U Trai Jisu u kren ia kine ki ktien ban ong, "To sumar kumno phi sngew". Loukas 4:24. Balei U Jisu u ong ba ngi dei ban sumar kumno ngi sngew? Namar ka jingiohsngew ka don ka bor kaba lah ban ktah ia ka jingmut jingpyrkhat jong u briew, ka ktah ia ka jingsngew (emotion), ka ktah wat ia ka mynsiem. Ka lah ruh ban wanrah wat ia ka jingiap lane ka jingim.
Ngi ju shem ia kane, haba ngi ia kynduh ia ki briew bad mar sien ia kynduh khak kin ong 'balei phi i raikhoh, ne thongiong katne katne, hangto hangto hi ngin da sngewraikhoh, sngewthangiong shisha, bad lada phin ia kynduh pat iano iano ki ban ong, 'de mynta te phi lah kham sngaid, kham bhabriew', hangta hangta hi ngin da sngew kumba lah sngaid, sngew bhabriew shisha. Bad lada ki briew kin iathuh khana sheptieng, hangta hangta hi ngin sheptieng.
To ngin ia peit na ka Bible kumno ba kane ka jingiohsngew ka ktah ia ki briew, la kadei sha kaba bha ne basniew. Bad da kaba iohi ia kane kan iarap iangi kumno ba ngin nang ban sumar ia kaei kaba ngi iohsngew.
1. Ka Jingiohsngew kaba wanrah ia ka jingsheptieng.
Ki Khun Israel haba ki la iohsngew ia ka jingkren kob, sarong jong U Goliath baroh baroh ki la sheptieng bad ki la shu rieh ialade. Ki la ia khynñiuh naduh khlieh haduh kjat. Kata ka jingiohsngew kaba ki la iohsngew ka la pynsheptieng ia ki. (1 Sam 17:1-54).
Ngi iohi ruh ia ka nuksa haba wan u Coronavirus (Covid-19), haba ki briew ki la shu iathuhkhana beit tang shaphang ka jingma jong uta u khlam Coronavirus, sngap kawei ka khubor ruh Virus, pule kawei ka khubor ruh Virus, bad kane ka jingiohsngew ka la pynsheptieng ia ki briew baroh, rung ha ATM ruh sngew kum ban dait uta u Corona, thied jingthied ruh sngew kum ban dait u Corona, katba leh sngew kum ban dait Corona lut, tang shu leh eiei, ktah eiei hap sait kti wut wut, ioh ba bit Corona. Nga ngeit phi mad ia kane. Balei ka long kumne, namar ka jingiohsngew palat ia ki khubor ba pynsheptieng.
Hangne ngi sngewthuh ba ngi donkam ban da sumar kumno ngi sngew. Bad haba ngi iohsngew ngi dei ban nang ban pdiang ia kaba dei bad ban kyntait ia ka bymdei. U David haba u la iohsngew ia ka sur Goliath um shym la sheptieng, u la nang ban kyntait, hynrei ki khun Israel kim shym la long kumta.
2. Ka jingiohsngew kaba wanrah ia ka jingduh jingkyrmen.
Nuksa 1: U Bartimaios ba matlah haba u iohsngew ba U Jisu u wan shajan jong u, u la sngew ioh mynsiem shikatdei eh. Kumta u la pyrta da ka ktien bajam ban ong, "Ko Jisu u khun jong u David to isynei ia nga...". Hynrei ha kaba kum kata ka por u iohsngew ruh ia ka sur ba pynnoh mynsiem, pynduh jingkyrmen ia u, ha kaba ki briew ki la ong ia u ba un sngap jar. Hynrei u Bartimaios u la nang kham pynjam pynban, u la nang ban kyntait ia ka jingsngew ka bym dei, u la pdiang ia ka sur kaba dei ba U Trai Jisu u khot ia u bad kumta ngi iohi ba u la mad ia ka jingkyrkhu jong U Trai, ha kaba u la ioh khiah na kata ka jingmatlah jong u. (Markos 10:46-52).
Nuksa 2: U David haba u la iohsngew ia ka jingkren beiñ jong uta u Philistia u Goliath, u la mih sha khmat ban pynpaw ha ki shipai Israel bad ha u syiem Saul ba u kwah ban leit ialeh pyrshah ia u Goliath, pynban u la iohsngew ia ka jingkren pynnoh mynsiem, pynduh jingkyrmen na la ki jong ki hynmen bad wat na u syiem Saul ruh. Hynrei u la kyntait war ia kata, um shym la pynsngap ne pynshahskhor satia. U la pyneh bad u la mih sha khmat bad ngi iohi kumno u la jop pyrshah ia uta u radbah Philistia, u Goliath. (1 Sam 17:28; 32-33).
3. Ka jingiohsngew kaba wanrah ia ka jingklumar.
Ngin phai biang sha kaba lah dep, kaba la jia ha u snem 2020, ha ka por ba wan U Coronavirus (COVID-19). Haba ki briew ki la iohsngew ba u la wan ha Shillong, baroh baroh lah ia klumar lut, naduh ki heh ki haiñ, haduh u rit u ria. Ka jingklumar kaba shyrkhei, haduh ba ki police ruh ki lah ia klumar lang, tang shu mih surok ki briew (namar ba lah lockdown), bom tied beit khlem isynei shuh. Ka jingklumar kat shaba phai, haduh ba wat ki Nongialam Balang ruh bun ki lah ia klumar, pynlong jingiaseng ruh ym long, lada ym pynlong ruh ym long. "Ieng kynduh, shong ruh jhieh". Katto katne eh kiba nang ban kyntait ia kaei kaba ki iohsngew ki lait na kane ka jingklumar.
4. Ka jingiohsngew kaba wanrah ia ka jingngeit bad ka jingkyrmen.
Ka don ruh ka jingiohsngew kaba wanrah ia ka jingngeit bad ka jingkyrmen. Kane barobor ka dei ka sur kaba wan na U Trai.
Kumno ngin iohsngew ia kata ka sur kaba wanrah ia ka jingngeit bad jingkyrmen? Ka long na ka ktien jong U Blei. Dei tang ka ktien jong U Blei kaba barobor ka don ia ka Ktien ka ban wanrah ia ka jingngeit bad jingkyrmen ha ka jingim jong ngi. U Jisu barobor u ju kren ia kine ki kyntien, "To kyrmen ko khun, la map ia ki pop jong me, la pynkhiah ia me, la pyllait ia me, bad kumta ter ter". Dei namarkata kadaw, ngi donkam ban phai barobor sha ka ktien jong U Blei, pule bad puson ha ka, kumta ngin ioh ia ka jingngeit bad ka jingkyrmen.
Rom 10:17, "Ka jingngeit ka jia da kaba sngew, bad kaba sngew da ka ktien U Blei"
Kane ka long ka jinghikai ia ngi, kumno ba ngin nang ban sumar ha kaba iadei bad kaei ba ngi iohsngew. Ngi la ia peit ia ka positive and negative jong ka jingiohsngew.
Ka jingkyntu ka long, to ngin nang ban sumar ia kaei ba ngi sngew. Haba ngi iohsngew ia ka sur kaba wanrah ia ka jingsheptieng, jingduh jingkyrmen, kyntait ia ka, nang ban pdiang ia ka sur kaba dei, ka ba wanrah ia ka jingngeit bad ka jingkyrkhu ia ka jingim jong ngi. Ka sur bymdei barobor ka wan na u Soitan, ka sur badei bad ba don jingkyrmen ka wan na U Trai. "Pdiang ia kaba dei bad kyntait ia ka bym dei"
U Blei un kyrkhu iaphi baroh, Amen.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | March 8, 2021
Comments
Post a Comment