(Text : Exodus 14:1 ter ter)
Ha ka juh ka step New Year (1st January 2021) katba nga dang puson shaphang u snem ba la dep, u snem 2020, kumno ba ka pyrthei ka la iakynduh ia ka khlam corona virus (COVID 19) ha kaba kane ka la pynkhynniuh ia ka pyrthei baroh bad kat shaba leit ki briew ki la iathuh khana tang shaphang uta u corona virus, bad shaphang ka jingsniew jong kane ka pyrthei. Bad katba nga dang puson shaphang kata, U Trai u la pynkynmaw ia nga shaphang ki khun Israel bad ki shipai nong Egypt, kumno ba ki la iakynduh ia ka duriaw basaw bad ha kata ka jingiakynduh bad ka jingiaid lynti ngi iohi ba kumno ka don shisha ka jingiapher kaba khraw hapdeng kita kiba don ia U Blei bad kita ki bym don ia U Blei.
Haba ki khun Israel ki la mih na Egypt ban leit noh sha kata ka ri jingkular ki la iakynduh ia ka duriaw basaw bad ha kata ka jingiakynduh ki khun Israel mar shu iohi ia kata ka duriaw basaw ki la sheptieng shikatdei eh bad ki la lynniar ong ka ktien U Blei. Khlem da tip ia ka 'dang ka 'duh, ki la shu ia lynniar hangta, haduh ba la sngew klumar sa u Moses u Nongialam jong ki.
Kane ka ju jia ruh wat ha ka jingim jong ngi ki bangeit/ki Khristan, bunsien haba ngi iakynduh ia kano kano ka jingeh ne haba wan jia kano kano kaba sniew, hangto hangto hi, (automatically kumba ong ka ktien phareng) ngin ia lynniar, khlem da tip, khlem da bishar bha, ngi shu ia lynniar kum ki khun Israel. Wat myn ha kane mar sien wan u corona virus, mar sien jia ka lockdown, baroh baroh ngi la ia lynniar wow u corona! u corona!! u corona!!!
Lah shu ia khie wahleng baroh baroh. Lah shu ia ñiew sa tang ia ki numbers jong u corona, haduh ba lah ia klet ban ñiew ia ki jingkyrkhu U Blei. Ynda nga pyrkhat mynta marwei marwei nga samrkhie ialade ruh 😂😂😂 kata ka dei ka jinglong briew, hynrei haba ngi la pyrkhat bad puson bha bad ynda ngi la phai sha ka Ktien U Blei ngi sdang ban sngewthuh pleng U Blei un nym shah ia la ki jong ba kin shu iap klumar kumba iap ki bym don Blei.
Ngin ia phai biang shaphang ki khun Israel bad ka duriaw basaw. Kaba phylla ngi iohi ba haba ki khun Israel ki la iaid lyngba kata ka duriaw basaw (kaba long ka duriaw kaba ma haduh katta katta, wat haba u riew khlain bor lada u hap ha kata ka duriaw basaw un nym lah satia ban ioh lait im) kim shym la ngam jyllop, ki la lait sha shiliang da kaba suk. Bad ngi iohi hadien kata la wan beh ki shipai u Pharoah (shipai Egypt) bad ynda ki la poi hapdeng kata ka duriaw ki la ngam bad iap jyllop baroh.
Mut dur, ka juh ka duriaw basaw ki iaid, ki khun Israel kiba don ia U Blei ba im kim shym la ngam jyllop, U Blei u la pynkad arliang ia kita ki um sha kadiang bad sha kamon bad ki khun Israel ki la iaid kumba iaid ha ryngkew, hynrei ki Egypt ki bym don ia U Blei ba im ki la ngam jyllop baroh. Ka duriaw basaw kam shym la sheptieng ne burom ia ki.
Ainguh ia U Blei ba um shym la thew bad ba u dang map bad pyllait shiliang ia ki khun Israel wat la ki la lynniar klumar ruh. Ainguh ia U Blei, ma ngi ruh ngi la ia lynniar klumar haba wan u corona virus, hynrei U Blei um shym la thew ia kata ha ngi, u dang pyllait im ia ngi haduh mynta, ngi la lait sha shiliang ia u snem 2020, bad ngi ngeit un nang ialam ia ngi wat ha une u snem thymmai 2021 ruh.
Kane ka long ka jingai mynsiem bad ka jinghikai ia ngi ruh ba ngim dei ban sheptieng, ban shu lynniar klumar khlem da pyrkhat, khlem da puson kiei ngi long, ngim dei ban shu ia lynniar lang kumba lynniar ki bym don Blei. To ngin tip ba ngi don ia U Blei ba im. To ngin ngeit bad shaniah skhem tang ha U. To ngin nym phet jngai na U bad lada ngim pat ngeit ne pdiang ia U Trai Jisu, to pdiang bad ngeit noh mynta. U Blei un kyrkhu iaphi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | January 2021
Comments
Post a Comment