Philippians 3:1-11
Haba ong 'Ka hok kaba da shisha' ka pyni ba don kiwei ruh ki hok, kaba u briew u leh ne pyrshang, hynrei kita ki hok kim long satia kiba shisha, (kumba long ki mar ki mata, don ki duplicate, don ruh ka original) u Paul u pyni ba kane keiñ ka long kata ka hok kaba shisha. Ngin sa ia peit kham sha khmat ban sngewthuh kham bha shaphang kane.
Hok, ka mut kata ka jinglong babha, ba beit ha khmat U Blei. Ka Bible ka iathuh ia ngi ba naduh ba u briew u la hap noh, u la duh noh ia kane ka hok, kata ka jinglong babha bad ba beit ha khmat U Blei.
Rom 3:23, "Baroh ki la leh pop bad ki la duh lehnohei ia ka burom jong U Blei" Ym don shuh uba hok, uba beit wat uwei ruh ong ka ktien U Blei. (Rom 3:10). Baroh kaba u briew u pyrshang da lade ban shu im hok, leh hok ki long tang kum ka jain ba bit tngit lane tang kum ka syrdep jot. (Isaiah 64:6). Kim long kiba shisha.
Ban pyniohpat ia kata ka hok kaba da shisha, dei tang U Jisu Khrist. Kumta uno uno baroh uba ngeit bad pdiang ia U Jisu un ioh pat ia kata ka hok kaba da shisha, ym shuh kata ka hok briew ba shu tynneng.
U Paul ruh kum uwei na ki riew niam ha ka niam Jiw u la ialeh shitom da la ka bor briew jong u ban ioh pat ia kata ka hok kaba da shisha, u la sumar ia ki hukum khlem jingrem, na ka bynta ka hukum u la pynshitom beiñ wat ia ki Khristan, (ki bym ngeit shuh ha ka hukum hynrei ha U Jisu Khrist). Hynrei hadien kita ki jingpyrshang jong u, kim poi shaei shaei ruh, U Blei u la ktah ia u ha ka lynti sha Damaskos (Kam 9:1-19), bad naduh kata ka por u la sdang ban sngewthuh ba kita ki jingpyrshang jong u kum u briew ban ioh pat ia kata ka hok kaba da shisha kim lah satia, bad hadien ba u la sngewthuh ia kane, u la sdang ban ialap ia ki para Jiw jong u ruh ba ki dei ban ngeit bad pdiang ia U Jisu ba kin ioh ia kata ka hok kaba da shisha. Kim dei shuh ban sngap ia ka jingong jong kita kiba sngewskhem ha ka hukum, hynrei ba kin kiar noh na ki, u ong ia ki ba ki dei ki 'ksew', dei tang ki ksew kiba ju jliah biang ia la ka jong ka prie, (2 Pet 2:22) bad dei tang kita kiba lah ioh ia ka jinglong ksew ki ban leit phai biang sha ka hukum ban ioh ia ka hok.
Shuh shuh u ong, to kiar noh na kita ki nongleh basniew, na kata kaba otsher. Ia ki briew kiba pynksan bad shaniah ia ka hok ha ka hukum, la khot ia ki ki nongleh basniew. Phin lyngngoh haba phi iohi ia kane. U Apostol Paul u da bitar ia kiba kum kine ki briew kiba pyrshang ban hikai ia ki bangeit ba kin phai biang sha ka hukum, sha kita ki niam ki rukum, bad ki jinghikai pateng la pateng, hynrei u ong ban ioh ia ka hok kaba da shisha, dei tang lyngba U Jisu Khrist.
Paralok baieit, to ngin nym pyrshang da ka buit stad briew jong ngi ban ioh ia ka hok, to ngin nym shu pyrshang ban leh bad pyndep ia ki niam ki rukom briew pateng la pateng ban ioh ia ka hok, hynrei to ngin ngeit bad pdiang noh ia U Jisu ha ka dohnud bad jingim jong ngi. Lada phi lah pdiang ia U Trai, to iaineh skhem ha U, wat ai ba kita ki ksew kumba ong U Paul kin pynphai pat iaphi ban leit jliah biang ia kata ka prie ba phi la dep prie. U Paul u ong shuh shuh ha ki Galatia, "ba lada nga tei pat ia kata kaba nga la pynjot, nga pyni ialade ba nga dei u nongpalat. Galatia 2:18.
U Khrist u la pyllaitluid ia ngi na ka jingtim ka hukum, kumta to ngin iaineh ha U Khrist haduh kaba kut ban ioh ia kata ka hok kaba da shisha. (Galatia 5:1).
U Blei un kyrkhu.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 09-03-2021
Comments
Post a Comment