Hato phi lah ju kiew na tnum ïing?

Mynta ka sngi, 15th March, 2021 por 4pm eiei hadien ka jingialap ha Iew Mairang, U Trai u la ai ha nga ia kane ka khubor kaba ong, "Hato phi lah ju kiew na tnum ïing?'. Kumta ynda nga poi ha kali ban ia leit phai noh sha Shillong, nga la sdang ban thoh ia kane ka khubor (hapoh kali). 

Kane ka long ka jingkylli ba ngi hap ban kylli ialade, Hato nga lah ju kiew ne em na tnum ïing? Lada phi shem ba phim pat ju kiew, sdang noh ban kiew. Wat nym sngewhun ban shu shong sah hapoh khyndew. U Trai Jisu um sngewtynnad ia kiba shong sah hapoh khyndew. La khot ia ngi ban kiew na tnum ïing. 

Lehse phi lah ban kylli ka mut aiu kane? Kane ka dei kaba U Jisu u kren bad ka jingmut jong kane ka long, "Phi la ju ialap ne em ia ka gospel. Phi la ju iathuh lem ne em sha kiwei pat ia kaei kaba U Jisu u la leh ha ka jingim jong phi?"

Mat 10:27, "Ia kaba nga ong ha phi ha kaba dum, to iathuh ha kaba shai : bad ia kaba phi iohsngew da ka shkor, to phin ialap nalor ïing (rooftop)."  

Lada phi la mad ia ka jingpynim jong U Trai hynrei phim pat ju iathuh lem sha kiwei pat, phim pat ju ialap, ka pyni ba phi dang don kaei kaei kaba duna, phim pat shym la kohnguh ia ka jingphah U Trai.

Ka Nong Samaria haba ka la iashem bad U Trai Jisu, bad ka la iohsngew ia kaei ba U Trai Jisu u ong ia ka, ka la mareh sha ka shnong jong ka ban iathuh sha ki briew jong kata ka shnong shaphang U Jisu. Ioannis 4:28-30, 39-42. Ki Nong Samaria kin nym ioh jingpynim lada kane ka kynthei kam shym la leit ban iathuh ia ki.

Para bangeit baieit, dang bun ki mynsiem bakordor kiba dang donkam ban iohsngew ia ka Khubor babha jong U Trai, kiba dang ap ia phi ba phin kiew na tnum ïing ban pynbna ia ka gospel U Jisu Khrist. Lada phi phim kiew na tnum ïing ban ialap (lada phi phim ialap) kin sa jot ei baroh sha dujok, kiew kloi mynta na tnum ïing ban ialap ia ki.

Uba pang iap shiliang un sa iap, lada ki 4 ngut kim kiew na tnum ïing ban pynpoi ia u sha U Jisu.  Loukas 5:18-19, 20; "Ha khmih ruh, ki iabah ha ka palong ia u briew uba pang iapshihang: te ki la iawad lad ban wallam ia u hapoh, bad ban buh ia u ha khmat jong u. Te haba kim shem lad shuh naei naei ruh ba kin wallam ia u hapoh, namar uta u paitbah, ki la leit kiew halor (tnum) kata ka ïing, bad ki la pynhiar noh ia u lyngba ka jingsop lem bad la ka jingthiah, hapdeng kein ha khmat U Jisu. Haba u la iohi te ia ka jingngeit jong ki, u la ong ha u, Ko briew, la map noh ia me ia ki pop jong me." (cf. Mark 2:1-5)

To ngin ioh ia ka dohnud jong kine ki 4 ngut, ka dohnud jong ka jingieit bad jingsngewsynei ia kiba jot barem, bapang bashitom. Ngin ialeh shitom ban pynpoi ia ki sha U Jisu.

Hooid ban kiew ia ka tnum kam long kaba suk, shibun ki jingeh jingpynwit ngin ia kynduh. Hynrei ynda ngi la poi ha tnum  ngin shem kan don ka jingpyngngad bad ka jingsngewtynnad.

Nga kynmaw mynba nga dang don sha shnong, ha ka por ba ngi ia shna ïing bad ynda la dei ka por ban tap ia ka tnum ngi kiew ha jrong tnum bad haba ngi don ha jrong tnum, ngi sngew ia ka jingbeh ka lyer pyngngad, wat haba shit ka sngi ruh.

Ban ialap, ban phla ia U Jisu, ha kaba nyngkong shibun ki jingsngew, ki jinglehrain kin wan. Nga lah mad ia kane ha ka por ba ngi ialap nyngkong ha Motphran, Shillong, katno ka jingsngew lehraiñ, bad ki jingsngew briew laiphew jaid, ban ang ruh ym sngew lah, hynrei ha ka khyllipmat ba ngi jop ia kata ka jingsngew, ka wan ka jingsuk, ka jingkmen, ka jingpynpyngngad bad ka jingkyrkhu. Nga mad ia kane, katba nga dang ialap ia kiwei, ialade ruh nga nang sngew im. Dei kane ba u Apostol Paul u ong ia u Timothy, haba me ialap ia kiwei - ialade ruh men im. (1 Tim 4:16)

Para bangeit, khamtam ki samla, wat nym kiew na tnum ïing ban pyni ialade sha ka pyrthei uwei phi long. Wat nym kiew na tnum ïing ban pyni sha ka pyrthei ia kaei ba phi don, ka spah ka phew, jingnang jingstad ka dur ka dar, hynrei kiew na tnum ïing ban pynbna ia U Jisu Khrist ba U long U Trai bad U Nongpynim ka pyrthei.

Wat nym kiew na tnum jong ka social media ban pyni sha ka pyrthei tang shaphang ialade, hynrei kiew na tnum jong ka social media ban pynbna ia U Jisu Khrist.  "AI KA PYRTHEI KAN TIP IA U JISU"

Kane ka dei ka jingkhot jong U Trai Jisu ia nga bad ia phi kum ki bangeit. Pynlong ia ka jingkut jingmut ba naduh mynta phin sdang ban kiew noh na tnum ïing, bad na kat kaba ioh lad ioh jaka ban pynbna ia U Trai Jisu Khrist sha ka pyrthei.

U Blei un kyrkhu iaphi. Amen

© Jester Mawlong | 15-03-2021 | 5:30pm