Ka jingim ba khan adkar

Titos 2:6 "Kumjuh ia ki rangbah bakham samla to sneng ban long kiba khan adkar."

U Apostol Paul u kyntu ia u Titos ba udei ban sneng bad kyntu ia ki bangeit, kham tam ia ki samla ba kin long kiba 'khan adkar'. Ka kyntien 'khan adkar' ka mut ban im da sumar, bad ban don ka bor halor lade. Uwei na u soh jong U Mynsiem ba U Blei u ai ha ki bangeit u long 'ka bor halor lade' (self control), U la ai khnang ban iarap ia ki bangeit ba ki lah ban im ka jingim ba khan adkar.( Gal 5:22).

Balei ba ngi hap ban long kiba khan adkar? Naba u Soitan kum u sing ba kyrhuh, u iaid kylleng u da wad khnang ia uno uno ruh ban ioh nguid tylli. (1 Pet 5:8-9).

Tang da lade hi ngin nym lah satia ban im kata ka jingim ba khan adkar, ngi donkam ia ka bor jong U Mynsiem Bakhuid.

Ngin ia peit shuh shuh, kumno ngin im ka jingim ba khan adkar.

1. HA KA RUKOM BAM RUKOM DIH:

Kawei na ki jingpynshoi u Soitan ia ki samla, wat ia ki rangbah kumjuh ka long ha ka bam ka dih. Ngi iohi ia ka jingjot jong ki samla ha kine ki sngi ha kaba iadei bad ka bam ka dih, ka jingngop jong ki samla ha ka kyiad, u drugs bad kiwei kiwei ki jingdih basniew. Ngi donkam ban long kiba khan adkar bad kiba don ka bor halor lade ban ong em ia kaba sniew. U Daniel u la long ka nuksa ba khraw ha kaba iadei bad ka rukom bam rukom dih. (Daniel 1:8), u la kyntait ban bam bad ban dih ia kita ki jingbam syiem ki bym iadei bad ka rukom im jong u kum u briew ba ngeit ia U Blei ba im. Ngi donkam ka bor halor lade ban kyntait ia kita ki jingbam ne jingdih ki bym ia hap bad ka rukom im jong ngi kum ki samla Khristan bad ki bangeit.

Ka Bible ka ong na ka shithi sha ki nong Rom 12:2, "Wat pynsyriem ialade bad kane ka pyrthei, hynrei to pynkylla dur noh ialade..."

2. HA KA JINGIADEI KYNTHEI SHYNRANG:

Kaba ar kaba ngi hap ban long kiba khan adkar ka long ha ka jingiadei kynthei shynrang. U Soitan u trei tyngeh ban pynjot ia ki samla ha kine ki sngi, ha kaba iadei bad ka shongkha shongman. Ngi donkam ban long kiba adkar ha kane ruh ka bynta. Ngi donkam ka bor halor lade ban ong em ia ka pop. To ngin ioh ia ka nuksa na ka jingim jong u Joseph, ngi iohi ia u Joseph kumno u la nang ban im ka jingim ba khan adkar ha kaba iadei bad kane ka bynta. Haba ka tnga jong u Kynrad jong u, u Potiphar ka la pynbor ia u ban thiah bad ka, hynrei u la kyntait war, um treh satia. U don ka bor halor lade, um shym la pynkohnguh ha ka jingkwah brai ka doh. (Jenesis 39:6-8). U la phet iap na ka.

U Paul u kyntu ia u Timothy ba un phet iap na ka jingkwah brai jong ka jinglong samla. (2 Tim 2:22. Hooid ka shongkha shongman ka dei kaba la buh da U Blei, hynrei kam dei pat ban long pathar, hap ban leh ia kata ha ka lynti jong U Blei, ban pyndonburom ia U Blei.

Heb 13:4 "To ka ïingshong kurim kan long kaba don burom...naba ia kiba awria bad kiba klim U Blei un bishar"

Ngim lah ban ialeh kai ha kaba iadei bad ka shongkha shongman, ka jingiadei kynthei shynrang. Hap ban long adkar. (Pro 6:27-29).

3. HA KA JINGIADEI PARALOK:

Kaba lai kaba ngi dei ban long adkar, kadei ha ka jingiadei paralok. U briew um lah ban im marwei, u donkam ki paralok. Ekle 4:9-10, ka ong, 'Lah kaba arngut ban ia kaba wei briew...', hynrei ngi hap ban nang pat ban jied ia ki paralok, (la ka dei kynthei para kynthei, ne shynrang para shynrang). Bunsien ka jingbym long adkar ha kane ka bynta, bun kiba shah ialam bakla noh, teng teng poi sha kaba sniew bad ka jingjot jong ka jingim. U Paul u ong sha ki nong Korinth, 'ka jingialong lok bad ki lok ba sniew, ka pynpyut plak ia ka akor babha...' (1 Kor 15:33). Wat iaid bad ki bymman ong u Nongrwai Salm. (Salm 1:1-3). Lada phi iaid bad ki briew ba bymman, phin sa kylla bymman.

KA JINGKYNTU: To ngin long kiba khan adkar, kham tam ngi im ha ki sngi ba khadduh ha kaba u Soitan ruh u trei tyngeh ban pynjot, ban pynhap noh ia kiba bun ki samla na ka jingngeit. Ngi hap ban long kiba stad ong u Paul. (Ephesos 5:15-18). Ngi hap ruh ban im ka jingim ka ban long nuksa babha ia kiwei. (1 Tim 4:12; Titos 2:7).

U Blei un kyrkhu iaphi ki para samla bad ki bangeit baroh. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.