Ha ka 1 tark January, 2021 (New Year) katba nga dang duwai step, ka la wan ka sur hapoh jong nga kaba ong, "Wat Ha Kaba Sniew - Ka Don Kaba Bha". Kane ka la pynpyrkhat ia nga kaei ka jingmut jong kane ka ktien. Hadien katba nga dang pyrkhat, U Trai u la pynkynmaw ia nga shaphang U Elijah, kumno ba u la iakynduh ia ka nemsniew kaba khraw ha ka por jong u, ha kaba ym shym la don slap da ki snem, haduh ba ki jingthung jingtep kim long shuh, ki um ki wah ki la rngad lut, ka lah da sniew shisha shisha. Hynrei ha kaba kum kata kaba sniew, dang don kaba bha kaba U Blei u la pynkhreh kyrpang na ka bynta ki briew jong u.
To ngin pule khyndiat ia kaei kaba la jia ha ka por U Elijah
1 Ki Syiem 17:1-7
U Elijah u iathuhlypa ia ka jingtyrkhong
U Elijah u nong-Tishbi, uba la long uwei na ki nong-Gilead, u la ong ha U Ahab, Katba im U Trai, U Blei ki Israel, ha khmat jong uba nga ieng, kan ym don umjer lymne slap ha kine ki snem, hynrei tang katba kum ka ktien jong nga. Bad ka ktien U Trai ka la wan ha u, ka da ong, To mih me nangne, bad leit shaphang mihngi, bad buhrieh ia lade hajan ka wah Kherith, kaba long ha khmat ka Jordan. Bad men dih na kata ka wah; bad nga la hukum ia ki tyngab ban bsa ia me hangta. Kumta u la leit bad u la leh kat kum ka ktien U Trai; naba u la leit shong hajan ka wah Kherith, kaba ha khmat ka Jordan. Ki tyngab te ki la wallam kpu bad doh mynstep, bad kpu bad doh lajan miet; bad u la dih na kata ka wah. Te hadien katto katne, kata ka wah ka la rngad, namar bym shym la don slap ha ka ri.
Ngi iohi hangne kumno ba wat ha kata ka nemsniew kaba lah da sniew shisha, hynrei U Blei u kynmaw ia la ki briew jong u, u pynlong khnang ruh ba ki briew kin klet ba don ka wah Kherith, lada ki briew ki kynmaw ne tip ia ka wah Kherith ba ka dang don um kin jin da la mareh shata ban leit tong um, bad khlem artatien tang shi sngi kata ka wah ka la lut ne rngad noh namar ka jingwan iaknieh um jong ki briew, hynrei ym don ba leit tong um shata. Nga ngeit ka dei ka jingpynlong jong U Blei ba ki briew kin ym kynmaw ia kata ka wah Kherith khnang ba u briew jong U Blei un ioh ban dih bad ban im. Nalor nangta ngi iohi kumno ba ka tangab ka la wan rah doh bad kpu ia U Elijah mynstep bad janmiet. Mut dur ha kaba kat kata ka nemsniew, wat ki mrad ki la don ha ka jingkyrduh, hynrei kane ka tyngab (kaba long ka mrad ba kangar) ka dang kynmaw ia u briew jong U Blei. Dei kane kaba u Nongthoh ki Proberb u ong, "U briew uba bha un iehnoh sah ia ka bynta pateng ha ki khun ki khun jong u; bad ia ka spah jong u nongpop la tyngkai ia uba hok."
Nangta lada ngin peit biang ia kaei kaba la jia ha ka por jong U Elijah, ka nemsniew, ka jingtyrkhong ka la nang jur nang jur haduh ba kata ka wah Kherith ruh ka la rngad noh. Wow!!! Hynrei wat haduh katta ruh dang don kaba bha na ka bynta ki briew jong U Blei.
Ngin bteng ban pule 1 Ki Syiem 17:8-16
Elijah bad ka riewkynthei
Ka ktien U Trai te ka la wan ha u, ka da ong, To ieng joit, khie leit sha Sarephat, kaba dei ia ka Sidon, bad shong hangta: ha khmih, nga la hukum ia ka riewkynthei kaba hangta ban bsa ia me. Kumta u la ieng bad u la leit sha Sarephat; te haba u la poi sha ka khyrdop ka shnong, ha khmih, ka riewkynthei ka la don hangta kaba lum dieng prew; te ynda u la khot ia ka, u la ong, Nga kyrpad ia pha, to wallam ia nga khyndiat ka um ha ka khuri, ba ngan ioh dih. Te haba ka dang leit ban wallam ia ka, u la khot ia ka, u la ong ruh, Nga kyrpad ia pha, to wallam kpu ia nga khyndiat ha ka kti jong pha. Ka te ka la ong, Katba im U Trai U Blei jong me, ngam don uwei u kpu, hynrei tang shikham u purew ha ka shang, bad khyndiat ka umphniang ha u klong: bad, ha khmih, nga shu khar artylli ki dieng prew, ba ngan ioh leit sha ïing bad shet ia ka ia lade bad ia u khun jong nga, ba ngin bam ia ka, bad iap noh. Te U Elijah u la ong ha ka, Wat sheptieng; to leit bad leh kumba pha la ong: hynrei to khreh shuwa ia nga iwei i kpu barit, bad wallam ia ita sha nga, bad hadien kata sa khreh ia lade bad ia u khun jong pha. Naba kumne ong U Trai, U Blei ki Israel, U purew ha kata ka shang un ym lut, lymne ka umphniang ha uta u klong kan ym duh, tadynda kata ka sngi ba U Trai un phah slap ha ka khyndew. Ka te ka la leit bad ka la leh kat kum ka jingong U Elijah: bad ma ka, bad ma u, bad ka ïing jong ka, ki la iabam bun sngi. U purew ha kata ka shang um shym la lut, lymne ka umphniang ha uta u klong kam shym la duh, katba kum ka ktien U Trai, kaba u la kren da U Elijah.
Ka nemsniew halor ka nemsniew, hynrei still dang don kaba bha ia la ki briew jong U Blei. Hallelujah! Ka pyrthei ka la lynniar kliang liang liang !!! Hynrei ia kita kiba sheptieng ia U Trai ym shym la iehnoh, ym shym la lyndet noh, la kynmaw kyrpang da U Trai. U Elijah u la bam haduh ban da kut ka nemsniew. U Nongrwai Salm u ong, Nga la long samla, te mynta nga la tymmen; hynrei ngam shym la iohi ia uba hok ba la iehnoh noh ia u, lymne ia u symbai jong u ba ki iakhrong kpu. Salm 37:25
Paralok baieit, ngi iohi mynta ia kane ka jingjia (pandemic/corona virus) kaba la wan jia ha ka pyrthei baroh kawei, ngi lah ban ong kaba sniew shisha, ka lah ruh ban long kumta. Ngim lah ruh ban tip kaei ka ban dang wan jia ha une u snem bathymmai 2021, hynrei to ngin tip ba watla kaba sniew katno katno kan wan ruh hynrei ia phi kiba sheptieng ia U Trai, U Trai u la tyngkai lypa ia kiei kiei kiba bha na ka bynta jong phi. Phin ym iap, phin ym shah ktah ha kata kaba sniew. U nongrwai Salm u ong, "Ngan ym iap, hynrei ngan im, bad ngan pynbna ia ki jingleh U Trai" Salm 118:17
Namarkata to ngin ym sheptieng, to ngin ym khynniuh, hynrei kaei kaba ngi dei ban leh ka long, to ngin nang kham jan bad kham ieit shuh shuh ia U Trai, to ngin nang pynkhlain ia la ka jingngeit bad jingshaniah jong ngi ha U. U Blei uba la ri bad tyngkai ia kiei kiei kiba bha na ka bynta U Elijah wat ha ka por kaba sniew, u long u juh U Blei uba ngi shakri.
U Blei un kyrkhu iaphi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong
Comments
Post a Comment