Kane ka long ka bynta ba ngi hap ban puson. Kumno ngi iohi ia ka jingeh haba ka wan pyrshah ia ngi. Namar ka jingiohi ka lah ban wanrah wat ia ka jingjop ne jingrem. Lada ngi iohi ba kata ka jingeh ka long ka bakhraw, kumta kata ka jingeh kan ñion ia ngi haduh ba ngin nym lah shuh ban khie khlieh. Hynrei lada ka jingiohi jong ngi ia kata ka jingeh kaba wan pyrshah ia ngi ba ka long kaba rit, kumta ruh ngin jop pyrshah ia ka. Lada ngi iohi ba kata ka jingeh ka long kaba khraw, kan pynlong ia ngi ba ngi hap ban buhrieh ia lade, ngin nym nud ban ialeh pyrshah, hynrei lada ngi iohi ba ka long kaba rit, ngi nud ban ialeh pyrshah.
Ngin ia peit katto katne ki rukom iohi jong ki briew.
Nuksa 1. Ka jingiohi ki khun Israel ia u Goliath: Ki khun Israel haba u Goliath u la wan bad kob pyrshah ia ki, bad haba ki peit ia u ki iohi ba u long uba jrong bad u radbah (giant) uba ima haduh katta katta, haduh ba ki la khynñiuh ha khmat jong u. Ka Bible ka ong ba 'ki la khaweit bad ki la sheptieng' (1 SAMUEL 17:1-11). Kata ka dei ka jingiohi jong ki khun Israel. Hynrei u David haba u peit ia u Goliath u iohi ba um long eh uta uba radbah, ba ima haduh katta katta, u iohi ba u long tang kum u kynja mrad aiu re, um shym la khih khuslai eiei, u pyrkhat, ban ialeh pyrshah ia utei te tang da u maw rit ba khar na wah, (kumba khar maw siat sim) ruh lah biang. Kumta haba u leit shisha da kata ka jingiohi, u la jop ia u Goliath tang da uta u mawrit bad ka jingshatmaw (sling). U Syiem Saul bad ki shipai Israel ki pyrkhat ban ialeh ia u Goliath te la donkam da ki atiar thma ba kynsai, namar ba ki iohi ia u Goliath kum uta u radbah. Hynrei u David um da i ba donkam ban da phong kita ki jingphong nar, ban da donkam kita ki wait, ki sum, kumta wat haba la ai ia u kita ki jingphong nar, um treh ban phong, um da donkam. (1 SAMUEL 17:38-54)
Nuksa 2. Ka jingiohi jong u Jairos bad ki briew jong u ia ka jingpang: U Jairos bad ki briew jong u haba ki iohi ba ka khun jong u ka pang, kumta ki la sheptieng eh, ki la ia iam ia lynniar namar ki iohi ia kata ka jingpang ba ka long kaba khraw bad kaba sniew. Hynrei U Jisu u iohi ba kata ka jingpang, (jingeh) kam long eiei ruh em, ka long kaba rit eh ha khmat jong u. Kumta u ong ia ki, "Wat sheptieng TANG SHU NGEIT", ka ba mut ba kam dei kaba khraw, phim da donkam ban da jynjar jingmut (tension), namar ka long kaba rit eh, TANG SHU NGEIT ka lah khiah. Kumta haba u Jairos u la ngeit bad u la sdang ban iohi ia ka jingkhraw jong U Trai bad ba kata ka jingpang kam long eiei, ka khun jong u ka la khiah. (MARKOS 5:21-24,35-42).
Nuksa 3. Ka jingiohi ki synran ia ka eriong: Haba ka eriong ka la khie pyrshah ia ki, ki la sheptieng, ki peit ia ka eriong ki i ba ka long kaba ma haduh katta katta, ki la lynniar bad ki la ia ong ia U Trai Jisu 'balei mem suidñiew ia ngi', ngin sa iap, namar ki iohi ia kata ka eriong kum kaba kynsha haduh katta katta. Hynrei U Jisu u iohi ia kata ka eriong tang kum ka 'erpyngngad, kumta u iohthiah suk kynjai ha tdong jong kata ka juh ka lieng ba ki synran ki shong. (MARKOS 4:35-41)
Hangne ngi iohi ia ka jingiapher jong ka jingiohi, ka juh ka jingjia ne jingeh ka wan bad ki ia kynduh, don kiba iohi ba kata ka jingeh ka long kaba khraw haduh katta katta, bad ki la khynñiuh bad sheptieng, hynrei don pat kiba iohi ba kata ka jingeh kam long eiei ruh em, kim khynñiuh, kim sheptieng eiei ruh em.
Lehse ngi lah ban pyrkhat, kumno kata ka lah ban long? Uei u bym tieng haba ka 'eriong, ka jingpang, ka jingiap bad ka jingeh ka wan. Hooid ha ka jinglong briew hi, ym lah khlem da sheptieng, ym da khynñiuh haba kiei kiei kiba sniew ki wan jia. Hynrei kaei ba ngi donkam ban tip ka long ba U Trai jong ngi u kham khraw ban ia kata ka jingeh kaba wan pyrshah ia ngi.
"Ha ka khyllipmat ba ngi iohi ia ka jingkhraw jong ka jingeh, ngi klet noh ia ka jingkhraw jong U Blei. Ha ka khyllipmat ba ngi iohi ia ka jingkhraw jong U Blei, ngi klet noh ia ka jingkhraw jong ka jingeh"
Lada ngan phla iaphi, nga dei u briew uba la mad shibun ki jingeh, ki jingpang bad ki eriong bapher bapher ha ka jingim, nga la shah ñion la biang, hynrei hadien nga sngewthuh lada ngan shu pynjem, bad ngan shu peit bad pyrkhat sah ba kata ka jingeh ka long kaba khraw, ngan sa iap, ngan sa tlot, ngan sa swai, kumta nga la sdang ban peit bad ban iohi ia ka jingkhraw jong U Blei, kumta suki suki nga la jop ia kata ka jingsheptieng.
Paralok baieit, to ngin ioh ia kata ka jingiohi kumba u David u iohi ia u Goliath, ym kumba ki khun Israel ki iohi. To ngin iohi ba kata ka jingpang kam long eiei ruh em, ka long tang i ei i ei iba rit eh kumba U Jisu u iohi. To ngin iohi ba kata ka eriong kaba wan pyrshah ia ngi ka long tang kum ka erpyngngad, kumba U Trai u iohi, ym kumba ki synran ki iohi. Namar u kham khraw uta uba don hapoh jong ngi, ban ia uta u ba don ha ka pyrthei. 1 ÏOANNIS 4:4
Tip ba U Trai u long halor ki jingeh, ki jingpang bad ki eriong baroh.
U Blei un kyrkhu iaphi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
* Credit to Mr. Plielad Khongwir for the illustration photo. Used with permission.
© Jester Mawlong | 7-03-2021
Comments
Post a Comment