Ka jingsuk bymjukut bad ka jingkordit bymjukut ka shong ha ka jingiam bad ka jingrkhie jong phi mynta

U Jisu u kren ia kane, ba kita kiba iam mynta kin long kiba suk bad kin sa rkhie da ka jingkmen bymjukut. Hynrei kita kiba rkhie mynta kin sa iam da ka jingkordit bad ka jingbabe bymjukut.

Lehse phi lah ban pyrkhat kumno tang shu rkhie lane shu iam ka lah ban long kumta? Katkum kaei ba U Jisu u ong, ka lah ban long.

LOUKAS 6:21b‭, ‬25b

“Suk ma phi kiba ïam mynta; naba phin rkhie. “Kordit ïa phi, kiba rkhie mynta! naba phin sngewsih bad phin ïam de.

To ngin ia peit:

1. Suk kiba iam mynta; naba kin sa rkhie:

Lehse phi lah ban pyrkhat, kaba kumno kane ka jingiam ka ban ioh ia ka jingrkhie pat hadien? Kane ka dei kata ka jingiam da ka jingkylla bamut ha khmat U Blei namar ki pop ba la leh. Ka dei kata ka jingsngewsih ba riewblei namar ka pop.

2 KORINTH 7:10

Namar kata ka jingsngewsih bariewblei ka pynlong ka jingkylla-ka-bamut sha ka jingpynim ka bymbabe shuh; hynrei, ka jingsngewsih ka jong ka pyrthei ka pynlong ka jingïap.

Lada ngi sngewsih namar ka pop kaba ngi la leh, U Blei u kloi ban map bad pynksan ia ngi. Salm 34:18

U Jisu u iathuh ia ngi shaphang uwei u nongkhrong khajna (tax collector), lehse nga lah ban ong ba u dei u briew ba bamsap bad leh klop shibun eh ha kata ka kam khrong khajna jong u, hynrei haba u la sngewthuh ba kata ka long ka pop, u la iam da ka jingkylla bamut ha khmat U Trai bad u da thap ia la ka shadem ban ong 'Ah Trai to isynei ia nga u nongpop'

LOUKAS 18:13

Hynrei, uta u nongkhrong, u da ïeng na jngai, um nud wat ban khmied da la ki khmat sha bneng, hynrei, u la ïaithab ïa la ka shadem, u da ong, ‘A U Blei, to isynei ïa nga u bapop!’

U Jisu uba iohi ia kata ka jingiam jong u, u la pynksan ia u, bad la pyndap ia une u nongkhrong da ka jingkmen kaba khraw.

Kane ruh kan long ia phi ha kane ka por, lada phi iam shisha da ka jingkylla bamut namar ki pop ba phi la leh, U Blei un map bad pynkhuid phar ia ki pop jong phi.

Ka Ktien jong U Blei ka ong ba lada ngi phla noh ia ki pop jong ngi, u long uba hok bad uba iaineh ban map ia ki pop jong ngi baroh. 1 IOANNIS 1:7-9

Shuh shuh na ka kitab U ISAÏAH 1:18 U Blei u ong, “Ale te, to ngin ïasaid nia lem,” ong U Trai: “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot.

Paralok baieit, ym don ka pop ba U Blei um lah ban map haba ngi phai bad iam ha khmat jong U da ka jingkylla ka bamut. Bad haba ngi iam kylla ka bamut, ngin sa rkhie bad kmen sha bymjukut.

2. Kordit ïa phi, kiba rkhie mynta! naba phin sngewsih bad phin ïam de:

U Jisu u kren ia kawei pat ka kyntien ban ong 'Kordit ïa phi, kiba rkhie mynta! naba phin sngewsih bad phin ïam de'

Kaba kumno kane ka jingrkhie mynta bad ka ban sngewsih bad iam pat hadien? Kane ka kren ia kata ka jingrkhie sahuh bad ka jing-enjoy ha ka pop.

Bun bah ki briew kiba leh ia ka pop hynrei ki rkhie sahuh pynban ha kata ka pop, ki rkhie sahuh ha kita ki jingsngewbha pyrthei, ki jingsngewbha ka doh. Lada don napdeng jong phi kiba long kumta, nga ong ia phi kylla bamut kloi na kata ka pop, iam ha khmat U Trai ha kane ka por. Lada phim kylla bamut bad iam ha khmat jong U Blei phin sa sngewsih bad phin sa iam da ka jingbabe bad jingkordit bymjukut.

La don uwei u briew ba riewspah uba la leh pahuh eh ong ka Ktien U Blei, man ka sngi u shu rkhie sahuh ha kata ka jingdap jong u, u bam u dih, u leh sngewbha katba u mon, hynrei ynda haba u iap, la wan shaw ia u da ki 'suid-iap bad u la poi ha dujok, bad hangta u la iam da ka jingbabe bad ka jingkordit, hynrei lehnohei ka jingiam jong u namar ka por ban kylla bamut kam don shuh. Ka jingaiei la khang.

(Pule LOUKAS 16:19-31)

Paralok baieit, katba ka jingaiei ka dang don, wan sha U Jisu, iam da ka jingkylla bamut ha khmat jong u, U Jisu un map ia phi bad phin mad ia ka jingkmen jong ka bneng kaba phim pat ju mad. Ym tang ha kane ka pyrthei, hynrei sha bymjukut. Pynban lada phim treh ban kylla bamut, phi rkhie sahuh pynban ha kata ka pop ba phi leh, kynmaw ka jingkordit ka ap iaphi bad hangta phin ïam, phin babe, hynrei yn nym don por shuh. Ha kata ka por U Blei un rkhie bein pynban ia phi.

PROBERB 1:24‭-‬28

Namar nga la khot, bad phim treh; nga la kner ïa la ka kti, bad ym don ba suidñiew; hynrei, phi la ibeiñ ïa ka jingpyrkhat jong nga baroh, bad phim mon satia ïa ka jingsneng jong nga: nga ruh ngan rkhie ha ka jingjynjar jong phi; ngan rkhiebeiñ haba wan lap ka jingsheptieng jong phi; haba wan lap ka jingsheptieng jong phi kum ka 'erïong, bad haba nang wan ka jingjynjar jong phi kum ka lyer langthari; haba ka jingshipa bad ka jingsngewpisa ki ngat halor jong phi. Hangta kin khot kyrpad ha nga, hynrei, ngan ym phai ktien; kin wad biang biang ïa nga, hynrei, kin ym shem ïa nga:

Kumta katba ka por ka dang biang, wat pyneh ia ka dohnud jong phi, wan sha U Jisu, iam ha khmat jong u, phin mad ia ka jingrkhie jong ka jingkmen bneng bymjukut.

Click here for audio teaching

U Blei un kyrkhu. Amen