Ka jingthngan bad ka jingsliang ba kynja mynsiem

Ka jingthngan bad ka jingsliang kadei kaba U Blei u la buh ha u briew. La ka dei ha ka met bad ha ka mynsiem ruh kumjuh. 

U Jisu u ong ha ka Gospel U Mathaios 5:6, "Suk kiba thngan bad kiba sliang ia ka hok, naba yn pyndap ia ki"

Hangne ka don ka kyntien kaba ong 'Suk', ha ka ktien English ka ong 'Blessed', kaba mut kita kiba thngan bad kiba sliang ia ka hok kin long kiba suk, kin long ki ba la kyrkhu. Hynrei kita ki bym thngan ne sliang kin long kiba kordit ne ba la tim. Balei? Namar la pynlong ia u briew ba un don kata ka jingthngan bad ka jingsliang (u long u jingthaw ba im). Bad lada u briew um thngan ne sliang, suki suki un iap. Na kata ka daw U Jisu u ong, "Suk".

Kumta kum u jingthaw ba im, ngi hap ban thngan bad ban sliang. U briew u bym ju thngan ne sliang ka pyni ba u don ha ka jingbymkoit bymkhiah bha ka met, ne jingmut jingpyrkhat, bad kane kan long ka jingma kaba khraw ia uta u briew (la kadei u khunlung ne rangbah). Ki Kmie ki kpa kiba lah don la ki khun, lada kin iohi ba ki khun jong ki kim kwah ban bam ban dih, kim thngan kim sliang eiei kan pynkhuslai ia ki shikatdei eh. Kin bun jingmut pyrkhat ioh lehse u pang bad kumta ter ter. Hynrei lada ki khun jong ki pat ki khlain bha ka bam ka dih kin kmen kin sngewtynnad, kata ka dei ka jinglong jong ki kmie ki kpa. Nga ngeit kane ruh kadei kaei kaba don ha U Blei, ma U ruh lada u iohi ia ki bangeit ki bym don shuh kata ka jingthngan bad ka jingsliang ba kynja mynsiem kan pynkhuslai ia U. Kumta ngi donkam ban thngan bad ban sliang.

Kaei ka ban pynlong ia u briew ba un thngan bad sliang? 

Kumba nga ong iaphi haneng ba ka jingthngan bad ka jingsliang kadei kaba U Blei u la pynlong hapoh jong ngi, kaei kaba ngi donkam ka long kumno ban pynkhih ia kata ka jingthngan bad ka jingsliang kaba hapoh jong ngi.

Ha ka met jong ngi, lada ngim sngewbang bam bang dih, kaei ba ngi leh ka long ngi thaw ki lad ki lynti kumno ban bang pat ban bam ban dih. 

Ka lad kaba bha tam ia u briew ba un thngan bad sliang ka long da kaba trei ba ktah, khih ksaid (exercise). Phin iohi u briew u bym trei kam trei jam, u bym ju khih ju ksaid un duna ka jingthngan bad jingsliang. Hynrei kito kiba trei ba ktah, ba khih ba ksaid phin iohi tang shiphang arphang ki lah thngan, ki lah sliang, bad lada slem ban ioh bam ym long. Bad haba u la ioh bam ioh dih u da sngewhun shisha, bad ka pynlong ruh ia u ban un shait un khlain, un san un heh. 

Kumjuh ruh ka long ha ka jingim ba kynja mynsiem. Ba ngin thngan bad sliang ngi donkam ban leh eiei, ban bunkam ha ka kam U Blei. U briew uba bunkam ha ka kam U Blei u sngewthuh kham bha ia kata ka jingbang bad ka jingthiang jong ka ktien U Blei ruh. U David u ong, "Katno ki long kiba thiang ki ktien jong me ia ka shyntur jong nga! Kham thiang kein ban ia ka ngap ha ka shyntur jong nga!" - Salm 119:103. U briew u bym bunkam ha ka kam U Blei, u pule ia ka Bible tang shiphang arphang u lah ngiah, lah kdang, long thik kum uto u bym ju trei ju ktah, bam tang khyndiat lah kdang, lah ngiah.

U briew u ba thngan ba sliang u san kloi, hynrei ki bym ju thngan ju sliang ki sah hajuh, kim san. U Blei um kwah ba ngin sah ha juh, u kwah ban ngin san bad iai san.

Kumta kum ki bangeit ngi hap ban don kane ka jingthngan bad jingsliang ba kynja mynsiem. 

1. THNGAN IA KA KTIEN U BLEI. 

U Petros u ong, "Kum ki khunlung ba dang kha, to phin kwah hir hir ia kaba sngur ka dud kaba dei mynsiem, khnang ba phin ioh san da ka sha jingpynim" 1 Pet 2:2. 

U Blei u kwah ia ngi ba ngin long kum ki khunlung, ba ngin thngan bad sliang ia ka Ktien U Trai, dei tang ma ka kaba lah ban pynsan ia ngi ha kaba kynja mynsiem.

U Paul u kyntu ha ka shithi sha ki Kolosai 3:16, "Ai ba ka ktien U Khrist kan shong kyrhai hapoh jong phi..." Kumno ka Ktien U Khrist kan shong kyrhai ha ngi? Ngi donkam ban pule bad puson ia ka.

Ngi hap ban pynlong ia lade ban thngan ban sliang ia ka Ktien U Blei kham palat ban ia kaba ngi thngan bad sliang ia ka jingbam ha ka doh. U Jisu u ong, "Bym tang da u kpu hi ba u im u briew, hynrei da ki ktien baroh kiba mih noh na ka shyntur U Blei. Mathaios 4:4. 

2. SLIANG IA U TRAI. 

U Nongrwai Salm u ong, "Kumba u thrang u keirang ia ki wah um, kumta ka thrang ka mynsiem jong nga ia me, Ah U Blei. Ka mynsiem jong nga ka sliang ia U Blei, ia U Blei uba im..." Salm 42:1-2.

Shuh shuh ha ka Salm 63:1, U David u ong, "Ah U Blei, me long U Blei jong nga; dang step ngan wad ia me; ka mynsiem jong nga ka sliang ia me, ka doh jong nga ka sngewkynmaw ia me, ha ka ri baryngkhiang bad bashitom, ha ka bym don um." 

U briew uba sliang u hap ban wad, hangno ka um ka don, kumjuh ruh uta uba sliang ia U Trai, ka pynlong ia u ba un wad ia U Trai.

Pyrkhat shaphang U David, u long u syiem bakhraw ha kito ki por, bad kaei kaba u kwah u ioh lut, hynrei u sngewthuh ba kita baroh kim pynhun satia ia u, hynrei dei tang U Trai.

Ai ba ngi ruh ngin iai don ia kane ka jingthrang bad jingsliang ia U Trai, ban shakri ia u, kumba une u Nongrwai Salm u thrang bad u sliang. 

(Ban beh sha ka jingiaseng lang ki riewkhuid - Heb 19:25)

3. SLIANG IA U MYNSIEM BAKHUID

Ioannis 7:37-39, "Jar uba sliang, wan sha ki um..."

U Paul u ong, "To long kiba la dap da U Mynsiem..."

Ngi donkam ban sliang ia ka jingpyndap U Mynsiem Bakhuid, sliang ruh ia ki jingai U Mynsiem.

Haba ngi thngan bad ngi sliang, da shisha U Blei un pyndap ia ngi.

U BLEI UN KYRKHU IAPHI. ANEN

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Phi lah ruh ban sngap ia ka audio ha kane ka YouTube link

© Jester Mawlong | 21 January 2021