KI KAM 17:30-31
"³⁰U Blei, namar kata, u la leh kum bym khmih ïa ki aïom ka jingbymtip, hynrei, mynta, u hukum ïa ki briew baroh kylleng la kylleng ban kylla ka bamut; ³¹naba u la buh ka sngi ha kaba un sa bishar ïa ka pyrthei ha ka hok da uta u briew ïa uba u la thung; shaphang kata, u la ai ka jingpynskhem ha ki briew baroh, da kaba u la pynmih pat ïa u na ki baïap.”
Shuwa ban iaid shaphrang nga kwah ba phin tip, ka mut aiu kylla bamut lane kaei ka jingkylla kaba mut?
Ka jingkylla kaba mut ka dei kata ka jingkylla jong ka jingmut ne ka rukom pyrkhat, kaba ialam sha ka jingkylla ka dohnud, bad kaba ialam ruh sha ka jingkylla ka rukom leh (action).
Ka dei ruh kata ka jingsngewsih ba riewblei namar ka pop ba la leh bad phai noh sha U Blei.
Ka Bible ka ong U Blei u leh kum bym khmih ia ki aiom ka jingbymtip.
Kaei kane ka aiom jong ka jingbymtip?
Ka aiom jong ka jingbymtip ka dei kata ka aiom jong ka jingmane blei klumar. Namar ba kim tip bad kim shem ia U Blei ba-im, kumta ki briew ki la mane blei klumar. Don kiba mane ia u dieng, u maw, ka ksiar ka rupa, bad ia ki jingoh dur bapher bapher kaba u nongoh dur u pynwan dur.
U Blei u leh kum bym khmih, ong ka Ktien jong U Blei. Ha ka jingshisha u iohi lut u tip lut, hynrei u leh kum bym khmih. U ieh ha ki, ba kin pyrkhat, ba kin shemphang bad ba kin wad ia U Blei. Hynrei ym don satia ba la shemphang bad ba la wad ia U Blei.
Ka Bible ka iathuh ia ngi ba U Blei u peit na jrong, la don ne em ba la shemphang bad ba la wad ia U Blei. SALM 53:2. Hynrei ym don satia, ong ka Ktien jong U Blei.
ROM 3:10-12
Kumba la thoh: “Ym don u bahok, em, ym don uwei ruh; ym don uba shemphang, ym don keiñ uba wad ïa U Blei; baroh ki la ïasakma noh, ki la ïakylla bymmyntoi lang noh; ym don uba leh babha, ym don wat uwei ruh.
Haba U Blei u iohi ba kim shem la peiphang satia, u la hap ban hukum noh ba kin kylla kaba mut.
U Apostol Paul u ong, hynrei mynta, u hukum ia ki briew baroh kylleng la kylleng ban kylla ka bamut.
U Blei u la phah ia ki briew jong u, uwei hadien uwei pat ban ïalap ia ka jingkylla kaba mut.
#- U Ioannis nong pynbaptis u la wan ban ïalap ia ka jingkylla kaba mut. Mat 3:2
#- U Jisu da lade u la wan ban ïalap ia ka jingkylla kaba mut. Mat 4:17
#- U khot ia ki synran ba kin ïalap ia ka jingkylla kaba mut. Mark 16:15-18
Haduh kine ki sngi u pynmih ia ki briew ba ki ban ïalap ba ki briew kin kylla kaba mut.
Ym dei tang da ki briew, hynrei U Blei u la pyndonkam ruh da kiba bun ki lad ki lynti ban ïalap ia ki briew ba kin kylla kaba mut.
Nga lah ban ong, kine ki jingjia kiba jia sawdong mynta ki dei ki jingialap jong U Blei ba ki briew kin kylla kaba mut.
U COVID-19, u phria ba kham pher, ka jingkhriat tasam, etc, ki dei ki jingialap ban pynkyndit ia ki briew ba kin kylla kaba mut, kin phai noh sha U Blei. Hynrei kaba sngewsih ka long ba ki briew kim patiaw satia, i kumba ki shu myllen.
Balei U Blei u da hukum ia u briew baroh ban kylla kaba mut?
Namar ba ka don ka jingbishar kaba ap ha khmat. v.31
HEBRU 9:27
Te kumba la buh ha ki briew ban ïap tang shi sien, bad hadien kane ka wan ka jingbishar.
Kaei ka ban jia ha ka sngi bishar?
Kan don ka jingrai rem bad ka jingpynksan.
Kita kiba kylla kaba mut yn pynksan ia ki bad kita ki bym treh ban kylla bamut ym pynrem ia ki. Bad kata ka jingpynrem ka long sha ka dujok ding bymjukut.
U Blei u long u ba iohi lut, uba tip lut (omniscient), u lah iohi lypa ia kaba kut na basdang (ISAIAH 46:9-10). U lah iohi lypa ia kiei kiei baroh, u lah iohi lypa ia ka jingshyrkhei ka dujok, ka jingshyrkhei jong ka sngi bishar ba khadduh, dei namar kata ka daw u lah hukum lypa ia ngi, namar ba um kwah satia ia ngi ba ngin poi sha dujok, ba ngin poi sha ka jaka jong ka jingpynkordit.
Paralok baieit, U Blei u ieit eh ia ngi haduh katta katta. U Ioannis u iathuh ia ngi shaphang ka jingieit jong U Blei, haduh katno ba u ieit eh ia ngi haduh ba u la hap ban phah ia la u Khun ba marwei jong u ban siewspah ia ngi.
IOANNIS 3:16
“Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut.
Pynban lada ngim treh ban kylla bamut, ngi kyntait ia ka jingkhot ieit jong u, ka jingbitar jong U Blei kan long halor jong ngi.
IOANNIS 3:36b
Uta uba ngeit ha U Khun, u don ka jingim bymjukut; uta te u bymkohnguh ïa U Khun, un ym ïohi ïa ka jingim: hynrei, ka jingbitar jong U Blei ka ïaisah halor jong u.
Ynda kata ka sngi jingbitar U Blei ka lap ia ngi, wat lada ngin kylla bamut bad khot ia U, un nym shah shkor satia ngi.
PROBERB 1:24-28
Namar nga la khot, bad phim treh; nga la kner ïa la ka kti, bad ym don ba suidñiew; hynrei, phi la ibeiñ ïa ka jingpyrkhat jong nga baroh, bad phim mon satia ïa ka jingsneng jong nga: nga ruh ngan rkhie ha ka jingjynjar jong phi; ngan rkhiebeiñ haba wan lap ka jingsheptieng jong phi; haba wan lap ka jingsheptieng jong phi kum ka 'erïong, bad haba nang wan ka jingjynjar jong phi kum ka lyer langthari; haba ka jingshipa bad ka jingsngewpisa ki ngat halor jong phi. Hangta kin khot kyrpad ha nga, hynrei, ngan ym phai ktien; kin wad biang biang ïa nga, hynrei, kin ym shem ïa nga:
U riewspah ba U Jisu u iathuh khana, ynda haba u la poi ha dujok, u la kyrpad ia ka jingiarap, hynrei ym don jingiarap shuh, u la kyrpad ia ka jingisynei, hynrei ym don jingisynei shuh, sa tang ka jingbabe…
(Pule LOUKAS 16:19-31)
Paralok baieit, katba ka jingkhot ban kylla kaba mut ka dang don, wat ym pyneh ia ka dohnud jong phi, phai sha U Trai katba dang biang ka por.
Wat ong, ngan sa kylla pat lashai, hynrei mynta.
PROBERB 27:1
Wat pynsarong ïa lade shaphang kaba lashai; naba mem tip kaei ka ban jia ha kaba shi sngi.
Phim lah ban tip lypa kaei ka ban jia wat hadien shiteng kynta.
Bun bah ki briew kiba mih na ïing, hynrei tang da ki minit jia ka accident ki shu iap noh.
Dei kane ba u Jakob ruh u ong ba ka jingim u briew ka long tang kum u lyoh.
JAKOB 4:13-14
To mynta, phi kiba ong, “Ha kane ka sngi ne lashai ngin ïaleit sha kane ne kata ka nongbah; bad ngin ïashong hangta shi snem, bad ngin ïakhaïi bad ngin ïaïoh nong:” hynrei, haba phim tip ïa kaei ka ban jia ha kaba lashai. Kaba kumno kata ka jingim jong phi? Namar ka long u lyoh uba mihpaw ïa tang shibit, ynda kumta te, u da jah noh jar.
Kumta katba dang biang ka por, phai sha U Trai da ka jingkylla kaba mut. U Blei u dang khot ieit ia phi.
HEBRU 3:15
“Mynta ka sngi, lada phin ïohsngew ïa ka ktien jong u, to wat pyneh ïa ki dohnud jong phi, kumba ha kata ka jingpynkhih bitar.”
Wat pyneh ia ka dohnud jong phi, wat ong ruh ba nga lah don kyrteng ha ka register Balang ka lah biang ia nga, hynrei lada ngim kylla bamut, ngin jot noh kumjuh ong U Jisu.
LOUKAS 13:2-3
“Phi mut ba kine ki nong Galilaïa ki la kham pop ban ïa ki nong Galilaïa baroh, namar ba ki la shah ïa kine kiei kiei? Nga ong ha phi, Em; hynrei lymda phi kylla-ka-bamut, phi baroh phin jot noh kumjuh."
U Jisu u pyni hangne ia ka jingdonkam jong ka jingkylla kaba mut. Ngim lah satia ban shu pynksan ialade ba nga la leh kumne, nga la leh kumta, hynrei lada ngim kylla bamut ngin jot kumjuh, ong U Jisu. Kita ki jingleh jong ngi kin long tang kum ka syrdep jot ha khmat jong U Blei lada khlem ka jingkylla kaba mut.
ISAÏAH 64:6
Naba ngi baroh ngi la kylla long kum u bymkhuid, bad ki hok jong ngi baroh ki long kum ka jaiñ ba bit-tngit: ngi ïapstai noh baroh kum ka sla; te ki jingbymhok jong ngi, kum ka lyer, ki la rong noh ïa ngi.
Hynrei lada ngi kylla kaba mut, ka jingisynei U Trai kan long ia ngi. PROBERB 28:13. Bad ka snam U Jisu kan pynkhuid ia ngi na ki pop jong ngi baroh. 1 IOANNIS 1:9
Kynmaw ba ki spah kiba ngi don, kim lah satia ban pynim lane ban iada ia ngi na ka jingbitar U Blei. Hynrei dei tang ka jingkylla kaba mut ba shisha bad ka jingphai noh sha U Blei.
PROBERB 11:4
Ki spah kim pynmyntoi ha ka sngi ka jingbitar: hynrei, ka hok ka pyllait na ka jingïap.
U Jisu u ong ia uto u samla ba riewspah ba lada yn shim noh ia me ha kane ka miet, ki jongno kine kiei kiei? Kane ka pynshisha ba ki spah kim lah satia ban ai jingiarap ia ngi ha ka por bakut lane ha ka sngi bishar U Blei. Kim lah ruh ban bat ia u briew lada U Trai u shim noh ia ka mynsiem. Hynrei ka jingkylla kaba mut ka ban pyllait ia ngi. LOUKAS 12:13-21
Kumta ka jingkhot ha kane ka por ka long, to phin kylla bamut noh na kano kano ka jingpyrkhat bymman, kylla bamut noh na kano kano ka jingsarong, ka jingsngewhok ka jingsngew-la-biang, phai noh sha U Jisu, pan map ia ki pop baroh ha khmat jong U Blei, te un map bad isynei ia phi. Phin mad ia ka jingkmen jong ka jingpynim. ISAIAH 1:18-20
Comments
Post a Comment