid ha ka jingthymmai ka jingim.
Ka jingpynngam ha ka um jong ka jingpynbaptis ka iasyriem bad ka jingtep ia U Jisu. Kumba ia U Jisu la tep bad u la mihpat, kumta ma ngi ruh haba ngi la iap ia ka pop, donkam ban tep ha ka um jong ka jingpynbaptis, bad mihpat na ka um ha ka jingim jop bad ka jingim ba thymmai.
Kam 8:37-39
Te u Philip u la ong, “Lada me ngeit na la ka dohnud baroh, me lah.” U la ïathuh bad u la ong, “Nga ngeit ba U Jisu Khrist u long U Khun U Blei.” Te u la hukum ban pynsangeh ïa ka kali: bad ki la ïaleit hiar baroh ar ngut sha kata ka um, u Philip bad uta u Ïunukh de, bad u la pynbaptis ïa u. Te haba ki la ïawan kiew noh na kata ka um, U Mynsiem U Trai u la rah noh ïa u Philip, bad uta u Ïunukh um shym la ïohi shuh ïa u, naba u la nang leit ha ka lynti jong u da kaba kmen.
U Philip bad u Ïunukh ki la leit hiar sha um (ka wah) ban pynbaptis.
U Ioannis u pynbaptis ha Ainon, namar ba ka don shibun ka um.
ÏOANNIS 3:23
Te u Ïoannis ruh u dang pynbaptis ha Ainon, hajan ka Salim, naba la don hangta bun ki um: te ki la ïawan, bad la pynbaptis ïa ki.
2) Ha ka kyrteng U Kpa, U Khun bad U Mynsiem Bakhuid.
MATHAÏOS 28:19
"...namar kata keiñ, to khie da leit noh ma phi, to pynlong synran ïa ki bynriew baroh, da pynbaptis ïa ki ha ka kyrteng ka jong U Kpa, bad ka jong U Khun, bad ka jong U Mynsiem Bakhuid."
Katkum ka hukum ba U Jisu u ai ka jingpynbaptis ka dei ban long ha ka kyrteng U kpa, U Khun bad U Mynsiem Bakhuid. Ha kine ki sngi don ki briew kiba pynbaptis tang ha ka kyrteng U Jisu. Hynrei ka dei ban long ha ka kyrteng lai ha uwei.
3. Iano yn pynbaptis?
Ia kiba lah ngeit bad kylla bamut.
MARKOS 16:15-16
U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem.
Ngi iohi hangne U Jisu da lade hi u ong, te ia uta u ba ngeit, pynbaptis. Ym lah satia ban pynbaptis ia u briew u bym pat kylla bamut, u bym pat ngeit ia U Jisu. Donkam ban ngeit shuwa, sa pynbaptis. Ym dei pynbaptis shuwa sa ngeit suki suki hadien.
Kumba nga ong haneng, ka jingpynbaptis ka long ka jingbtep noh ia ka pop, kumta donkam ba u briew un iap shuwa ia ka pop sa pynbaptis. Kumba long u briew, ym lah ban tep ia uba dang I'm, hynrei iap shuwa sa tep.
KI KAM 2:37-38
Te haba ki la ïohsngew ïa kane, la dung ngak ïa ki ha la ka dohnud, bad ki la ong ha u Petros, bad ha kita kiwei ki apostol, “A para, kumno ngin leh?” Te u Petros u la ïathuh ha ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid.
KI KAM 2:41-42
Namar kata, ïa kita kiba la pdiang ïa ka ktien jong u, la pynbaptis; kumta la pynïasoh ha kata ka sngi sha ka balang kumba lai hajar ki mynsiem. Bad ki la ïaineh skhem ha ka jinghikai jong ki apostol, bad ha ka jingïasyllok, bad ha kaba kdiah kpu, bad ha ki jingduwai de.
N.B: Ia kiba la kylla kaba mut bad la pynbaptis la pyniasoh sha ka Balang (universal & local).
4. Balei ka jingpynbaptis ka long kaba donkam?
1) Ka dei ka jingbtep noh ia ka pop.
Rom 6:11
Kumjuh ruh, ma phi, to ñiew ïa lade kiba la ïap keiñ ïa ka pop, hynrei, kiba ïai-imti ïa U Blei ha U Khrist Jisu uba U Trai jong ngi.
2) Ka pynpaw ia ka jinglong kawei bad U Khrist ha ka jingiap, jingtep bad jingmihpat jong u.
Rom 6:3-4
Ne phim ju tip, ba kat kiba na ngi, ïa kiba la ïoh pynbaptis ha U Khrist Jisu, la pynbaptis ïa ngi keiñ, ha kata ka jingïap jong u? Namar kata keiñ, la btep lem ïa ngi bad u, da ka jingpynbaptis ha kata ka jingïap jong u: ba kat kumba la pynmih pat ïa U Khrist na ki baïap, da ka burom ka jong U Kpa, kumta ba ngi ruh, ngin ïa-ïaid ha ka jingthymmai ka jingim.
3) Ka dei ka jingphla paidbah ne ka jingpynithuh ba ngi long ki nongbud U Jisu Khrist.
KOLOSSAI 2:11-12
"...ha uba la otsher ïa phi ruh da ka jingotsher bym shym la thaw da ki kti, da kaba loit noh ïa ka met ka doh, ha ka jingotsher U Khrist; haba la btep lem bad u ha kata ka jingbaptis, ha kaba la pynmih lem ïa phi ruh bad u da ka jingngeit ha ka jingtrei U Blei, uba la pynmih pat ïa u na ki baïap."
Ia ki Jiw la ju otsher ia ki ban pynithuh ba ki dei na ka niam Jiw, kumjuh ki muslim la ju otsher ia ki ban pynithuh ba ki dei na ka niam musulman.
Kumta ka jingpynbaptis ruh ka long kata ka jingotsher ba kynja mynsiem ban pynithuh ba ngi long ki nongbud U Jisu Khrist.
4) Ka dei ka jingpyndep ia ka hok.
MATHAÏOS 3:15
U Jisu te u la ïathuh bad U la ong ha u, “To shah mynta: naba kumne keiñ ka long kaba dei ïa ngi ban pyndep ïa ka hok baroh.” Ynda kumta, u la shah ïa u.
Hato ka long pop ban pynbaptis arsien?
Em, kam long pop lada la shu pynbaptis khlem da kylla bamut. Lah ban pynbaptis biang hadien da ki lah sngewthuh bad kylla bamut shisha.
Kam 19:1-7
Ka la jia mynba u Apollos u don ha Korinth, ba u Paul, ynda u la leit lyngba ïa kita ki phang kiba shaneng, u la wan sha Ephesos, bad u la shem ïa kiba long synran: bad u la kylli ïa ki, “Phi la pdiang ne em ïa U Mynsiem Bakhuid mynba phi la ngeit?” Bad ki la ïathuh ha u, “Em, ngim shym la ïohsngew wat lada la don ne em U Mynsiem Bakhuid.” Ynda kumta, u la kylli ïa ki, “Ha kaei te la pynbaptis ïa phi?” Ki te ki la ïathuh, “Ha ka jingbaptis u Ïoannis.” Te u Paul u la ong, “U Ïoannis u la pynbaptis da ka jingbaptis ka jingkylla-ka-bamut, u da ong ha u paidbah ba ki dei ban ngeit ha uta u ban sa wan hadien jong u, kata, ha U Jisu.” Ynda ki la ïohsngew te ïa kane, la pynbaptis ïa ki ha ka kyrteng U Trai Jisu. Te ynda u Paul u la lah buh ïa la ki kti ha ki, U Mynsiem Bakhuid u la wan ha ki, bad ki la kren da ki thylliej bad ki la ïathuhlypa. Te ki la don baroh kumba khat-ar ngut ki rangbah.
Nga ngeit kane kan long ka jingiarap ia ngi ban sngewthuh shaphang ka jingpynbaptis.
U Blei un kyrkhu. Amen
Copyright © Jester Mawlong| February 15th, 2022
Comments
Post a Comment