Salm 25:1-3, "Sha me, Ah Trai, nga kyntiew ia la ka mynsiem. Ah U Blei jong nga, ha me nga la shaniah, to wat ai ba yn pynlehrain ia nga; wat ai ba ki nongshun jong nga kin leh risa halor jong nga. SHISHA YM DON MANO MANO UBA AP KYRMEN HA ME U BAN IOH LEHRAIÑ: kita keiñ ki ban ioh lehrain kiba shet kylla khlem daw."
U Nongrwai Salm u David u ong, sha Me ah Trai nga kyntiew ia la ka mynsiem, ka jingmut ka long ba u aiti lut ialade baroh sha U Trai, u buh ia la ka jingngeit bad jingshaniah baroh ha U Trai, namar ba u la juh iohi ha ki por baroh ba kita kiba ngeit bad shaniah ha U Blei kim juh shah lehrain sah, ym ju iehnoh sah kumto ha ka lehrain. Hynrei U Blei ha kaba kut u pyndonburom ia ki. Hallelujah
Ngin ia peit na ka Bible tang katto katne kumno ba U Blei um shym la shah da shisha ba kita kiba ngeit ha U kin ioh lehraiñ.
1. U Abraham: U Abram u la ia shongkurim bad ka Sarai, hynrei da ki snem ki snem kim shym la ioh khun, namar ba ka tnga jong u ka long kaba lyngki, hynrei U Blei u la khot bad la jied ia u Abram bad u la kular ban ai khun shynrang bad ba u symbai jong u un long kat ki khlur ka sahit bneng. Hadien U Blei u la pynkylla noh wat ia ka kyrteng jong ki ruh, ia u Abram la khot noh da u Abraham bad ia ka Sarai la khot noh ka Sara. Abraham ka mut u kpa kiba bun ki jaidbynriew, bad Sara ka mut ka kynthei ka Kmie jong kiba bun ki jaidbynriew, kaba donburom, ka khun syiem, kaba dap jingkmen.
(Pule hi ia kine ki dkhot khnang ba phin sngewthuh kham bha ia kane - Genesis 15:1 ter ter, Genesis 17:1 ter ter; Genesis 18:1 ter ter)
Hadien kane ka jingpynkylla ia ka kyrteng jong ki, lehse ki briew kin ia rkhie, kin ia sammut namar ba U Blei u ong ia u Abraham u kpa kiba bun ki jaidbynriew, haba ialade u lah don kumba 99 snem bad ka lok jong u ka Sara ka lah don kumba 90 snem eiei, kaba katkum ka rukom briew ka lah long kaba eh bad ka bym lah shuh ban long ban dang ioh khun ka briew ba lah tymmen, nalor kata ruh ka briew ka long kaba lyngki.
Hynrei u Abraham u la ngeit skhem ha kaei ba U Blei u ong bad kular, u la shaniah khlem artatien. Ha kaba kut shisha, U Blei u la ai khun shynrang ia u bad la pynkyrteng u Isaak ia u, bad na u Isaak la mih ki jaid bynriew Israel, bad na u Israel la mih U Jisu uba ngi ruh da kaba ngeit ha u Jisu ngi lah long kita ki khun jingkular, ki khun u Abraham uba kat ki khlur ka sahitbneng. Hallelujah (Genesis 21:1 ter ter, Ka jingkha ia u Isaak).
2. U Joseph: U la iohi ia ka jingithuhpaw ba U Blei un rah ia u shaduh ka kyrdan Nongsynshar, kumta u la iathuh ha la ki hynmen, ha la ka Kmie u Kpa (Lehse wat ha ki paralok ruh), hynrei baroh kim shym la ngeit ia kata ba kan long ha ka jingim jong u Joseph. Ki la ia rkhiebeiñ haba u la iathuh ia ki, ki da ialeh ruh da ka bor briew ban pynpulom ia kata ka vision u Joseph, hynrei U Blei u la pynurlong ia kata ka jingphohsniew bad ka jingiohipaw jong u.
(Pule hi na kine ki dkhot khnang ba phin sngewthuh kham bha ia kane - Genesis 37:1-11; 12-36; Genesis Lynnong ba 39 haduh ka lynnong ba 46)
3. U David: Ki briew ki la ia rkhiebeiñ ia u haba u leit mih sha madan thma, wat u hynmen jong u, u bitar ia u, u syiem Saul u rkhiebeiñ bad u da ong ruh ba mem lah. Nai ia kren ia u Goliath lei uba long u nongshun ki Israel, katno ba u da rkhiebeiñ haduh bym long shuh. Hynrei, ha kaba kut la pyndonburom ia u David, u la jop pyrshah ia u Goliath, la kyntiewnam ia u, bad haduh ba un da kylla long u syiem bakhraw. Hallelujah!
(Pule hi na kine ki dkhot khnang ba phin sngewthuh kham bha ia kane - 1 Samuel 17:ter ter)
4. Kiba pynkhreh ia ka jingkhawai shongkurim ha Kana Galilaia: Katba ka jingkhawai ka dang iaid shaphrang, ki briew ki dang ia shongshit bha, kynsan kynsan ka khubor ka wan sha kita kiba pynkhreh ia ka jingkhawai, YM DON WAIÑ SHUH!!!
Mutdur, ha kaba kum kata ka por aiu kan jia lada dei ia ngi ruh, lada ngi pynkhreh jingkhawai shongkurim bad kynsan kynsan kin wan iathuh iangi ba ym don doh shuh, ne ka ja ka lah lut u briew dang bun ban dang wan bam, bad lada ki briew ki tip katno kan long kaba jah burom, ka jinglehraiñ. Kine ki briew kiba pynkhreh ia kata ka jingkhawai shongkurim ki lah jan khlemraiñ, hynrei namar ba ki khot sngewbha ia U Jisu sha kata ka jingkhawai shongkurim, bad haba U Jisu u don hangta, um shym la shah ba kin ioh lehraiñ, u la leh kambah da kaba pynkylla Waiñ ia ka Um. Hallelujah! Ka Waiñ ruh ym dei kaba malu mala, hynrei kaba da bang haduh katta katta, haduh ba ki briew ki lah iaroh ym lah ong shuh.
(Pule hi ia kane ka lynnong ba phin sngewthuh kham bha - Ioannis 2:1-11).
Dang bun kiwei pat, (bad lada ngin iakren lut ym dap ka por) kiba ngi iohi ha ka Bible kumno ba kita kiba ngeit bad shaniah ha U Trai kim ju ioh lehraiñ, hynrei tang katne shuwa ruh nga ngeit ka la iarap ia ngi kumno ba ngi ruh ngin ym artatien ia une U Blei u ba ngi ngeit bad shakri.
Paralok baieit, lehse ha ka jingiaid lynti bad U Trai, phi iashem shibun ki jingeh bad ki jingshahkrenbeiñ - lehbeiñ, jingshah rkhiebeiñ, phi sngew kumban phaidien, hynrei to iai ngeit bad iai snoh skhem triang ha U Trai, phin shem ha kaba kut un pyndonburom ia phi ruh.
Wat lyngngoh artatien ia U Trai. U long u juh mynhynnin mynta bad sha bymjukut (Heb 13:8). U Blei uba la pyndonburom ia u Abraham, ia u Joseph, ia u David bad ia kita kiba pynkhreh ia ka jingkhawai shongkurim ha Kana Galilaia, U long u juh U Blei u ban pyndonburom iaphi kiba ngeit ha U.
U Blei u bym shym la pynlehrain ia la ki briew jong U mynshuwa, un nym shah ba yn pynlehrain iaphi ruh.
Rom 10:11, "Namar kata ka jingthoh ka ong: Ia uno uno baroh uba ngeit ha u yn ym pynraiñ buhkhoh."
N.B: Katba nga dang thoh ia kane ka article nga tuid ki ummat haba nga pyrkhat kumno U Trai u pyndonburom ia la ki briew, kynthup ia nga ruh. O Hallelujah! Ainguh ia Me Trai 🙌
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 11-01-2021 | 7:45AM
Comments
Post a Comment