Haba ngi pule ha ka Bible ngi shem shibun ki Lynnong & ki Dkhot kiba iathuh ia ngi shaphang ka jingieit jong U Blei kaba la paw lyngba U Jisu Khrist.
Ioannis 3:16 - "Naba U Blei u la ieit katta katta ia ka pyrthei katba u la aiti noh ia la U Khun ba la kha marwei, ba uei uei ruh uba ngeit ha u, un ym jot shuh, hynrei un ioh ka jingim bymjukut."
1 Ioannis 3:1 - "Ha khmih phi kaba kumno ka jingieit uta U Kpa u la ai ha ngi ba la khot ia ngi ki khun U Blei..."
Rom 5:8, "Hynrei U Blei u pyni shynna ia la ka jong ka jingieit sha ngi, ha kaba haba ngi dang long kiba pop, U Khrist u la iap iapli ia ngi.
Kane kam biang tang ba ngin shu tip, tang ban shu iohsngew ia ka, hynrei ngi donkam ban da mad bad sngewthuh ia ka dor jong kata ka jingieit jong U Khrist.
Ka dor kaba U Khrist u la siew na ka bynta jong ngi ka long kaba rem haduh katta katta, ha kaba ym don ksiar ne rupa ba lah ban kheiñ dor ban ia ryngkat bad ka.
1 Petros 1:18-19, "... haba phi tip ba ym da kiei kiei kiba sep, kum ka rupa lane ka ksiar, ba la siewspah ia phi na kata ka jinglong jingim bathala jong phi ia kaba la aiti pateng la pateng na ki kpa: hynrei da ka SNAM BAKORDOR, kum ka jong u Khun Langbrot bakhlem pop bad bakhlem thohbria, ka jong U Khrist keiñ"
U Khrist u la siewspah ia ngi da ka dor bah, kaba rem haduh katta katta bad haba ngi sngewthuh ia kane ka dor ba U Khrist u la siew, kane kan pynlah ia ngi ban leh eiei na ka bynta U Khrist.
Ngin ia peit katto katne ki bynta ha kane ka por:
1. Ban aiti lut na ka bynta jong U:
Ngi pule ha ka gospel u Ioannis 12:1 ter ter, bad Loukas 7:36 ter ter, ngi iohi shaphang kawei ka riew kynthei kaba la wan ban pynsleh ia U Jisu da kata ka jingsleh kaba rem dor haduh katta katta, la ong ba ka dor jong kata ka jingsleh ka long kat shisnem bai bylla. Hynrei kane ka briew ka la kloi ban pynsleh ia U Jisu bad ban aiti-lut wat la ka long kaba rem dor, bad wat la ka long ka jingmyntoi ia ka jingim jong ka.
Cf- Phil 3:7-8. U Paul ruh u phla ba na ka bynta U Khrist nga kheiñ duh lut ia kiei kiei baroh, wat la ki long ka jingmyntoi ia ka jingim jong u.
U Paul ha ka shithi ba 2 Cor 5:14, u ong ba ka jingieit jong U Trai ka pynleh ia u. U lah ban kheiñ duh ialade, ban aiti lut namar ba u lah mad bad u la sngewthuh ia ka dor jong ka jingieit U Khrist kaba palat ia ka jingieit baroh.
2. Ban shakri ia U Trai khlem da thait:
Ngi la ia kren haneng shaphang kato ka riew kynthei kaba la pynsleh ia U Jisu, haba ngi peit shuh shuh ha katei ka lynnong bad dkhot (Loukas 7:37...) ngi iohi ba katei ka kynthei ym tang ba ka pynsleh ia U Jisu da kata ka jingsleh kaba rem dor, hynrei ka la shakri ruh ia U khlem da thait haduh ba kita kiba don lang hangta ki lah i wit ia ka, ki la sdang ban kren dong, hynrei namar ba ka lah mad bad ka lah sngewthuh ia ka dor jong kata ka jingieit U Khrist, kam shym la pynsngap satia, ka la bteng ban shong ha ki kjat jong U Trai bad shakri ia U.
Cf. Loukas 10:38-42.
3. Ban iaineh skhem ha U Trai wat hapdeng ki jingeh:
Ka jingim Khristan kam dei satia kaba ngin shu suk kynjai beit (bed of roses), khlem iakynduh jingeh shuh, hynrei kadei kaba ngi hap ban challenge ha la ka sngi. Lada ngim pat da mad bad sngewthuh ia ka dor jong ka jingieit U Khrist, ngin artatien bad ngin phaidien. Hynrei haba ngi la mad bad sngewthuh ia kata ka dor, kata kan pynlah ia ngi ban ieng skhem ha U Trai.
Rom 8:35-39, "Uei uban pyniakhlad noh ia ngi na kata ka jingieit ka jong U Khrist? Ka lanot lane ka shipa, lane ka jingpynshitom bein, lane ka jingthngan, lane ka jinglyngkhuid, lane ka jingma, lane ka waitlam? Kat kumba la thoh: Na ka bynta jong me la dang pyniap ia ngi baroh shi sngi, la ñiew ia ngi kum ki langbrot ia ka jingpyniap. Hynrei ha kine kiei kiei baroh kein ngi jop thiaw da uta uba la ieit ia ngi. Namar nga ngeit skhem ba ka jingiap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh kiban sa long, lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah kein ban pyniakhlad noh ia ngi na kata ka jingieit ka jong U Blei kaba ha U Khrist Jisu uba U Trai jong ngi."
To ngin tip ia kane, lada ngi la sngewthuh ia ka dor jong ka jingieit U Khrist, ym nym don ba lah ban pyniakhlad ia ngi na kata.
N.B : U Khrist U ieit ia baroh, hynrei don kiba sngewthuh ia kata ka dor jong ka jingieit jong U bad don ruh ki bym sngewthuh. Nga duwai ba U Blei un plie ia ki jingmut jong ngi, ban sngewthuh ia kane ka dor ba U Jisu u la siew na ka bynta jong ngi.
U BLEI UN KYRKHU. AMEN
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 13-01-2021 | 8:45pm
Comments
Post a Comment