Ka jingsdang kaba bha - Ka jingkut kaba sniew

Kane ka dei kaei kaba ngi hap ban pyrkhat jylliew bha, namar bunsien hi ka ju long ba kaei kaei baroh ha kaba dang sdang ka long kaba bha, kaba sngewtynnad, hynrei ynda la iaid la iaid ngi shu sngewmyllen noh bad lada ngim sumar bha, kane suki suki kan ialam sha ka ban kut ha kaba sniew ne bym sngewtynnad. Kane ka jia la ha ka jingiadei paralok, ka jingiadei shitnga, wat ha ka jingshakri Blei ruh.

Phi lah ban sngap ruh ha YouTube da kaba click hangne.

Ngi pule ha ka Bible ngi iohi ia kiba bun ki briew kiba don ka jingsdang kaba bha, hynrei ki kut ha kaba sniew. Kane ka long kaei kaei kaba sngewsih bad kaba U Trai ruh um sngewtynnad satia. 

Ha kane ka por nga kwah ban ia peit bad phi katto katne ki briew ha ka Bible kiba don ka jingsdang kaba bha hynrei ki kut ha kaba sniew. Da kaba peit ia kane kan iarap iangi ba ngin nang ban kiar na kaba kum kane ka lynti.

1. U SOLOMON: 

U don ka jingsdang kaba bha, u la ioh iaroh na U Blei ha kaba sdang jong ka jingsynshar jong u, u la tei ia ka temple kaba U Blei u sngewbha ban shong. U la wallam ia ka synduk ka jutang sha kata ka temple. (1 Syiem lynnong 6 & 8). Hynrei hadien bad ha kaba kut, u kut ha kaba sniew, da kaba u la mane bleithaw. (1 Syiem 11 lynnong).

Kaei kaba pynlong ia u Solomon ban kut ha kaba sniew? Kadei ka jingtlot jong u ha ka shongkha shongman. Ki kynthei nongwei ki la pynphai noh ia ka dohnud jong u sha ki bleithaw.

Kane ka long ka jinghikai bad ka jingmaham ruh ia ngi, kumno ba ngin nang ban husiar ha kane ka bynta. U Paul u ong ia u Timothy, "To men phet iap na ka jingkwah brai ka jinglong samla..." (2 Tim 2:22 ). Ym tang ki samla, hynrei wat ki rangbah ruh.

2. U SAUL: 

U don ka jingsdang kaba bha, ha kaba la jied ia u da U Blei ban long u syiem ba nyngkong duh ha Israel. (1 Samuel 9 lynnong). U long u briew uba bha, u la sdang da kaba bha, hynrei sngewsih ban ong ha ki sngi ba hadien jong u, u la kut ha kaba sniew, u la iap ka jingiap kaba jah burom.

Kaei kaba pynlong ia u syiem Saul ban kut ha kaba sniew? Kadei ka jingbymkohnguh. Haba U Blei u la phah ia u ban leit hiar thma ia ki Amalek, bad ban pyniap lut khoit bad briew bad mrad, khlem da pynsah uwei ruh. Hynrei haba u la leit ialeh thma, u la kem im ia u Agak, uba long u syiem jong ki Amalek bad ia ki jingri, ki langbrot ba sngaid. Kane ka la pynbitar ia U Blei bad kane ka la pynlong ba un kut noh ka jinglong syiem ha kaba sniew. (1 Samuel 15 lynnong).

Paralok baieit, to ngin sumar ialade, ioh ba kumno re kumno ka mynsiem jong ka jingbym-kohnguh kan rung ha ngi, sngew stad palat ban ia U Blei, ioh ba kan shu kut ha kaba sniew kumba long u Saul.

3. U JUDAS: 

U Judas u la sdang da kaba bha, u la long u synran ba U Trai Jisu u shaniah. Kumno nga lah ban ong ba U Trai u shaniah ia u, namar kat ban long u nongbat pisa ne u Treasurer lymda dei ba U Trai shaniah un nym ioh ban long treasurer. (Ioannis 13:29). Hynrei ngi iohi une ruh u kut ha kaba sniew, kaba la pynlong ia u ban phasi ialade haduh ban da pait arliang ki snier. (Mat 27:3-5; Kam 1:18). Kaei kaba pynlong ia u ban kut ha kaba kum kane kaba sniew? Dei namar ka jingieit sbai. Namar u sbai, u la die noh ia la u Kynrad uba la shaniah ha u. (Mat 26:14-16).

Paralok baieit, kiar na kaba ieit sbai, ka Bible ka ong, "U thied jong ki kynja basniew baroh long kaba ieit sbai" (1 Tim 6:10). Ka jingieit sbai, ka jingkwah spah jubor kane ruh ka long kawei na ki daw ka ban pynlong ia u briew ba un kut ha kaba sniew.

Ka ktien jong U Blei ka hikai ba ngin long kiba sngewhun ha kaei kaba ngi don, "Ka jingriewblei lem bad ka jingsngewhun ka long ka jingmyntoi bakhraw...". (1 Tim 6:6-8). Haba ong kumta kam mut pat ba ngim dei shuh ban kwah ban man bha man miat, hooid ngi kwah ia kata, hynrei ngim dei pat ban kwah jubor, da ka lynti ka bym dei. Lada ngi kwah jubor, kan ialam sha kaba sniew. (1 Tim 6:9).

4. U DEMAS: 

Une ruh u don ka jingsdang kaba bha, u la ju ia trei ryngkat ryngkat bad u Apostol Paul, la pynithuh (recommend) da u Paul ha ki bangeit ha Kolosai  (Kol 4:14). Hynrei une ruh u la kut ha kaba sniew. Kaei ka daw kaba pynlong ia u ba un kut ha kaba sniew? Ka dei ka jingieit pyrthei (2 Tim 4:10)

Ka jingieit pyrthei ka kren ha kiba bun rukom, bad lada kane ka jingieit pyrthei ka ioh jaka bad ka jop ia ka jingim jong ngi, kan pynlong ba ngin kut ha kaba sniew. Dei namarkata kadaw u Ioannis u thoh u ong, Phi wat ieit ia kane ka pyrthei. Ka pyrthei hangne ka kren ia kiba bun jaid ki jingkwah brai. 1 Ioannis 2:15-17

Paralok baieit, to ngin kiar na ka jingieit ia kiei kiei ki jong kane ka pyrthei.

Kine ki long katto katne ki daw kiba ngi la ia peit, kiba pynlong ia u briew ba un kut ha kaba sniew:

1) Ka jingiadei kynthei shynrang. - Syiem Solomon

2) Ka jingbymkohnguh ia U Blei. - Syiem Saul

3) Ka jingieit sbai, ieit tyngka. - Judas

4) Ka jingieit pyrthei. - Demas

Paralok baieit, to ngin long adkar ialade, ngin nym ai jaka ia u Soitan ban pynngop ia ngi ha ki jingriam jong u. U Paul u ong, Ngim long ki bym tip ia ki buit jong u. Ngi tip, ngi donkam ban long stad. (2 Kor 2:11).

Don kiba ong, oh u Soitan te uba stad, u riam da kumne da kumtai, hynrei nga ong ia phi em, ki buit jong u ki long kumjuh naduh mynshuwa, ym don kaba pher ne kaba thymmai ha ki buit treikam jong u, naduh ka por jong u Adam bad ka Im haduh mynta ki juh ki buit (process) u pyntrei kam, "Ka jingkwah brai ka doh, ka jingkwah brai ki khmat, ka jingsarong thala ka jingim. Baroh ki jingpynshoi u Soitan ki sdien lut ha kitei lai. Pule Jenesis 3 Lynnong & Mathaios 4 lynnong.

U Blei u kwah ban iohi ia ngi ba ngin iaineh ha kaei kaba bha kaba ngi la sdang haduh kaba kut. Ai ngin iohsngew ia ka sur kaba un ong iangi, "BHA ME U SHAKRI BA BHA" (Mat 25:19-23).

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | 9-03-2021 | 7pm