Ha ka step 18 tarik March, 2021 katba ngi dang don ha Nohron (ba ngi don jingiaseng ialap) bad shuwa ban pynlong jingduwai step, I Evg Pynsuklang Khongsdir I la pule na ka Proberb 10 lynnong bad katba nga dang sngap ia kata ka ktien U Blei kaba I pule, U Trai u la pynphalang ia ka jingmut jong nga ia ka jingiapher hapdeng u khun uba stad bad u khun uba bieit. Bad kane ka la pynkhih ia nga ban thoh ia kane ka article bad lyngba kane nga kwah ban ring jingmut ha kaba iadei hapdeng jong ngi bad U Blei.
Ka Bible ka iathuh ia ngi ba naduh ba ngi la pdiang ia U Jisu ngi lah long ki khun jong U Blei. Ioannis 1:12
To ngin ia peit kham bniah halor kane ka bynta.
1. U KHUN UBA STAD U PYNLONG U KPA UBA KMEN (Proberb 10:1a):
Kumba long (literally) u Khun uba stad barobor u wanrah jingkmen ia la u kpa, ka kmie, bad ia ka ïing ka sem. Khamtam lei haba u leh ia kiei kiei kiba bha bad kiba dei, ka da pynkmen haduh katta katta ia la ki kmie ki kpa. U Blei uba long U Kpa jong ngi uba ha bneng u khmih lynti ia ngi ruh ba ngin long kiba stad, ki ban wanrah jingkmen ia U barobor. Proberb 15:20a; Proberb 27:11a
Hynrei u khun uba bieit u long ka jingkhia ia la ka kmie lane u kpa. U wanrah ka jingsngewsih. (Proberb 10:1b). Phin iohi ia kane haba ki khun ki leh ia kano kano kaba sniew ne ka bymdei, ki tuh ki thiem, shah khot hajir sa ha ka shnong ka thaw, ka da pynsngewsih haduh katta katta ia ki kmie ki kpa. U Blei ruh u sngewsih lada ngi kum ki khun jong U ngi leh ia kaba sniew, ngi leh ia ka bymdei.
2. U KHUN UBA STAD U WANRAH BUROM IA LA U KPA:
U Khun uba stad ym tang ba u wanrah jingkmen, hynrei u wanrah burom ruh ia u kpa, ka kmie bad ia ka ïing ka sem baroh kawei. Kumta ruh kum ki khun jong U Blei to ngin long kiba stad ki ban wanrah burom ia U Kpa jong ngi uba ha bneng. Ai ngin leh ia kiei kiei ki ban pyndonburom ia U. U Paul u kyntu ia ki bangeit ha Korinth, to phin leh ia kiei kiei ki ban pyndonburom ia U Blei. 1 Kor 10:31
Hynrei u Khun uba bieit u long ka jinglehraiñ ia la u kpa bad ka kmie. Proberb 19:26. Ka jingleh ia kiei kiei ki bym dei, ki pynlehrain, pynjahburom ia u Kpa.
3. U KHUN UBA STAD U LONG KA JINGKYRKHU IA LA U KPA:
Kawei shuh shuh ngin shem ba u khun uba stad barobor u long ka jingkyrkhu ia ka ïing ka sem. U long ka jingmyntoi ia u Kpa bad ka kmie, u kloi ban iarap bad ia trei lang bad la u kpa ha ki liang baroh, ban pynroi ia ka business, ka rep ka riang bad kumta ter ter. U Blei u kwah ia ngi ruh kum ki khun jong U ba ngin long ka jingkyrkhu ha ka hima jong U, ban ia trei ryngkat ban pyniar ia ka hima jong U.
Hynrei u khun uba bieit u long ka jingkhia ia la ka kmie ne u kpa, ia la ka ïing ka sem. Proberb. U Blei um kwah ba ngi ngin long ka jingkhia ia U, ngin long ka jingkhia ia ka Balang, hynrei ba ngin long ka jingkyrkhu.
Ka jingkylli ka long, Kaei kaba pynlong ia u Khun uba stad?
U Khun ba un long uba stad ka donkam ba un long uba shahshkor biang biang ia ka jinghikai u kpa jong u. (Proberb 1:8). Kumjuh ruh ba ngin long ki khun kiba stad ngi donkam ban shahshkor biang biang ia ka jinghikai jong u kpa jong ngi uba ha bneng kaba u hikai ia ngi lyngba ka ktien jong U. Ka jingbym sngap ne shahshkor ia ka jinghikai ka ktien U Blei ka pynlong ia ngi ki khun kiba bieit.
EVALUATION:
- Hato ka jingim bad jingleh jong nga ka wanrah jingkmen ne em ia U Blei uba U Kpa jong nga uba ha bneng? Ne nga long pynban ka jingsngewsih ia U Blei uba U Kpa?
- Hato ka jingim bad jingleh jong nga ka wanrah burom ne em ia U Blei uba U Kpa jong nga uba ha bneng? Ne nga pynjahburom pynban ia U Blei uba U Kpa?
- Hato ka jingim bad jingleh jong nga ka long ka jingkyrkhu ne em ia U Blei uba U Kpa jong nga uba ha bneng? Ne ngi long pynban ka jingkhia ia U Blei uba U Kpa?
Lada ka long kumta, Ngi hap ban kylla bamut, ban duwai ba U Blei uba U Kpa jong ngi un isynei ban map bad ban pynlong ia ngi ki khun kiba stad.
JINGDUWAI:
Trai, ai ngan long u Khun uba stad, ba nga lah ban wanrah jingkmen ia Me. Ai ngan long u Khun uba stad ba nga lah ban wanrah burom ia Me bad ai ngan long u Khun uba stad ba nga lah ban long ka jingkyrkhu ia Me. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 21-03-2021
Comments
Post a Comment