U Apostol Paul u kyntu ia ki bangeit ba kim dei ban ai jaka ia u Soitan. Bad kane ka jingkyntu ka dang long valid ruh na ka bynta jong ngi ki bangeit haduh kine ki sngi ba mynta.
Uei une u Soitan?
U Soitan ha kaba mynnyngkong u dei u Angel jong U Blei uba ju ialam ia u paidlang jong U Blei ha ka jingiaroh bad mane ha bneng, hynrei namar ka pop jong ka jingsarong (pride), U Blei u la shop noh ia u arsut na bneng sha khyndew, bad naduh kane ka por u la kylla long noh u Soitan.
Ngin pule na ka Bible kitab Esekiel bad Isaiah khnang ba ngin sngewthuh kham bha shaphrang kane.
Esekiel 28:11-19, Ka ktien U Trai ka la wan pat ha nga, ka da ong, Ko khun u briew, to iam sngewsih na ka bynta u syiem Tyros, bad ong ha u, Kumne u ong U Trai U Blei: Me pyndait laha ia ka jingjymma, ba la dap da ka jingstad, bad ba la janai ha ka jingitynnad. Me la long ha Eden ha ka kper U Blei; u mawkordor baroh u la long ka jingkup jong me, u sardios, u topas, bad u diamon, u beril, u oniks, bad u jasper, u sapphir, u emerald, bad u karbonkl, bad ka ksiar: ka jingshna ia ki kanjari jong me bad ia ki tangmuri jong me ka la don ha me; ha ka sngi ba la pynlong ia me la taiar ia ki.Me la long u kherub ba la sleh uba kah: bad nga la buh ia me, kumta ba me la long halor u lum bakhuid jong U Blei; me la iaid sharum shaneng hapdeng ki maw bameh ding. Me la long janai ha la ki lynti naduh kata ka sngi ba la pynlong ia me, haduh ba la shem ia ka jingbymhok ha me. Da ka jingbun ka jingkhaïi jong me ki la pyndap ia ka pdeng jong me da ka jingleh bor, bad me la leh pop; namarkata nga la bred noh ia me kum uba sang na u lum U Blei; bad nga la pynjot ia me, ko kherub uba kah, napdeng ki maw bameh ding. Ka dohnud jong me ka la meng namar ka jingitynnad jong me, me la pynsniew ia la ka jingstad na ka daw ka jingphyrnai jong me: nga la bred ia me ha ka khyndew, nga la buh ia me ha khmat ki syiem, ba kin shu khmih ia me. Da ka jingbun ki jingbymhok jong me, ha ka jingbymhok ka jingkhaii jong me, la lehbeiñ sang ia la ki jaka kyntang; namar kata nga la pynmih ia ka ding napdeng jong me, ka la thang duh ia me, bad nga la pynkylla dpei ia me halor ka khyndew ha khmat kita baroh kiba iakhmih ia me. Baroh kiba ithuh ia me hapdeng ki kynja bynriew kin lyngngoh ia me: me la kylla long ka jingitieng, bad men ym long shuh lano lano ruh.
Isaiah 14:12-19, Kumno me la hap na bneng, ko lurshai, u khun jong ka step! kumno ia ot noh ia me sha ka khyndew, uba la ju pyndem lin ia ki jaid bynriew! Te me la ong ha la ka dohnud, Ngan kiew shabneng, ngan kyntiew ia la ka khet haneng ki khlur jong U Blei; bad ngan shong halor u lum ka jingiaseng, ha kiba kut phang shatei: ngan kiew sha lyndet ki lyoh; ngan long kum Uba hajrong tarn. Pynban yn sa pynhiar ia me sha dujok, shaduh trai jong ka liewlong. Kita kiba iohi ia me kin iakhmih shain ia me, kin iapyrkhat ia me, ki da ong, Dei une u briew uba la pynkhynniuh ia ka khyndew, uba la pynkhih ia ki hima; uba la pynlong ia ka pyrthei kum ka ri khlaw, bad uba la pynkyllon ia ki shnong jong ka; ubym shym pyllait ia ki nongsah byndi sha la ki ïing. Ki syiem ki jaid bynriew baroh, baroh na ki kein, ki thiah ha ka burom, uwei uwei ha la ka jong ka ïing. Hynrei ia me la shu bred noh na la ka jingtep kum u tnat ba isih, ba la kup da kiba la pyniap, ia kiba la dung peibla da ka waitlam, kiba leit hiar sha ki krem maw; kum ka metiap ba la iuh roit.
Naduh katei ka por u Soitan um don jaka shong neh shuh, u shu iaid sharum bad shaneng ha ka khyndew ong ka ktien U Blei.
Ngi pule ha ka kitab u Job kumno ba katba u Job bad la ki khun ki dang iaseng lang, u Soitan ruh u wan hapdeng jong ki ha kata ka jingiaseng, bad haba U Blei u la iohi ia uta u Soitan, U Blei u la kylli, "Me wan na ei...? U Soitan u jubab, "na kaba iaid sharum shaneng ha ka khyndew"
Job 1:6-7, "Te la jia ka sngi haba ki khun U Blei ki la wan ieng ha khmat U Trai, bad U Soitan ruh u la wan hapdeng jong ki. Bad U Trai u la ong ha U Soitan, Nangno me wan? U Soitan te u la iathuh ha U Trai, bad u la ong, Na kaba leit shane bad shawei ha ka khyndew, bad na kaba iaid sharum shaneng ha ka".
Ngi iohi hangne shaphang u Soitan kumno ba naduh katei ka por um don jaka shong neh shuh, u shu iaid sharum bad shaneng ha ka khyndew, u wad ioh shu kumno re kumno un shem jaka shongthait ne jaka shongneh, bad ka jaka kaba u ieit eh ban shong ka dei ha u briew. Katba lah un ialeh ban ioh bsuh khlieh ha u briew bad lada u briew u ai jaka tang tiak ruh ka lah biang ia u ban ioh rung syndon kluk, bad ym tangba un rung, hynrei da u lah un shu nguid tylli syndon ong ka ktien jong U Blei.
1 Pet 5:8, "To phin leh adkar, to phin iasharai; naba uta u nongialeh jong phi uba u Soitan. kum u sing bakyrhuh u iaid kylleng, u da wad khnang ia uno uno ruh ba un ioh nguid tylli.
Dkhot ba 9, ka ong ia uta (Soitan) hap ban ialeh pyrshah, kiba skhem ha la ka jingngeit ha U Jisu Khrist. Ym dei ban ai jaka wat tang khyndiat eh ruh.
Ephesos 4:27, "Lymne wat ai jaka ia u Soitan"
Kumta kum ki bangeit ngim dei satia ban ai jaka ia u Soitan. La ka long ha ka ktien ka thylliej, ha ka jingmut jingpyrkhat, ha ka jinglong jingim bad la ka long ruh ha ka jingleh jong ngi. Ngi hap ban da pyrkhat bad ïit bha ioh ba kumno re kumno kata kaba ngi kren ne ngi leh, u Soitan un ioh jaka.
Sa shisien nga ong biang ba ngim dei ban ai jaka ia u Soitan.
Lada ngi pynjem, ngi khroh tang khyndiat ruh, tang katta un snoh triang, dei namarkata u Jakob u ong, "... hynrei to ialeh pyrshah ia u Soitan te un phet iap noh na phi" - Jakob 4:7.
"LADA NGI IALEH PYRSHAH, UN PHETIAP - LADA NGIN AI JAKA, UN NGUID TYLLI"
Kumta to ngin nym ai jaka ia u Soitan ha ka jingim jong ngi, hynrei ai ba U Trai un ioh jaka ha ka dohnud, mynsiem, jingmut jingpyrkhat jong ngi baroh. U Blei un kyrkhu iaphi 🙏
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 9-01-2020
Comments
Post a Comment