Phi long ka jingshai ka pyrthei

Mathaios 5:14, "Phi phi long ka jingshai ka pyrthei..." 

U Jisu u ong ia ki synran, "Phi phi long ka jingshai ka pyrthei". Ngi iohi hangne um ong satia ba phi phin sa long, hynrei u ong 'phi phi long', kaba pyni ba ki lah dep long ka jingshai jong ka pyrthei. 

Kane ka kren ruh ia ngi. Naduh ba ngi la pdiang ia U Trai Jisu Khrist ngi lah long ka jingshai ka pyrthei. Ngim dei ban dang ong, "Trai pynlong ia nga ka jingshai ka pyrthei" hynrei ngi lah dep long. Ha ka khyllipmat ba ngi ngeit bad pdiang ia U Trai ha ka dohnud jong ngi, ngi lah long ka jingshai. Ioannis 8:12; Eph 5:8.

Kaei kaba donkam ka long tang ban shu pynshai ia kata ka jingshai kaba ngi don hapoh jong ngi sha ka pyrthei lane sha kiwei pat.

Ha ka dkhot ba 16 Mathaios 5 lynnong, U Jisu u ong, namar ba phi lah long ka jingshai, "To pynshai kumta ia ka jingshai jong phi..."

1. Kumno ngin pynshai ia ka pyrthei?

Haba ia kren shaphang kane bunsien ngi ju pyrkhat ban pynshai ia ka pyrthei lane ban long jingshai ngi dei ban im khuid ialade shimet, bad kumta ter ter, hooid ka jingim ba khuid ba kyntang ka long kaba donkam, hynrei kaei ba U Jisu u ong hangne kam mut tang shaphang kata ka jingim khuid jingim kyntang (watla kane ka long kaba dei eh) hynrei u mut da kumwei. Ka jingmut ka long ba ngi dei ban pynpaw ia kaei ba don hapoh jong ngi sha ka pyrthei. Ba ngin iathuh sha ka pyrthei ia kaei kaba u la leh. Kata ka dei ka jingmut.

U Jisu u iohi ba ka pyrthei ka don hapdeng jong ka jingdum kaba khraw. Dei namarkata u ong,  "Phi, phi long ka jingshai ka pyrthei", ba dei sa tang ma phi ki ban pynshai ia kane ka pyrthei kaba don hapdeng ka jingdum. Ka jingkitkhlieh ka dei haphi ban pynshai ia ka pyrthei. Ym don da kiwei pat.

Kumta katba ngim pat pynpaw ia kaei kaba don hapoh jong ngi, ngim pat long kata ka jingshai bashisha, ngi dang buhrieh hapoh ka shang. Donkam ban pynshai ba kiwei kin ioh jingkyrkhu.

Ngim dei ban buhrieh bad shu set hapoh ia kaei ba ngi don. U shakri ba la ioh ia kawei ka talent u la buhrieh bad tep ha khyndew, bad kane ka la pynbitar ia u Kynrad jong u. Mat 25:24-30

U Bulb light uba khlain power katno katno ruh lada um leh eiei, lada ym shym la pyndonkam, kam don jingmut ne jingmyntoi eiei, yn ym tip haduh katno ka bor jong u, bad kaei ba don hapoh. Kumjuh ruh ma ngi lada ngim leh eiei ba kiwei kin iohi, ne ioh jingkyrkhu, kan long kaba lehnohei (useless). Kam pat biang tang ban ri khuid sumar khuid tang ialade, hynrei ngi hap ban pynshai, ban leh eiei na ka bynta U Trai ba ki briew kin iohi bad ba kin iaroh ruh ia U Kpa jong ngi uba ha bneng.

JINGKYNTU: To ngin nym shim burom ha lade haba ngi pynshai ia ka jingshai jong ngi ha khmat ki briew (Haba ngi leh eiei na ka bynta U Trai), ai ba kata kaba ngi leh ki briew kin iohi, bad kin iaroh ia u Kpa jong ngi uba ha bneng, ym ba kin iohi ia kata kaba ngi leh bad ba kin iaroh ia ngi, ym ba ngin shim burom sha lade, hynrei ia u Kpa, kin ai ka burom sha u Kpa (U Blei). Mat 5:16

U nongrwai Salm u ong, "Ym ha ngi, Ah Trai, ym ha ngi, hynrei ha la ka jong ka kyrteng to ai burom..." - Psalms 115:1 

U Blei u ong, "Ngan nym ai ka burom hano hano ha uwei pat..." - Isaiah 42:8

U Jisu u maham ba ngi dei ban kiar na u thiat ki Pharisi (uwei na kita udei u thiat jong ka jingkwah burom). Ki Pharisi kaei kaba ki leh, ki leh ba kin ioh jingiaroh na ki briew. Lada ki duwai, ki shahjingit, ki ai bad kumta ter ter, ki leh ba ki briew kin iohi bad ba kin iaroh ia ki. U Trai um kwah ba ngin long kumta, hynrei ai kin iohi bad ioh iaroh ia U Kpa jong ngi uba ha bneng. 

2  Ka bor bad ka jingthmu jong ka jingshai.

1) Ka jingshai ka tyngshain wat ha kaba dum: Wat la ngi im ha kane ka pyrthei kaba dum, ngim dei ban shah taplup noh ha ka jingdum. U Paul u ong, Wat ai ba yn jop noh ia me da kaba sniew (kaba dum), hynrei to jop noh ma me da kaba bha ia kaba sniew. Rom 12:21

Ai ba yn iai iohi ia ngi kum kita ki jingshai ka pyrthei. Phil 2:13-15

2) Ka jingshai ka long ka nongpyni lynti ia ki nongleit jingleit: Ki briew ha ka pyrthei ki long kum ki nongleit jingleit, hynrei kiba bun ki sakma, ki jah bad kim shem lynti shano ban leit, namar ka jingdum jong kane ka pyrthei. Donkam ia ngi kiba long kata 'Ka jingshai ka pyrthei' ban pynshai bad ialam lynti ia ki. Ai ba kin tip ba U Jisu u long kata ka lynti, ka jingshisha bad ka jingim de. Ioannis 14:6

U Blei un kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | 17-03-2021