Ka bakut ka doh baroh ka la wan ha khmat jong nga
JENESIS 6:11-13
¹¹Hynrei, ka khyndew ka la pyut sniew ha khmat U Blei, bad la pyndap ruh ïa ka pyrthei da ka jingleh-jubor. ¹²Te U Blei u la khmih ïa ka pyrthei, bad, ha khmih ruh, ka la pyut sniew; naba ka doh baroh ka la lah pynpyut plak ïa la ka lynti ha ka pyrthei. ¹³Bad U Blei u la ong ha u Noah, “Ka bakut ka doh baroh ka la wan ha khmat jong nga; naba da ki keiñ la pyndap ïa ka pyrthei da ka jingleh-jubor; bad ha khmih ruh, ngan pynjot noh ïa ki lem bad ka khyndew.
Kane ka dei ka jingkren jong U Blei ha ka por u Noah.
Kaei kaba la pynlong ia U Blei ban kren ia kine ki ktien?
Ka dei namar ka jingbymman jong ki briew, ka jinglong ba pyut plak jong ka pateng bynriew, ka jingleh bymsuidñiew bad ka jingbym sheptieng shuh ia U Blei.
JENESIS 6:5-7
Te U Trai u la ïohi ba ka jingleh bymman jong u briew ka la khraw eh ha ka pyrthei, bad ba ka jingthmu baroh ki jingpyrkhat ka dohnud jong u ki la long bymman ha la ka sngi. Bad U Trai u la kylla-ka-bamut ba u la lah thaw ïa u briew ha ka pyrthei, bad la pynsngewsih eh ïa u ha la ka dohnud. Te U Trai u la ong, “Ngan pyndam noh ïa u briew ïa uba nga la thaw na khmat ka khyndew; naduh u briew haduh u mrad, bad haduh u kynja bapar, bad ïa ki sim bneng; naba nga kylla-ka-bamut ba nga la thaw ïa ki.”
Ka jinglong bymman jong ki briew ha ka por u Noah ka la pynbitar ia U Blei haduh ba U Blei un da pynjot noh thiaw ia ka pyrthei da ka jingshlei um kaba khraw. JENESIS 7:
U Blei um lah ban shah ia ka pyrthei ba pop bym treh ban kylla kaba mut. Hynrei na ka bynta kiba hok, u la pynkhreh ia ka jaka ba kin ioh lait im na ka jingpynjot.
Paralok baieit, U Blei sa shisien un sa ong biang, Ka bakut ka doh baroh ka la wan ha khmat jong nga bad un sa pynjot noh ia ka pyrthei, bad kata ka jingpynjot kam dei shuh da ka jingshlei um, hynrei yn thang da ka ding bad u kyndok, ong ka Ktien U Blei.
MATHAÏOS 13:40
Namar kata, kumba ïalum ïa kita ki ñiut bad ba thang ïa ki ha ka ding, kumta keiñ, kan long ha kaba wai noh kane ka pyrthei.
2 THESSALONI 1:8-10
"...ha ka ding ba-meh, u da pynhiar kput ha kita ki bymithuh ïa U Blei, bad ha kita ki bymkohnguh ïa ka gospel ka jong U Trai Jisu jong ngi; ki ban shah ka jingpynshitom, ka jingpynjot bymjukut keiñ na khmat U Trai bad na kata ka burom ka bor jong u, ynda un wan ha kata ka akher ka sngi, ban ïoh pyndonburom ha ki riewkhuid jong u, bad ban long uba iphylla ha kita baroh kiba ngeit (naba la ngeit ïa kata ka jingphla jong ngi hapdeng jong phi).
Hynrei shuwa kata, U Blei u la ai ka lad ia ki briew ba kin kylla kaba mut, ba kin iehnoh ia ka pop bad ki lynti bymman jong ki bad ba kin phai sha U Trai. Pynban lada ngim treh ban kylla bamut, un sa pynjot khlem jingmap shuh kumba long ha ka por U Noah.
U Noah bad ka ïing jong u ki la lait im dei namar ba ki la leit ban rung hapoh ka ïinglieng ba U Blei u la phah shna ia u. Mynta ruh U Blei u lah pynkhreh lypa ia ka jaka ba ki briew kin lait na kata ka jingpynjot ba shyrkhei. Hynrei lada ngi kyntait bad ngi leh bym suidñiew, yn sa pynjot kyndit bad hangta lada ngin babe ruh yn nym don jaka shuh.
Kaei kane ka jaka ba U Blei u la pynkhreh?
U dei U Jisu Khrist. Ka ïinglieng u Noah ka long ka dur jong U Jisu Khrist. Dei tang kiba don ha U Jisu Khrist ki ban lait na kata ka jingpynjot ba shyrkhei.
1 ÏOANNIS 5:12
Uta uba don uta U Khun, u don kata ka jingim; te uta u bymdon U Khun U Blei, um don kata ka jingim.
Kumta ka jingkhot ka long, Wan sha U Jisu, ngeit bad pdiang noh ia U mynta katba ka por bad ka jingkhot ieit ka dang don. Wat buh teng ban ong 'lashai', hynrei mynta.
2 KORINTH 6:2
"...ha khmih, mynta keiñ, kata ka Ïa badiang hun; ha khmih, mynta keiñ, kata ka sngi ka jingpynim:”
To ngin nym pynsarong ialade na ka bynta ka lashai, namar ngim tip kaei ka ban jia lashai.
PROBERB 27:1
Wat pynsarong ïa lade shaphang kaba lashai; naba mem tip kaei ka ban jia ha kaba shi sngi.
Ka jingim ka long tang kum u lyoh ong u Jakob.
JAKOB 4:13-14
To mynta, phi kiba ong, “Ha kane ka sngi ne lashai ngin ïaleit sha kane ne kata ka nongbah; bad ngin ïashong hangta shi snem, bad ngin ïakhaïi bad ngin ïaïoh nong:” hynrei, haba phim tip ïa kaei ka ban jia ha kaba lashai. Kaba kumno kata ka jingim jong phi? Namar ka long u lyoh uba mihpaw ïa tang shibit, ynda kumta te, u da jah noh jar.
To ngin nym ñiewbeiñ ia ka jingkynrei ka jingsbun bad ka jingiaishah slem jong U Blei, hynrei to ngin phai noh sha U Trai, iehnoh ia ka lynti bymman jong phi baroh. U Blei un isynei iaphi kumba u isynei ia u Noah.
U Blei un kyrkhu ia phi. Amen
Copyright © Jester Mawlong | February 18, 2022
Comments
Post a Comment