Text - Mat 21:12-17,
¹²U Jisu te u la leit hapoh ka temple, bad u la beh noh baroh ia kiba die bad ba thied ha ka temple bad u la pynkyllon ia ki miej jong ki nongiapein sbai, bad ia ki jingshong jong kita die ia ki paro; ¹³bad u la ong ha ki, La thoh: Ia ka ïing jong nga yn khot ka ïing jingduwai, hynrei phi, phi la pynlong ka krem nongtuh ia ka. ¹⁴Kiba matlah bad kiba dkoh ruh ki la wan ha u ha ka temple, bad u la pynkhiah ia ki. ¹⁵Haba ki rangbah lyngdoh bad ki nongthoh ki la iohi ia kita ki kam phylla kiba u la leh, bad ia ki khynnah ba ki iapyrta ha ka temple, bad ba ki ia ong ruh, Hosanna ia U khun U Dabid! ki la sngewbitar eh, ¹⁶bad ki la ong ha u. Me iohsngew aiu kine ki iaong? U Jisu te u la ong ha ki, Hooid, phim pat ju pule, Na ka shyntur ki khunlung bad kiba dang buin me la pynjanai ia ka jingiaroh? ¹⁷Haba u la iehnoh te ia ki, u la leit noh na kata ka shnong sha Bethania, bad u la thiah miet hangta.
Haba ngi pule hangne ngi iohi ia ka jingbitar jong U Trai Jisu pyrshah ia kito baroh kiba don ha kata ka temple, khamtam ia kita kiba iadie iathied bad kumta ter ter. Balei U Jisu u da bitar haduh katta kata? Ka jubab ka long namar ba ki briew ki la pyndonkam bakla (miss use) ia kata ka temple, bad kata ka temple kam shym la long satia kumba u khmih lynti ba kan long, na kata ka daw U Trai Jisu u la bitar, u la don ia kita ki briew.
Mynta ngin ia peit, kaei kaba U Trai u khmih lynti ia ka temple ba kan long?
1. KA TEMPLE KADEI BAN LONG KA BAKHUID BAKYNTANG – v.12, U la beh noh ia kiba ia die ia thied… U la pynkyllon ia kita ki miej jong kita kiba iadie iathied hangta... U la pynkhuid phar ia kata ka temple.
2. KA TEMPLE KADEI BAN LONG KA ÏING JINGDUWAI – v.13, U ong ba ia ka ïing jong nga (temple) yn khot ka ïing jingduwai. Ba ki briew kin ioh ban wan ban duwai, ban wad ia ka khmat U Trai bad ban ai ka jingshakri ia U Blei. Um kwah ba ki briew kin pynlong ka krem nongtuh ia ka, ba kin pyndonkam bakla ia ka. Kata ka dei kaei ba U Jisu u kwah.
3. KA TEMPLE KADEI BAN LONG KA JAKA JONG KA JINGKYRKHU IA KIBA BUN – v.14, Namar ka jingpyndonkam bakla jong ki briew, kiba pang ba shitom ki la hap ban shong shabar, kim lah shuh ban rung hapoh, ki la hap ban shu ia shong khrong shabar ka temple. Hynrei ngi iohi hadien ba U Jisu u la beh noh ia kita kiba iadie ia thied, kita kiba matlah, kiba dkoh ki la ia wan hapoh ha U Jisu bad u la pynkhiah ia ki.
4. KA TEMPLE KADEI BAN LONG KA JAKA JONG KA JINGIAROH IA U BLEI (Na ka Temple kan mih ka jingiaroh ia U Blei) – v.15,16, Lah ban ong ba da ki snem kam ju don shuh ka jingiaroh ia U Blei na kane ka temple, ha ka jaka ka jingsawa jong ka jingiaroh la mih pynban da ka jingsawa jong ki paro, ki syiar, ki sniang, ka jingia kiw-kiw, kaw-kaw bad kumta ter ter. Hynrei hadien ba U Jisu u la pynkhuid, U la beh ia kita baroh kiba iadie iathied, sa shisien pat la iohsngew biang ia ka jingrwai iaroh ia U Trai.
Kane ka long kaei kaba U Trai u kwah ia ka temple jong u ba kan long ha kito ki por. Hynrei mynta pat U Blei um shong shuh ha kata ka temple ba la thaw da ki kti u briew, hynrei u shong ha kata ka temple ba la thaw da ka kti ka bymjukut kaba long ka kti U Blei hi, kaba kren ia nga bad ia phi. 1 Cor 6:19; Hato phim tip ba kata ka met jong phi ka long ka ïingshong U Mynsiem Bakhuid uba hapoh jong phi, ia uba phi la ioh na U Blei, bad ba phim long la ki jong hi? Hangne ngi iohi ka Bible ka iathuh shai ba ma ngi lane ka met jong ngi mynta ka long kata ka temple U Blei. Bad kaei kaba U Blei u khmih lynti ia ngi kum ka temple jong u ba ngin long, ka long kumjuh hi kumba u kwah ia kata ka temple jong u ha ki por mynbarim.
Kata ka long ba ngin long:
1) Kiba khuid bad kyntang - 1 Kor 3:16-17, Phi phim tip ba phi long ka iingshong U Blei, bad ba U Mynsiem U Blei u shong sah hapoh jong phi? Te lada uno uno ruh u pynjot ia kata ka ïingshong U Blei, ia uta kein U Blei un sa pynjot; namar kata ka ïingshong U Blei ka long kaba khuid, kaba long ma phi kein.
Ngi donkam ban ri khuid ialade, ym ban pyntngit, pynjaboh ia ka met jong ngi da kiei kiei ki jong ka pyrthei bad ka pop. 1 Pet 1:15-16, "...hynrei kumba uta uba la khot ia phi u long uba khuid, to long ma phi ruh kiba khuid ha ka jinglong jingim baroh; naba la thoh: To long phi kiba khuid namar ma nga nga long uba khuid."
2) Ka ïing jingduwai - Ngim dei ban klet ia ka jingduwai, ngi hap ban pynmlien ialade ban im ka jingim jong ka jingduwai. Salm 32:6, "Namar kane to ai ba uwei uwei baroh uba riewblei un duwai ha me ha ka ia ba lah ban shem ia me: shisha haba ki um bakhraw ki iashlei kin ym ioh kot sha u." 1 Thes 5:17, "To duwai khlem da pud"
3) Ka jingkyrkhu ia kiwei pat - Ai ba lyngba jong ngi ki briew kin mad ia ka jingkyrkhu jong U Trai, ka jingpynim, ka jingpynkhiah, ka jingpyllaitluid U Trai. U Blei u la kyrkhu ia u Abraham khnang ba un long ka jingkyrkhu sha kiwei pat, u la kyrkhu ia ngi ruh bad u kwah ba ma ngi ruh ngin long ka jingkyrkhu sha kiwei pat.
4) Ka jingim jong ngi kan dap da ka jingiaroh bad ka jingsngewnguh ia U Trai - Kumba U Trai u khmih lynti ba na katei ka temple kan mih ka jingiaroh bad jingainguh ia U Trai, kumta ruh U Blei u kwah bad khmih lynti na ngi. U Apostol Paul u kyntu ia ki bangeit ha Thessaloni u ong ba ha kaei kaei baroh to phin ainguh ia U Blei u ba U Kpa... - 1 Thes 5:18.
Nga duwai ba U Blei un iarap ia ngi ba ngi lah shisha ban im bad ban long kata ka temple kaba U Blei u kwah ia ngi ban long.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 7th January 2021
Comments
Post a Comment