Katba ngi dang im ha ka doh, katba ngi dang don ha kane ka pyrthei, ngim lah khlem da iakynduh ia ki jingeh. Ngi lah ban iakynduh, ngi lah ban iashem, kumta ka donkam ba ngin long kiba stad haba ka jingeh ka wan, shano ngin phet, shaei ngin mareh. Lada ngi phet bakla, ngin nang ngam shuh shuh pynban ha kata ka jingeh, hynrei lada ngi nang ban phet sha U Trai dei hangta ngin ioh lait na kata ka jingeh.
Salm 34:19 Ki jingjynjar uba hok ki long shibun: hynrei U Trai u pyllait ia u na ki baroh.
Haba ngi nang ban phet bad mareh sha U Trai, kampher katno ka bun kata ka jingeh, U Trai u lah ban pyllait ia ngi na kita baroh. Hallelujah! U long ma u kata ka kut baskhem, ka jaka rieh kaba shngain tam ia u briew.
Ki synran U Jisu ki la iakynduh ia ka jingeh ka khraw, sa ba kin iap, hynrei haba ki la mareh sha U Trai, U Trai u la pyllait ia ki na kata ka jingeh bad jingiap. Ngi pule ia kane ha ka gospel u Markos 4:35-41, ngi iohi shaphang ki synran, haba ka eriong kaba khraw ka la khie bad ka jingatphyllung ka la khih pyrshah ia ki sa ban tyllep ia kata ka lieng ba ki ia shong, ki la mareh wut wut sha U Jisu ban kyrsiew ia U ba u iohthiah ha tdong kata ka juh ka lieng, bad haba U Jisu u la khie, u la sneng ia kata ka lyer bad ia kata ka duriaw, te ka la long jai jai eh, ong ka Ktien jong U Blei.
Hynrei don ki briew haba ki iakynduh jingeh, ki phet bad mareh klumar, don kiba mareh sha ki riat ki ram ban noh iap ialade, don kiba mareh sha u dieng ban sdien phasi ialade, don kiba mareh sha kiei kiei ki bym lah ban iarap, ki bymlah ban pyllait ia ki. Nga ong ia phi wat nym phet ne mareh ruma haba phi iakynduh ia ka jingeh, lada phin mareh klumar mareh ruma, kan long pynban ka jingiap (lah ban iap ka met, lah ruh ban iap bad met bad mynsiem), hynrei mareh sha U Jisu, dei tang ha u ka don ka jingshngain bad ka jingskhem. Dei tang ha U phin ioh lait na kita ki jingeh, shawei ym don.
Proberb 18:10,, "Ka kyrteng U Trai ka long ka kut baskhem: uba hok u phet (mareh) sha ka, bad u skhem."
U Nongrwai Salm u ong, "Ngan khmied ia la ki khmat sha ki lum: nangno kan wan ka jingiarap jong nga? Ka jingiarap jong nga ka wan na U Trai, uba la thaw ia ka bneng bad ia ka khyndew." Salm 121:1-2
Paralok baieit, katno khraw ka jingeh jong phi? U Jisu u don bor ban pyllait ia phi. U ong, "To wan ha nga, phi baroh kiba thait bad ba khia ka jingkit, te ngan pynjem ia phi. To shim ia ka lyngkor jong nga ha phi, to hikai ruh na nga; naba nga uba lui lui bad uba rit ruh ha ka dohnud: te phin shem kaba jahthait ha ki mynsiem jong phi. Mat 11:28-29
U khun sarong awria uba la don ha ka khim khait, ka jingeh bad jingkutlad ha ka jingim, u la mareh sha U Kpa, bad U Kpa da ka jingieit bad jingkmen u pdiang sngewbha ia u. Kane ka long ka dur jong ngi bad U Blei, haba ngi mareh sha U, barobor U pdiang sngewbha ia ngi.
Ale, ngin mareh sha U Trai. U Blei un kyrkhu iaphi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
(NB: Mynne ka step 17th April 2021, katba nga dang don ha ka jingduwai ha ïingmane bad nga pyrkhat ia ki jingjia bad ki jingeh ba ngi ia kynduh ha kine ki sngi, la ka long ha kaba iadei bad une u Covid-19 bad kiwei ki jingeh, U Trai u la ai ha nga ia kane ka khubor.)
© Jester Mawlong | 17-04-2021 | 10:30 AM
Comments
Post a Comment